1 SAMUEL 2 - PATHIEN LEKHABU THIENGTHO (BSI)

Hannah Pauchamna

¹ Chun, Hannah chu a paucham a: “Lalpa chungah ka lunggil a kipâk mah mah a, Ka ki chu Lalpa ah chawihsân in a um a; Ka melmate chungah ka kam suklet in a um a, Na hukdamna a chu ka kipah mah mah ziekin.

² “Lalpa guola thiengtho khatchale a um puoi; Nang tawbang himhim a um puoi, I Pathien u tawbang suongpi himhim a um puoi.

³ Khuti lâwm lâwm a chapo in thu gen takiu inla; Na kawm u a pat in hâmdâwkna himhim pawt kihen; Lalpa chu chitna Pathien ahi ngâla, Ama’n thilhih haw a bûk tuok sek hi.

⁴ Mihatte thalpi haw a bawng seka, Mi zawngkhalte chu vang hatna a thuom in a um ui.

⁵ Nieng leh nal a umte chun nêk kawm a hawl tau a, Gilkielte chu a kiel ta puou: Ahi, ahi, a chîng nu chun cha sagih a hing ta a; Cha tamtak neinu chu a chau tai.

⁶ Lalpa chun a hih lum seka, hih le a hihhing sek: Thân ah a kum suk sak seka, puih le a puidawk sek hi.

⁷ Lalpa chun a hih chagah seka, hih le a hih hausa sek: A suniem seka, chawih le a chawisâng sek hi.

⁸ Leivui apat in gimthei chu a kaitho seka; Mi chagah chu gimtheihna apat a dawm kâng sek; Miliente laka um a, Lopina lalchutphah a luoh theihna ding un: Lei kingakna chu Lalpa a ahi a, Khawvel chu a chungah a nga ta ngâla.

⁹ “A mithiengthote keng chu veng intin, Migilote vang chu thimlak ah sukthip kêi in um in au; Hatna chun kuoma’n zo ding ahi puoh ngâl u a.

¹⁰ Lalpa dote chu phieh dimdem in au, Vana pata vanpi git in do intin: Lalpa chun kâwlmawng tiengin vaihawm in tin; A leng chu hatna pien tin, a thaunuh ki chu dawmsang ina,” a ti a.

¹¹ Tichun, Elkanah chu Ramah khuo a a In achun a chieh kit ta a. Chun naupang chun thiempu Eli ma ah Lalpa na chu a sem ta a.

Eli chapate

¹² Chun, Eli chapate chu Belial chapate ahiu a; Lalpa chuh a he puou a.

¹³ Chun mipite laka thiempute hih sek dân chu, mi’n kithawihna ahung piek tieng u leh, sa kihuonlai takin thiempu suok chu sa thukna thikzum ka thum nei chawiin ahung sek a;

¹⁴ chun, khangbel ahim, bel lien ahim, ketli ahim, bel ahim sung chu a vak sun a: chun, zie sa thukna thikzum chun ahun sut dawk chengcheng chu thiempu’n a lak sek ahi. Israel mi, zie taka, Shiloh khuo a, hungte chu ti a chu ana bawl sek uh ahi.

¹⁵ Chuleh, a thau a hâl mau in thiempu suok chu a hunga, kithawipa kawm achun, “Thiempu a dinga em min ding sa ei pie’n; na sa huon chu a deih puoh a, a siel a deih ahi,” a ti sek. a.

¹⁶ Chun, mi chun, a kawma, “Athau chu kihal phawt henla, chun, zie zawh chuleh na deih zah zah la naven na ti,” a na tih chun amah chun, “Hilo e, nei piek zieng ding ahi; nei piek loh chun pawng lak tho tho ding ka hi” a ti sek hi.

¹⁷ Khutichun, tangvalte gitlohna chu Lalpa mitmuh in anasa ta mah mah maia: mite’n Lalpa kawma kithawihna chu a ngaihnep lawh tau hi.

Samuel leh Eli

¹⁸ Chun, Samuel chuh, naupang cha himahleh, puon malngât thiempu puonâk âk in, Lalpa ma ah na a sem a.

¹⁹ Chun, zielo chun, a nu’nle puonâk chuol neu a khuihsak sek a, kum cheng leh kithawihna pie dinga a pasal tawh a hung tieng leh ahun chawihsak sek a.

²⁰ Chun, Eli chun Elkanah leh a zi chu a vangsaka, “Lalpa dinga thilpiek na piek u hih zie numei suon hin Lalpa’n hundin ta hen,” a ti a. Chun, a In lam u ah a chieh tau a.

²¹ Chun, Lalpa chun Hannah chuh a veh tha a, nau a vawp a, chapa thum leh chanu nih a hing a. Chun, naupang Samuel chu Lalpa ma achun ahung khanglien ta a.

²² Chun, Eli chuh ahung têk ten ta a; Israel te chunga a chapate thilhih chengcheng leh Lalpa hona puon-In kawtbul a numei nasem haw ana kuolpih sek thuu a hun he ta a.

²³ Tichun, a kawm u ah, “Bang zieka zie tawbang thil hi bawl na hiu hi? mipite chengcheng apat hin na thil phalo bawl dân hawu ka na he a.

²⁴ Tamaizen an! Ka chapate: na chanchin u ka na het hi aphalo lam ngen ahi; Lalpa mite chu na sukkhelh sak uh ahi.

²⁵ Mi khat chu midang dona a a gitloh chun vaihawmpa chun a chungah vaihawm intin: ahihziekin mi Lalpa chunga a gitloh chun kuo’n a nget pih ta die?” a ti a. Khutisa chun le a pau thu chu a nung nuom diek puou a; Lalpa chun amau chu sulum ngêi ding ahi ngâla.

²⁶ Chun, naupang Samuel chu a hung khanglien deuh deuh a, Pathien leh mihing mittung in a um a.

Eli Insung Sietna ding Genlawkna

²⁷ Chun, Eli kawm achun Pathien mi khat ahung a a kawmah Lalpa chun hiti hin a tii, “Aigupta gama Pharaoh suok a a um lai u khan nanguh hun suonpa kawm akhan ka kilak hilo ahim?

²⁸ Chun, Israel phung chengcheng lak apat ka maichâm a va chieh a, gimlim hâla, ka ma a thiempu puonâk âk ding leh ka thiempu dingin amah chuh ka guot hilo ahim? chun, nanguh hun suonpa chu Israel te hâlmang thilpiek chengcheng ka pie hilo maw?

²⁹ Bang zieka ka umna mun a piek dinga ka guot, kei kawma kithawihna leh ka chanvo ding thilpiek chu na tawhden u a, kei sanga na chate na limbawl zawk a, nangmau kisukthauna dinga ka mi Israel te kithawihna a apha pha na mat uh ahim?” a ti a.

³⁰ Zieziekchun, Lalpa Israel te Pathien chun, “Ken na inkawte leh na pa inkawte chu kumkhuo’n ka masang ah um inlau ka na ti ngut a,” a ti a; himahlele, tuhin Lalpa chun, “Um hiel puo’n lau; ei limbawlte chu limbawl ing ka ting ei musitte chu ka ngaihnepte hiding ahi ngâl u a.

³¹ Ngaitie, na bân haw na pa inkawte bân haw ka tan ni chuh hungtung ding ei tai, na inkuon sung ah têkkûn dam himhim um puo’n au.

³² Pathien in Israel te hauhsakna a piek tieng leh lungdawng in thîkna mit in en in na tin; chun, na insung ah têkkûna dam himhim bangmah tikin um ta puo’n au.

³³ Chun, na mi ka maichâm apat ka satthak loh ding chu na mitthi luonna leh ahun sulungkham in pang ina: na In a hung pieng taphawtte chu a khangdawnglai un thi zel in au.

³⁴ Chun, zie hih nang dingin melchikna hi’n a, na chapate hih, Hophni leh Phinehas chunga thil hungtung ding chuh; ni khat sungin a nih un thi gêl gêl in au.

³⁵ Chun, thiempu ginum tak kei dingin tungding kit ing ka ting, amah chun ka lunggil leh ka lungthim tawh kituok in hih ina: chun insung det takin tungding ing ka ting, kumkhuo’n ka thau nuh ma achun um ina.

³⁶ Chun, hiti hi hung hi’n tin, na insungmi hing-le-dama um sunsun te chu paisa leh chângthâk ngên in a kawmah hung intin uh, zah taka kun in Chângthâk neucha bêk nek ding ka muh theihna dingun thiempu na ei sepsak un, ti’n au a tih ahi,” a ti a.