1 SAMUEL 20 - PATHIEN LEKHABU THIENGTHO (BSI)

Jonathan in David a Panpih

¹ Khutichun, David chu Ramah khuo a Naioth apat chun a tai a. Jonathan kawm achun a chieh a, “Banga ka hih? Banga ka hih khelh? Na pa chung ahin bang ka hihkhiel a hiti a hi thah ei guo ahim?” a ti a.

² Chun, amah chun, “Hun that lo e! thi hiel puo’n la; ngaitie, ka pa’n ei hetsak lo in bangmah lien leh neu leh a hih kha puoh a, bang ziekin ahim zie thu hi kei kawma a îm ding? îm hiel puo’n a,” a ti a.

³ Chun David chun, “Na pa chun nei lungsiet dân hi a he chien mah mah ngâla; ‘Jonathan in zie hi chu hese dah hen, dân leh lungkham taluo khâna,’ a ti a hi’n a: ahih ziekin Lalpa hinna leh nang hinna sâlin ka gen ahi, thihna tawh ka kikal uh kal khat mai ahi,” ti’n pap takin a gena.

⁴ Khutichun Jonathan chun David kawmah, “Na hinna’n a deih takphawt chu hun hihsak zel ing ka,” a ti a.

⁵ Chun, David chun Jonathan kawmah, “Ngaitie, zing hi tha thak hiding ahi a, lengpa kawma ankuong um tei ding ka hi a; ahih ziekin a ni thum ni nitâk lam chan gama kisel dingin chieh zaw’ng ka.

⁶ Chun, na pa’n ka umloh hi a hun hetdawk chun ‘David in a khuou Bethlehem a va chieh vak ding ti’n ei ngên ei ngên a; a inkuon ding u a kum cheng kithawih hun ahii,’ a na ti’n la.

⁷ Chun, ‘A pha chu,’ a tih chun na suok hi lungmuong intin; ahihziekin a lung a nat chun thil phalo hih guo ahi tih he mai in.

⁸ Zieziekchun, na suok hi phatak in bawl in; na suok hi Lalpa ma ah thuthun na neihpih ta ngâla; ahih ziekin sukkhelh ka neih chun nangin ei that zieng in; bang zieka e na pa kawma nei puih khelkhel ding?” a ti a.

⁹ Chun, Jonathan chun “Hun that maizen lo e! ka pa’n na chung ah thil phalo hih a guoi tih ka het thet chun hun hilh zieng ding hilo ka him?” a ti a.

¹⁰ Ziephet chun David chun Jonathan kawmah, “Na pa’n bawngtawng takin hun na dawng taleh kuo’n ei hilh die?” a ti a.

¹¹ Chun, Jonathan chun David kawmah, “Hung tie, gam âwng akhun va chieh dii ti,” a ti a. Tichun, gam âwng achun a va chieh khawm tau a.

¹² Chun, Jonathan chun David kawmah, “Lalpa, Israel te Pathien chu a hetpih hihen; zing tuphat hin ahim, ani thum ni’n ahim ka pa ka hun dâwp dawka, ngaitie, David chung thu a phalam ahih chun na kawma mi hun sawl in hun hilh lo ding ka hi a ahim?

¹³ Chun, ka pa’n na chungah thil phalo hih nuom ta leh, ka hun hilh loh a lungmuong taka na chieh theihna dinga ka hun thâk loh chun, Lalpa’n Jonathan hi a nawp nawp lawh henla, zie sanga chu nasazaw’n le; chun, Lalpa chu na kawmah um hen, ka pa kawma a um sek guolin.

¹⁴ Chun, ka thih lohna dinga ka damsung maia dinga Lalpa zaidawhna chu nei muhsak hilo in,

¹⁵ kumkhuo’n ka inkuote le na lungsiet hai ki’n; Lalpa’n David melmate lei chunga pat a sukbei suok kêi nung inle hai ki’n,” a ti a.

¹⁶ Khutichun Jonathan chun, “Lalpa’n David melmate chungah phuba la ta hen,” ti’n David inkawte kawmah thuthun a siem ta a.

¹⁷ Chun, Jonathan chun David chuh amah a lungsietna sâm in a kihâksiel sak kita; amah hinna hehpih bang takin a hehpih ngâla.

¹⁸ Khutichun, Jonathan chun a kawmah, “Zing hi tha thak hiding ahi a; na chutna a awn ding ziekin na umloh kilang tei ding ahi a.

¹⁹ Chun, ni thum na um tieng, zie tieng chuleh kintakin chieh suk inla, tuma a zie buoina ahung kipat tunga na kisêlna akhan hung inla, Ezel suong kawm achun um zingin.

²⁰ Chun, kithiemsin hi leng kilawm takin a sik thalpi chang thum in hun kap ing ka ting.

²¹ Chun, ngaitie, ‘Chieh inla, thalpi chang haw kha va hawl dawk ah,’ ti’n naupang khat sawl ing ka ting. Naupang kawma chuh, ‘Entie, thalpi chang haw chu na umna apat zie lam panga hi um ahiu hun la’n la, hung ah,’ ka tih chun, Lalpa hinna’n ka kihâksiel hi nang dingin lungmuon um leh lauh ding umlo hi’n tin,

²² Ahihziekin naupang kawma chu ‘Entie, thalpi chang haw chu na khel lama khu um ahiu hi’ ka tih chun chieh mang zieng in; Lalpa’n a hun sawlmang hi’n la.

²³ Chun, nang leh ken I thil gen chung thu ahin, ngaitie, nang leh kei kikal ahin Lalpa chu kumkhuo’n hetpihpa ahi,” a ti a.

²⁴ Khutichun David chu gamzawl achun a kisel a; chun tha ahung thak phet chun lengpa chu ankuong um in a chu a.

²⁵ Chun, lengpa chu ni danga a chut sekna bang bula a chutna achun a chu a; chun Jonathan chu a zawn tak ah a chu a, chun, Abner chu Saul kawmah a chu a, chun, David chutna mun chu a âwng a.

²⁶ Ahihziekin Saul chun zie ni chun bangmah a gen puoi: “A chungah thil bang ahim khat a uma, a thiengtho puoh a hi’n tin, a thiengtho lo hitei ina,” a lungthim in a ti a.

²⁷ Chun, zie zing, zie tha ni nih ni chun hiti hi ahi a, David chutna mun chu a âwng kit zel ta a; ziephetchun Saul in a chapa Jonathan kawm achun, “Bang zieka Jessai chapa hi thangni leh tuni a ankuong uma hung lo ahi?” a ti a.

²⁸ Chun, Jonathan chun Saul chu a dâwng a, “David in Bethlehem a chieh sak dingin ei ngên ei ngên a,

²⁹ ‘Ei chieh sak tei in, ka inkawte’n zie khuo achun kithawihna nei ding ahiu a, ka suohpihpa’n zie a chu tel tei dingin ei ti.a, khutichun nei lungsiet theih chun ei chiehsak inla, ka suohpihte va kimuhpih ing ka,’ a ti a. Zieziekchun leng dawhkan a hi hung lo ahi,” a ti a.

³⁰ Ziephet chun Jonathan chung achun Saul chu a lungna mah mah ta a, a kawmah, “Nang numei chavai leh genhak chapa, Jessai chapa chu na muolphona ding leh na nu ngawnchang a hih muolpho dinga tel na hi tih helo kha ei sa na him?

³¹ Jessai chapa hi zie leia hi a um lai chan sukdet hi puo’n la, na gam le. Zieziekchun, kintak in sap sak zieng inla, ka kawmah hun puih sak ah, a thih tei ding ahi,” a ti a.

³² Chun, Jonathan chun a pa Saul chu a dâwng a, a kawmah, “Bang zieka suklup hiding ahim? banga ahih?” a ti a.

³³ Chun, Saul chun khawh guon a tiengcha chu a vak lama; zieziekchun Jonathan chun a pa’n David chu thah a na guo tak tak ahi tih a he ta a.

³⁴ Khutichun Jonathan chu dawhkân apat chun lungna takin a kipan dawka, zie tha ni nih ni chun an a ne ta puoh a; a pa’n David a sukmuolpho bêk ziekin a lungkhampih ahi.

³⁵ Chun, hiti hi ahi a, zingkal chun Jonathan chu tanglak khat pui in David tawh a kitiemnau achun a chieh ta a.

³⁶ Chun, a tanglak puihpa kawm achun. “Tai inla ka thal kap haw hi va hawl ah,” a ti a. Chun, tanglakpa chu a taih lai chun a khel lam chu thal in a kap a.

³⁷ Chun tanglak chu Jonathan thal kap kiekna mun a tun phet chun Jonathan chun naupangpa chu a vak gal sap a, “Thalpi chang chu na khel lama um hilo ahim?” a ti a.

³⁸ Chun, Jonathan chun naupang chu a sama, “Hung tai meng in, kin in, muong ki’n,” a vak ti a. Chun Jonathan puih tanglakpa chun thalpi chang chu a luokkhawm a, a pu kawm lam achun a chieh ta a.

³⁹ Himahlele tanglak chun bangmah a he puoh a, Jonathan leh David mai chun thil umzie chu a heu a.

⁴⁰ Chun, Jonathan chun tanglakpa chu a gâlvan haw a pie a, a kawmah, “Chieh inla, khuo lam ah a na puo’n,” a ti a.

⁴¹ Chun, tanglakpa chu a chieh phet chun David chu a umna mun simlam apat chun a hung pawt a, a maia tuol si’n thumvei chibai a bûka; chun, a kichawp u a, a kikah tau a, David chu a khawk diek a.

⁴² Chun, Jonathan chun David kawmah, “Lungmuong takin chieh in aw, ‘Lalpa chu nang leh kei kikal leh ka suonte leh na suonte kikal ah kumkhuo’n um hen,’ ti’n Lalpa min in I kihâksiel ta kha,” a ti a. Chun, a kipana, a chieh ta a; chun, Jonathan chu khuo achun a lut ta a.