1 SAMUEL 23 - PATHIEN LEKHABU THIENGTHO (BSI)

David in Keilah Khuo a Humbitna

¹ Chun, “Ngaitie, Philistia te’n Keilah khuo chu a do u a, phuol a buh haw le a lâksak zo kêi ui,” ti’n David chu a hilh u a.

² Tichun David chun, “Zie Philistia mite chu ka va do dem?” ti’n Lalpa a dawng a. Chun, Lalpa chun David kawmah, “Philistia te chu va do inla, Keilah khuo chu va humbit ah,” a ti a.

³ Chun, David mite chun a kawmah, “Ngaitie, Judai gama I um sau a le lau I hiu a, Keilah khuo a va chieh in Philistia sepaihte chu va do nalai leuhing phalo zawsem ding ahi,” a tiu a.

⁴ Ziephet chun, David chun Lalpa chu a dawng kita. Chun, Lalpa chun a dâwng a, a kawmah, “Kipan inla, Keilah khuo ah chieh suk in, Philistia te chu na khut ah hun pie’ng ka,” a ti a.

⁵ Khutichun, David leh a mite chu Keilah khuo ah a chieh u a, Philistia mite chu a va do tau a, a gancha teu a lâksak u a, nasa takin a nuoisieh tau a. Khutichun, David in Keilah khuo a chêngte chu a humbit ta a.

⁶ Chun, hiti hi ahi a, Ahimelek chapa Abiathar Keilah khuo a David kawma a taih lai khan thiempu puonâk kenga chieh a hi a.

⁷ Chun, Keilah khuo ah David a chieh hi tih chu Saul a hilh u a. Saul chun, “Pathien in ka khuta ei piek a hi ta chu; kulh kawtkhak leh a kamna nei khuo achun lut in a kikhum ta ngâl a,” a ti a.

⁸ Khutichun, Saul chun mi chengcheng chu Keilah khuo va do a, David leh a mite va huol dingin a sam khawm a.

⁹ Chun, David chun, Saul in a chungah thil phalo a ngaihtuoh hi tih a na he a, thiempu Abiathar kawm achun, “Thiempu puonâk kha hun la tie,” a ti a.

¹⁰ Khutichun, David chun, “Aw Lalpa, Israel te Pathien, kei zieka khuo susie dingin Keilah khuo ahin Saul hung suk a guoi tih, na suok hin ka hechien kei a.

¹¹ Keilah khuo a mite hin a khut ah ei pie ding um? Na suok hin ka na het guol chun Saul chuh a hung suk dem? Aw Lalpa Israel Pathien, lungsiet takin na suok hi ei hilh in,” a ti a. Chun, Lalpa chun, “Hung suk ding ahi,” a ti a.

¹² Ziephet chun, David chun, “Keilah khuo a mite hin kei leh ka mite hi Saul khut ah ei pie ding um?” a ti a. Lalpa chun, “Hun pie’n au,” a ti a.

¹³ Ziephet chun, David leh a mite, zagup ahim vel chuh a kipan u a, Keilah khuo apat chun a pawtdawk tau a, a chieh zel tau a. Chun, Keilah khuo apat in David a pawt tai tih chu Saul a hilh uh a, tichun kido ding chuh a haihsan ta a.

Tanggam a David Umna

¹⁴ Khutichun, David chu Ziph gamthip tâng gama kulh haw achun a um zing ta a. Saul chun amah chu ni chengin a hawl a, himahlele, Pathien in a khut ah a pie puoi.

¹⁵ David chun Saul chu amah that dingin a pawtdawk hi tih chu a mu a. David chu Ziph kawma gamthip a Horesh mun achun a um a.

¹⁶ Zie tak achun Jonathan chu a kawmah a va chieh a, Pathien in hun veng tei ding ahi tin a va thamuon ta a,

¹⁷ A kawmah, “Lau hiel ki’n. Ka pa Saul chun hun suna himhim lo ding ahi. Nang chu Israel te lenga hung pang ding na hi tih chu a he mah mah a, chun, kei na bana hung hi ding ka hi,” a ti a.

¹⁸ Khutichun, a nih u chun Lalpa ma ah thugawlh a siem u a. David chu Horesh ah a um zing ta a, Jonathan chu In lam ah a chieh kit ta a.

¹⁹ Ziephet chun, Ziph mite chu Gibeah a Saul kawm achun a chieh to u a, “David chu ka kawm u ah, Jeshimon sim lama Hakilah tânga Horesh a kulh haw a kisel zing hilo ahim?

²⁰ Zieziekchun, aw lengpa, hung suk na ut phat phat leh hung suk inla, lengpa khuta piek lut chuh kei uh mawhpuok hi’n a,” a tiu a.

²¹ Saul chun a dawng a, “Lalpa’n hun vangsak hen; nang hawn vang nei lungsiet mah mah ui.

²² Chieh unla, chientakin a chieh sekna mun chu va en in, va heu inla, zie tak a a na mu chule kuo ahim hun hechien unla; gukhah takin thil ahih sek hi tih mi’n ei hilh ngâla.

²³ Zieziekchun, a kisêlna mun chengcheng hun hechien unla, chun, hechien kêi in ka kawmah hungkit unla, nang u tawh chieh ing ka. Chun, hiti hi hi’n tin, zie gama chuh um a hih phawt chun, Juda mi sang tamtak lak apat chun hawl dawk ing ka,” a ti a.

²⁴ Khutichun, a kipan uh a, Saul chieh ma’n Ziph achun a chieh tau a: himahlele, David leh a mite chu Jeshimon sim lama, Arabah a Maon gamthip achun a um uh a.

²⁵ Chun, Saul leh a mite chu amah hawl ding chun a chieh tau a. Zie chuh David a hilh uh a; ziephetchun David chu Maon gamthip a um suongpi achun a delhzui ta a, tak achun a um ta a. Saul in zie thu chuh a zak phetin, David chu a delhzui suk ta a.

²⁶ Chun, Saul leh a mite chu tâng pang leh langkhat lam achun a chieh uh a, David leh a mite chu tâng pang lehlangkhat lam achun a chieh uh a. Khutichun, Saul leh a mite apat chun David leh a mite chuh kin takin a tai mang u a, Saul leh a mite chun mat guo’n a kimvel ngâl u a.

²⁷ Himahlele, Saul kawm achun, “Kikinnawh inla, hung in, Philistia te’n I gam uh a hun do phut ui,” ti’n thangko ahung tung a.

²⁸ Khutichun, Saul chun David a delh chu a haihsan a, Philistia te do dingin a chieh ta a: Zieziekchun zie mun chu Sela Hammahlekoth a ti tau ahi.

²⁹ Chun, David chu zie apat chun a chieh to a, En-gedi kulh haw achun a pansa ta a.