1 SAMUEL 18 - PATHIEN LEKHABU THIENGTHO (BSI)

David leh Jonathan

¹ Chun, hiti hi ahi a, Saul kawma thu a gen zawh phet chun Jonathan hinna leh David hinna chu ahung kizawp mat chet zieng ta a, tichun Jonathan chun amah hinna a hehpih bang takin a hehpih ta a.

² Chun, Saul chun zie ni chun a umsak ngâl ta a, a pa In ah a chiehsak phal ta puoh a.

³ Khutichun Jonathan leh David chun thugawlh a siem u a, amah hinna bang taka a hehpih ziekin.

⁴ Chun, Jonathan chun a puon silh lai a hawk a, David a pie a, a gâlvan leh a chemzâm leh a thalpi leh a taigakna natieng in a pie ta a.

⁵ Chun, Saul in a sawlna ta phawt ah David chu a chieh seka kitûp takin a tawi seka; tichun, Saul in galdo mite chunga lawiupa’n a siem a, zie chu mi chengcheng ngaih leh Saul suokte ngaih in le a pha mah mah a.

⁶ Chun, hiti hi ahi a, Philistia pa that a David a hungkit nunga In zuona a hung phetin Israel khuo chengah numei haw chu la sa leh lam kawmin khuongneu leh thil githei haw keng in leng Saul muok dingin ahung pawt u a.

⁷ Chun, numei haw chu lam kawm in, “Saul in a sang a sang in a that a, David in a sing a sing in a that hi,” ti’n la’n a kidâwng u a.

⁸ Chun, Saul chu a lungna mah mah a, thu kigen chun a sukipak hiel puoh a; “David chu a sing lam a that in a ngai u a, kei vang chu a sang lam chauh a that in ei ngai u a: lalgam tih loh ngâl bang danga a neih beh ding um nalai?” a ti a.

⁹ Khutichun Saul chun zie ni a kipat chun David chu a mu nuom ta puoh a.

Saul in David Thah a Guotna

¹⁰ Chun, hiti hi ahi a, a zing chun Saul chung achun Pathien apat thagau phalo chu ahung tung ta a, In sung achun a buoi vengvung zieng ta a; chun, David chun ni danga a hih sek guolin kingkang a tuma; Saul chun tiengcha khat hih a vawp zinga.

¹¹ Chun, Saul chun tiengcha chu a vak lâma, “Bang tawh aw, David ka kilhden chawt,” a ti a. Chun David chun nihvei hiel a pêl tha ta a.

¹² Chun, a kawma Lalpa a um ziek leh Saul chu a nutsieh ziekin Saul chun David chu a lau a.

¹³ Zieziekchun Saul in a kawma pat in a chawndawka, sepaih sang khat chung a lawiupa’n a siem a; chun, David in sepaihte ma chu a pui sek a.

¹⁴ Chun, David chu a thilhih ta phawt ah a lawhting mah mah a, a kawma Lalpa a um ziekin.

¹⁵ Chun, Saul chun a lawhtin theih zie a muhin a lau ta a.

¹⁶ Ahih ziekin Israel te leh Judate chengcheng chun David chu a ngaina mah mah u a, a lak u a lut sek pawt sek ahih ziekin.

Saul Chanu tawh David Kichênna

¹⁷ Chun, Saul in David kawmah, “Ngaitie, ka chanu upazaw Merab hi na zi dingin hun pie’ng ka ting; hangsan takin ei panpih phawt mai inla, Lalpa kidona haw chu do in,” a ti a. Saul chun, “Ka khut chu a chunga thâk hi kihen la Philistia te khut chu thâk hizaw hen,” a ti a a ngaihtuoh ziekin.

¹⁸ Chun, David chun Saul kawmah, “Kuo ka hi a, chun Israel gam ahin ka inkawte leh ka pa inkawte chu bang a hiua ahi lengpa mâkpa ka va hih zieng na ding chuh?” a ti a.

¹⁹ Ahih ziekin hiti hi ahung hi a, Saul chanu Merab chu David kawma piek hun ahung hih phet chun Meholath mi Adriel zi dinga piek ahi zaw ta a.

Saul Chanu Mikal in David a Hehpih

²⁰ Chun, Saul chanu Mikal chun David chu a hehpih a; Saul chu a hilh u a; zie chun a sukipak a.

²¹ Chun, Saul chun, “A awkna thâng ahung hih theihna ding leh Philistia te’n a chunga khut a thâk theihna dingun amah hi pie ding ka,” a ti a. Zieziekchun Saul chun a nihvei na dingin David kawmah, “Tuni hin ka mâkpa hiding na hi,” a ti a.

²² Khutichun Saul chun a suokte chu thu a pie a, “A gûk in David hopih unla, ‘Ngaitie, lengpa chu na chung ah a kipâk mah mah a, a suokte chengcheng inle ahun hehpih ui; zieziekchun lengpa mâkpa’n um in,’ tiu in,” a ti a.

²³ Chun, Saul suokte chun zie thu haw chu David a hilh u a. Chun, David chun, “Mi chagah leh kuomah ngaihsan mang loh kei tawbang ding hin lengpa mâkpa va hih chu thil baihlam hi’n na heu a ahim?” a ti a.

²⁴ Chun a suokte chun, “David in hiti hin a tii,” ti’n Saul a hilh u a.

²⁵ Chun, Saul chun, “David kawmah hiti hin tiu in, ‘Lengpa chun lengpa melmate phuba lâkna dingin Philistia te zek vun zakhat tihloh chu man bangmah a deih puoi,’ tiu in,” a ti a. Saul chun David chu Philistia te khut ah thi leh tih a lunggulh pên ahi ngâl a.

²⁶ Chun, a suokte’n zie thu haw chu David a hilh phet un lengpa mâkpa hih ding chu David a lawp ten ta a. Chun, ni tiem chu a tun ma’n.

²⁷ David leh a mite chu a kipan u a, Philistia te zanih a va that u a; chun David chun a zek vun uh ahun chawia, khutichun lengpa mâkpa ahih theihna dingin lengpa chu kimtak in a pie a. Khutichun Saul chun a chanu Mikal chu zi’n a neihsak ta a.

²⁸ Chun, Saul chun David kawm achun Pathien a um hi tih a hechien ta a; chun Saul chanu Mikal chun amah chu a hehpih a.

²⁹ Khutichun, Saul chun David chu a hah lauh zaw diek ta a; Saul chu David melma ahi zing zieng ta a.

³⁰ Khutichun, Philistia miliente chu kido dingin ahung kipan sek u a; chun, hiti hi ahi a, a hung kipat cheng u leh Saul suokte chengcheng sangin David chu a lawhting zaw sek a; khutichun a min chu ngaihsan mah mah a hung hi ta a.