1 SAMUEL 16 - PATHIEN LEKHABU THIENGTHO (BSI)

Samuel in David thau a Nuhna

¹ Khutichun, Lalpa chun Samuel kawmah, “Israel te leng dinga ka deih tâk loh Saul ziek hin bang chana na lungkham ding? Na saki chu thau thun dim inla, chieh in, Bethlehem mi Jessai kawma hun sawl ding ka hi; a chapate laka khat leng dinga ka tel tâk ziekin,” a ti a.

² Chun, Samuel chun, “Bangti’n ahim ka chieh theih ding? Saul in he leh ei that zieng ding ahi” a ti a. Chun, Lalpa chun, “Bâwngla kai inla, ‘Lalpa kawma kithawi dinga hung ka hi’, ti’n la.

³ Chun, kithawihna achun Jessai chu chiel inla, na hih ding chu hun hilh ing ka ting; chun a min ka hun hilh ding pên chu thau ei nuh sak in,” a ti a.

⁴ Tichun Samuel chun Lalpa thupiek chu a hih a, Bethlehem achun a chieh ta a. Chun, khuo a upate chun amah chu kilîng kawmin a na muok u a, “Apha lam kawka hung na hi na’m?” a tiu a.

⁵ Chun, amah chun, “Apha lam kawk hi e! Lalpa kawma kithawi dinga hung ka hi; kisuthieng unla kithawihna ah hung un,” a ti a. Chun Jessai leh a chapate chu a suthiengtho a, kithawihna achun a chiela.

⁶ Chun, hiti hi ahung hi a, ahung phet u chun Eliab chu a na en a, “Lalpa’n thau a nuh chu a masanga um hih hitei ina,” a ti a.

⁷ Himahlele, Lalpa chun Samuel kawmah, “A mel ahim a sân lam ahim en ki’n la; amah hi chu ka deihloh ahi; Lalpa chun mihing et dân in a en puoh ngâla; mihing chun pawlam latdan a en sek a, himahleh, Lalpa chun chu lunggil a en zaw sek hi,” a ti a.

⁸ Chun, Jessai chun Abinadab a vak sama, Samuel masang achun a chieh saka. Amah chun, “Amah hi Lalpa tel chu ahi puoi,” a ti a.

⁹ Chun, Jessai chun Shammah a chieh sak kita. Chun, amah chun, “Amah hi le Lalpa tel pên chu ahi nai diek puoi,” a ti a.

¹⁰ Tichun, Jessai chun a chapate laka sagih Samuel masang achun a chieh saka. Chun, Samuel chun Jessai kawmah, “Lalpa’n ziehaw hi a tel puoi,” a ti a.

¹¹ Chun Samuel chun Jessai kawmah, “Zie hin na chapate a um kim kêi um?” a ti a. Amah chun, “A naupang pên a um nalaia, ngaitie, belam veng ahi,” a ti a. Chun, Samuel chun Jessai kawmah, “Va sap sak ah; a hung tun ma cheng ne theilo ding I hiu hi,” a ti a.

¹² Khutichun a va sap sak a, ahun puilut a. Amah chu san hit het zieng, mit hah hawih tak, melhawih tak mai ahi a. Chun, Lalpa chun, “Kipan inla, sathau nuh in; amah hi ahi,” a ti a.

¹³ Khutichun Samuel chun sathau bawm saki chu a la a, a suohpihte laka chun sathau a nuh a; tichun zie ni apat chun Lalpa Thagau chu David chungah nasatak in ahung tung ta a. Khutichun Samuel chu a kipan a, Ramah khuo ah a chieh ta a.

Saul kawma David Puihna

¹⁴ Chun, Lalpa Thagau chun Saul chu a pawtsan ta a, Lalpa apat thagau buok in amah chu a sugimthei pan ta a.

¹⁵ Chun, Saul suokte chun a kawmah, “Ngaitie, Pathien apat thagau phalo in a hun sukgimtheih ahi a.

¹⁶ Ka puu masanga um na suokte hi kingkang tum thiem mi va hawl dawk dingin thu ei pie’n la; chun Pathien apat thagau phalo na chunga a um tieng leh amah chun tum intin, chun hung pha zieng inla,” a tiu a.

¹⁷ Chun, Saul chun a suokte kawma chun, “A tum thiem mi chu ei hun ngaihtuoh sak unla, ka kawmah hun pui tau chuleh,” a ti a.

¹⁸ Tangvalte laka khat chun a dâwng a, “Ngaitie, Bethlehem mi Jessai chapa khat ka mu kha a, amah chu kingkang tum thiem tak, mi hangsan tak, kido mi, thugen thiem tak, melhawih tak ahi a; chun a kawma le Lalpa a um hi,” a ti a.

¹⁹ Khutichun Saul chun Jessai kawma chun mi a sawl a, “Na chapa David belam venga um chu ei hun sawl sak in,” a ti a.

²⁰ Khutichun Jessai chun sabiltung khat, chângthâk leh uain savun bawm dim puo leh kelno khat a la a, Saul piek dingin a chapa David chu a ken sak a.

²¹ Chun, David chu Saul kawmah ahung a, a ma ah a dinga: amah chun a na ngaina mah mah a, a gâlvan puo’n a pang ta a.

²² Chun, Saul chun Jessai kawmah, “David hi ka kawmah um hen, ka mit a tung bêkin,” ti’n thu a thâk a.

²³ Chun, hiti hi ahung hi a, Pathien apat thagau phalo chu Saul chunga aum cheng leh David chun kingkang a la a, a tum sek a: Khutichun Saul chu ahung halh a, a pha kit seka; chun, thagau phalo chun a pawtsan sek a.