1 SAMUEL 24 - PATHIEN LEKHABU THIENGTHO (BSI)

David in Saul a Hinghawihna

¹ Chun, hiti hi ahi a, Philistia te va delh a Saul a hung kit chun, “Ngaitie, David chu En-gedi gamthip ah a um hi,” ti’n a na hilh u a.

² Khutichun, Saul chun Israel te chengcheng lak apat têlchuom diek mi sang thum a pui a, Sakel haw chênna suongpi hiem lak a chun David leh a mite hawl in a chieh tau a.

³ Chun, lampi a belam huong haw umna chu a va tung a; zie chun kâwlhâwm le a um a, Saul chu kihuihthah dingin a luta. David leh a mite chu zie kâwlhâwm sung lama chu um ahiu a.

⁴ Chun, David mite chun a kawmah, “Ngaitie, Lalpa’n na kawmah, ‘Na melma chu na khut ah pie’ng ka ting, a chung ah pha na sak dân dân in hih in,’ a tih ni kha ahi ta hi,” a tiu a. Ziephet chun David chu a kipana a gukcha’n Saul puonmawng chu a âttha ta a.

⁵ Zie zawh nung chun hiti hi ahung hi a, Saul puonmawng a va âtthâk ziek chun David lunggil chu a na ten ta a.

⁶ Khutichun, a mite kawm achun, “Lalpa sathau nuh ahi tih hezing ngût a, a chunga khut pan a, Lalpa sathau nuh ka pu chunga zie thil ka na hih hi akilawm mawhna hiel e,” a ti a.

⁷ Khutichun David in zie thu haw chun a mite a thoh a, Saul do dinga a kipat uh a phal ta puoh a. Chun, Saul chu kâwlhâwm apat chun a pawt a, a chieh ta a.

⁸ A nungcha chun David le a kipana, kâwlhâwm apat chun a pawt a, “Lengpa, ka lalpa,” ti’n Saul chu a sam zui a. Chun, Saul chu a vak kihei leh David in a mai a lei si’n chibai a bûk a.

⁹ Joab chun Saul kawmah, “Ngaitie, ‘David in na sietna ding a hawl hi’ ti a mite’n na kawma a gen u chu bang zieka taksang sek na him?

¹⁰ Ngaitie, tuni a Lalpa’n kâwlhâwm a hih ka khuta ahun piek dân hi na mit ngêi in na mu a; khenkhat chun hun that dingin ei sawl u a; himahlele ka hun hinghawih a; ‘Ka lalpa chungah ka khut himhim tha puo’ng ka, Lalpa sathau nuh ahi ngâla,’ ka ti a.

¹¹ Zie mai chule hilo in, hepa, entie, na puon mawng hile ka vawp zing hi; na puon mawng ka âtthâk theih ngâla ka hun thah loh hin ka khuta hin thil phalo leh suksietna a um puoi tih leh ka hinna lak guon ei hawl hawl mahleh chin le, na chungah ka gilo puoi tih hi he tei tei in,

¹² Lalpa’n kei leh nang kal thu hi vaihawm henla, chun, Lalpa chun na chungah ka phuba la hen; ahihziekin ken vang na chungah ka khut tha himhim puo’ng ka.

¹³ Malai thuching in, ‘Minunsie apat in nunsietna a hung pawt sek a,’ a ti a; himahlele na chungah ka khut tha puo’ng ka.

¹⁴ Israel lengpa chu kuo hawl in ahi ahung pawt? Kuo a na delh? Ui thisa delh in! Uihik delh in!

¹⁵ Zieziekchun, Lalpa chu vaihawmpa hi henla, kei leh nang kal thu hi vai hawm henla, ka makhuo hi ei ngaihtuoh sak in ei genpih henla na khut apat in ei hukdawk hen,” a ti a.

¹⁶ Chun, hiti hi ahi a, David in Saul kawma zie thu haw hih a gen zawh phet chun Saul in, “Nang na hi maw, ka chapa David?” a ti a. Chun, Saul chu ngeih tak in a kap ta a.

¹⁷ Chun, David kawm achun, “Kei sangin na dik zaw mah mah hi: na chunga thil phalo ka hih sasa ale kei chunga thilpha na hih ziek hin.

¹⁸ Chun, tuni hin ei bangti bawl phat na hi ta’m tih na sulang tai: Lalpa’n na khuta ei pieksa ale nei thah loh hin.

¹⁹ Mi’n a melma mu henla hileh bit takin a thahdawk nuom dinga ahim? zieziekchun tuni a ka chunga na thilhih ziek hin Lalpa’n thilpha’n hun dinthuk hen.

²⁰ Ngaitie, leng hung hitei ding na hi a, Israel gam chu na khut ah sukdet a um ding ahi tih ka he tai.

²¹ Zieziekchun, ka nunga ka suonte hung um ding haw chun sumangthai lo ding leh ka pa inkuon lak apat ka min hihmanglo dingin Lalpa min in ka kawmah kihâksiel in,” a ti a.

²² Khutichun David chu Saul kawmah a kihâksiel ta a. Chun, Saul chu a chieh ta a; David leh a mite vang chu kulh lama chun a chieh to tau a.