1 SAMUEL 21 - PATHIEN LEKHABU THIENGTHO (BSI)

Saul apat David Gâltaihna

¹ Khutichun, David chu Nob khuo a thiempu Ahimelek kawm achun a chieh a: chun Ahimelek chun kilîng kawmin David chu a na muok a, a kawmah, “Bang zieka nang maia uma kuomah tawnpih lo?” a ti a.

² Chun, David chun thiempu Ahimalek kawm achun, “Lengpa’n thil khat hih dingin thu ei pie a ka kawmah, ‘Thil ka hun hihsak guot leh thu ka hun piek himhim hi kuoma’n he kihen,’ a ti chak kêi a; chun, tangval haw tawh kimuhtuohna ding mun haw ka guot a.

³ Ahihleh, tuhin nek theih bang bang na khut ah aum hi? chângthâk tang nga ei pie’n, ahihloh leh, na neih neih,” a ti a.

⁴ Chun, thiempu chun David chu a dawng a, “Chângthâk vantâng chu ka nei puoh a, chângthâk zek vang chu ka nei hi; tangval haw chu numei apat kikiengkawih ahih phawt u chun,” a ti a.

⁵ Chun, David chun thiempu chu a dawng a, a kawmah, “Tuni thum sung chu kei u apat numei haw kawihchuom ahi takzet ui; ka hung pawt ding lai khan le tangval haw bel chu a thiengtho ahi, zin viel maimai ka hi nau a chuh; tuni vang hin a bel u chu a hah thientho zawna ding e,” a ti a.

⁶ Khutichun thiempu chun chângthâk zek chu a pie a: zie chun Lalpa masang apat a lâkdawk tieng u a chângthâk lum a then ding tih loh chu chângthâk dang a um puoh ngâl a.

⁷ Chun, Lalpa ma a hên a um Saul suokte laka pasal khat, zie ni chun zie chun a um a: a min chu Doeg ahi a, Edom mi, Saul ganchingte lawiupa ahi.

⁸ Chun, David chun Ahimelek kawm achun, “Tiengcha ahim chemzâm ahim na vawp puo maw? lengpa ma achun kin a ngaih ziekin ka chemzâm leh ka gâlvan haw a bangmahpen ka hun keng man ta puoh a,” a ti a.

⁹ Chun, thiempu chun, “Philistia mi, Goliath, Elah guoma na thahpa chemzâm kha, ngaitie, zie hin thiempu puonâk chuol sik ahin, puo’n a kituom in a um zing hi, zie chu na lak nawp leh la’n, zie tihloh chu adang aum puoi,” a ti a. Chun, David chun, “Zie kheltha chu bang a um dem; ei hun pien,” a ti a.

¹⁰ Khutichun David chu a kipana, zie ni chun Saul lau in a taimang a, Gath lengpa Akish kawmah a chieh ta a.

¹¹ Chun Akish suokte chun a kawmah, “Zie hi a gam lengpau David kha hilo ahim? ‘Saul in a sang a sangin a that, David in a sing a sing in a that,’ tin lam kawmin a chungthuu la’n a sa hum hum uh hilo maw?” a tiu a.

¹² Chun, David chun zie thu haw chu a lungthim ah a vawp a, Gath lengpa Akish chu a lau mah mah ta a.

¹³ Khutichun, a mau achun a umdan a theng a, a khut u a a um zing lai chun a kingawlsak ta a, kawtkhakhaw bang chu a khuot diek diek mai ta a, a khamul haw achun a chil poh a luon sak zeng zung zieng ta a.

¹⁴ Khutichun, Akish chun a suokte kawm achun, “Entiem u, mingawl ahih na hezing ngâl u a, bang zieka ka kawma na hun puih tei tei u a?

¹⁵ Mingawl ka tâksap ziekin ahim zie mingawl hi a ngawl dan sulang dinga ka ma a na hun puih uh? Zie pa hi ka In ah a hung lut lâwm lâwm dinga mawh?” a ti a.