1 SAMUEL 22 - PATHIEN LEKHABU THIENGTHO (BSI)

Saul in Thiempu a Thahna

¹ Khutichun, David chu zie apat chun a pawt a, Adullam kâwlhâwm achun a tai ta a: a suohpihte leh a pa insungmi chengin zie chu a het phet un a kawmah a chieh u a.

² Chun lungdawng taphawt te, bat nei taphawt te, lungkim lo taphawt te a kawmah a chieh khawm u a; tichun, a lawiupau in a pang ta a; a kawm achun mi zali vel a um tau a.

³ Chun, David chu zie apat chun Moab gama Mizpah ah a chieh a; Moab lengpa kawm achun, “Pathien in kei dinga thil a hih ding ka het macheng in ka nu leh ka pate hi na kawmah um u hen aw,” a ti a.

⁴ Chun, amau chu Moab lengpa kawm achun a pui a; tichun David chu kulh sunga a um sung cheng chu a kawm achun a um u a.

⁵ Chun, thiemgau Gad chun David kawmah, “Kulh sung achun um zing ki’n; pawt inla Judai gam ah chieh in,” a ti a. Khutichun David chu a pawt a, Hereth gammâng achun a lut ta a.

⁶ Chun, Saul chun David leh a kawma umte chu a mu tau hi tih a na he a: Saul chu Gibeah ah Ramah khuo ah tamarisk thing nuoi ah tangvum ah a tiengcha chawiin a chu a; chun, a kimvel achun a suokte chengcheng chu a ding u a.

⁷ Chun, Saul chun a kimvela ding a suokte kawm achun, “Nang u Benjamin mite haw, ngaiun; Jessai chapa chun lo haw leh grep huon haw hun pie chietin a sepaih sang lawiupa ding bang, a sepaih za lawiupa ding bangin ahun siem suok kêi dinga ahim?

⁸ Na bawn u a nei phiel u a, ka chapa’n Jessai chapa kawma thu a thun ka kawma gendawk himhim na um loh u a, ei lunggim pih himhim na um loh u a, ka chapa’n ka suok hi ei do ding leh tuni haw banga ei châng dinga a tîl thu ka kawma gendawk na um loh uh?” a ti a.

⁹ Khutichun, Saul suokte kawm a ding Doeg chun a dâwng a, “Jessai chapa chu Nob khuo a Ahitub chapa Ahimelek kawma hung ka mu a.

¹⁰ Chun, amah chun amah dingin Lalpa a dawng a, nek ding a pie a, chun, Philistia mi Goliath chemzâm le a pie a,” a ti a.

¹¹ Tichun, lengpa chun Ahitub chapa thiempu Ahimelek leh a pa inkuonte, Nob khuo a thiempu um chengcheng chu a sama.

¹² Chun, Saul chun, “Nang Ahitub chapa a na ngaitha’n,” a ti a. Chun, amah chun, “Hepu, zie hin ka um hi,” a ti a.

¹³ Chun, Saul in a kawmah, “Chângthâk leh chemzâm a na pie a, Lalpa a na dawt saka, tuni a a hih guola ei do ding leh ei châng ding a bang zieka nang leh Jessai chapa hin ei chânggu vangvei na hiu hi?” a ti a.

¹⁴ Ziephet chun Ahimelek chun lengpa chu a dâwng a, “Lengpa mâkpa, na dawt bulpen, na insung a zahna chang David tawbang himhim a mi ginchak um hi na suokte chengcheng lak ah kuo a um?

¹⁵ Tuni hi Pathien ka dawtsak pat ni ahim? Ahi puoi. Lengpa’n a suok ahim, ka pa inkawte himhim bangmah ngawh hiel kihen; na suok hin zie thu haw himhim hi a bangmah cha ka he puoi,” a ti a.

¹⁶ Chun, lengpa chun, “Ahimelek, na thih ngêi ngêi ding ahi, nang leh na pa inkuon te chengcheng tawh,” a ti a.

¹⁷ Chun, lengpa chun a kieng a ding sepaih haw kawm achun, “Kihei inla, Lalpa thiempu haw hi that un, David lam ah a pang u a, a taihmang hezing ngâla ka kawma a gen loh ziek un,” a ti a. Himahlele lengpa suokte chun Lalpa thiempute chung achun khut a tha nuom puou a.

¹⁸ Chun, lengpa chun Doeg kawm achun, “Nang kihei inla, thiempute chu that ah,” a ti a. Chun, Edom mi Deog chu a kiheia, thiempute chu a that ta a, zie ni chun patngat puon thiempu puonâk âk mi sawmgiet leh nga a that a.

¹⁹ Chun, Nob, thiempu khuo chu chemzâm in a do a, amei-apa’n naupang leh nawi cheplaite nasan tel in, bâwng haw, sabiltung haw, belam haw chemzâm in a satlum a.

²⁰ Chun, Ahitub chapa Ahimelek chapate laka khat, a min Abiathar chu a tai dawka, David kawmah a tai a.

²¹ Chun, Abiathar chun Saul in thiempute a thah thu chu David a hilh a.

²² Chun, David chun Abiathar kawm achun, “Edom mi Doeg zie taka chu a um ni tak khan Saul hilh tei ina tih a hetsa him ahi: na pa inkawte chengcheng chu kei zieka thi ahi tau chu.

²³ Nang vang chu kei kawmah um inla, lau himhim kih; kei ei thah guo chun nang le hun thah guon tin uh; ka kawma na um le vang bit inla,” a ti a.