1 SAMUEL 26 - PATHIEN LEKHABU THIENGTHO (BSI)

David in Saul a Hinghawih Nihvei na

¹ Chun, Ziph te chu Gibeah ah, Saul kawmah, a hung u a, “David chu Jeshimon saklam a Hakilah tânga kisel hilo ahim?” ti’n a va gen u a.

² Khutichun, Saul chu a kipana, Israel te laka teldawk chiet mi sang thum pui in Ziph gamthip ah David hawl dingin a chieh suk tau a.

³ Chun, Saul chun Jeshimon saklam a lampi a um, Hamilah tâng achun panmun a khawh a David chu vang gamthip achun a um zinga; chun Saul chu gamthip achun amah hawl in a hung hi tih a hun he ta a.

⁴ Zieziekchun, David chun enthate a sawl a, Saul chu a hung takzet ahi tih a hechien ta a.

⁵ Khutichun, David chu a kipana, Saul panmun achun a chieh a; chun, David chun Saul leh a sepaih lawiupa Ner chapa Abner kuolna mun chu a mu a: Saul chu kangtalai kikawihkhawm haw lai tak achun a kuol a, a kimvel ah sepaih haw’n panmun a khawh u a.

⁶ Ziephet chun, David in Hit mi Ahimelek leh Joab suohpihpa Zeruiah chapa Abishai kawmah, “Saul panmun a kuo a ei zui ding?” ti’n a gen a. Chun, Abishai chun, “Ken hun zui ing ka,” a ti a.

⁷ Khutichun, David leh Abishai chu zan in mipite kawm achun a va chieh u a: chun, ngaitie, Saul chu kangtalai kikawihkhawm haw lai tak achun a na ip a, a lu lam ah a tiengcha chu tuol ah a phutchang a: chun, Abner leh mipite chu a kimvel achun a kuol u a.

⁸ Khutichun, Abishai chun David kawmah, “Tuni hin Pathien in na melma chu na khuta ahun piekdawk ahi tai; zieziekchun, tiengcha hin tuol hi tawh khatvei kilh in ka kilhden zieng aw? Nihvei vei sut ngai puo’n a” a ti a.

⁹ Chun, David chun Abishai kawm achun, “Sumangthai kih, Lalpa thaunuh chunga khut tha kuo a thiemchang thei ding?” a ti a.

¹⁰ David mah chun, “Hingzing Lalpa min in ka gen ahi, Lalpa’n Saul chu a thih hun a tun tieng thih dân vantâng in ahim, ahihloh leh kidona ah ahim that ina.

¹¹ Lalpa thaunuh chunga khut ka thâk loh ding zie mai chuh: a lu lama tiengcha leh tui-um khu hun la’n la chieh hiti” a ti a.

¹² Khutichun, David chun Saul lu lama tiengcha leh tui-um chu a la a, a chieh kit tau a, kuoma’n a mu puou a, kuoma’n a he puou a, a khanglo le a um puou hi: Lalpa’n a ihmut sak ziekin, nuom takin a ip muu hi.

¹³ Khutichun David chu gal langkhat lam achun a chieh a, gamla deuh ah tângsip ah a ding a; a kikal u chu gamla tak ahi a.

¹⁴ Chun David chun mipite leh Ner chapa Abner chu, “Abner, ei hun dâwnglo ding na him?” ti’n a vak gal sap a. Khutichun Abner chun, “Kiko ko a lengpa sukhanglo chu kuo na him?” a ti a.

¹⁵ Chun, David chun Abner kawmah, “Israel te laka pasal pha pên hilo na him? Aleh, bang zieka na lalpa lengpa chu vengpha lo na him? Tu mah mah khan kuo ahim khat na lalpa thah guon panmun ah a hung lut hi.

¹⁶ Na thilhih dân hi a phalo ahi: Na lalpau Lalpa’n lenga a siempa na venphat loh ziekun, Lalpa hinna sâlin ka gen hi. Lalpa thaunuh na pu chu na ven phatloh ziekin na bawn un thi tâk na hiu hi. Lengpa lu lama tiengcha leh tui-um khah khawilam a um ahi tau hi, vak enviel mawng mawng tie,” a ti a.

¹⁷ Chun, Saul chun David aw chu a vak za a, “Aleh, zie chu na aw ahi maw, ka chapa David?” a vak ti a. Chun, David chun, “Hi, lengpa, ka aw ahi” a ti a.

¹⁸ Chun, “Bang zieka ka lalpa’n na suok kei hi nei delh delh zieng ahim? Bang thil a ka hih? Bang thil phalo ka bawla ahi?

¹⁹ Zieziekchun, lengpa, na suok thugen hi ngaitha tie. Ei do dinga na lungthim chawktho chu Lalpa a hih chun, a kawmah kithawihna thilpiek pie leng a lungthim theng ina; ahihziekin, mihing a hih u chun, Lalpa hansie a chungu ah tung hen. Lalpa gama pat gamdang pathien haw mai ho theihna gama ei nawhlut ziekun.

²⁰ Zieziekchun, ka hinna hi Lalpa apat a gamla tak ah; gamdang ah lâk in um kihen. Bang zieka kei uihik tawbang phet that ding a Israel te leng hi hung ahim? Bang zieka gam vacha banga kapthak dinga ei hawl zing ahim?” a ti a.

²¹ Ziephet chun, Saul chun, “Thil ka na hihkhiel mah mah ahi hi; ka chapa David, hung kitin: tuni a hi ka hinna na mitmuha alul bêk ziekin bangmah hun lawh ta hiel puo’ng ka: ngaitie, thil ngawlhuoi tak ka na hih ta a, ka na hihkhiel ahi tai” a ti a.

²² Chun, David in a dâwng a, “Aw lengpa, entie, na tiengcha hi! tangval khat hung henla hung la hen.

²³ Lalpa chun micheng a kitûpnau leh a ginumnau ziekin kipahman a pie a: tuni hin nang hi Lalpa’n ka khut ah a hun pie na a. Lalpa thaunuh chungah ka khut ka tha nuom puoh a.

²⁴ Chun, ngaitie, tuni a na hinna ka hun ngaihlul sak mah bang hin Lalpa’n kei hinna ei ngaihlul sak henla, lungzînna chengcheng apat hin ei hukdawk hen,” a ti a.

²⁵ Ziephet chun, Saul chun David kawmah, “Ka chapa David, vangsak in um in: thil thupi tak tak hun hih in na tin, zo zel inla,” a ti a. Khutichun David chu a chieh zela, chun, Saul chu a mun lam ah a vaikit ta a.