1 SAMUEL 15 - PATHIEN LEKHABU THIENGTHO (BSI)

Amalek te dona

¹ Chun, Samuel chun Saul kawmah, “Lalpa’n a mite Israel te chunga leng hidinga thau hun nuh dingin ei sawl ahi kha; zieziekchun, tuhin Lalpa thugen hi ngaitha’n.

² Sepaihte Lalpa chun, Amalek te’n Israel te chunga a thilhih uh, Aigupta gam apat ahung pawt lai u a a na dal dân hawu kha ka hezing hi.

³ Amalek te do dingin chieh inla, a thil neih chengcheng uh sit himhim nei lo in nuoichimit suok kêi in; pasal leh numei, nausen leh nawicheplai, bâwngchal leh belam, sangawngsau leh sabiltung that suok kêi in, a tih ahi,” a ti a.

⁴ Khutichun Saul chun mipite chu a sam khawm a, Telaim khuo ah a sima, sepaih nuoinih leh Juda mi singkhat ahiu a.

⁵ Chun, Saul chu Amalek te khawpi khat a va tunga, ana lambut dingin guom ah ana châng a.

⁶ Chun, Saul chun Ken te kawma chun, “Hung pawt unla, Amalek te lak apat hin kikiengkawih un, dân leh hun that khawm kha kha’ng ka: nangun vang Israel te Aigupta gam apat ahung pawt u khan na na khawtuoh ngâl u a,” a ti a. Khutichun, Ken te chu Amalek te lak apat a pawt tau a.

⁷ Khutichun, Saul in Amalek te chu Havilah apat Aigupta suohlam a um Shur tiengin a zo a.

⁸ Chun, Amalek te lengpa Agag chu a hing in a mana, mipite chu chemzâm in a satlum suok kêi a.

⁹ Himahlele Saul leh mipite chun Agag chu a hinghawih u a, belam laka athau pha pha, bâwngchal laka a hawih-hawih, athau-thau, belamno haw, chun, apha taphawt, ziehaw chu a that chimit nuom puou a: aphalo leh a deihloh tak phawt u vang chu a that suok kêi u a.

¹⁰ Ziephet chun Lalpa thu chu Samuel kawmah ahung tung a,

¹¹ “Saul lenga ka na siem chu ka kisik ahi; ei zuihna apat a a kinunghei a ka thupiekte a zawp loh ziekin,” a ti a. Chun, Samuel chu a lungna a, zankhuo’n Lalpa chu a sama.

¹² Chun, zingkal a Saul kimuhpih dingin Samuel chu matak in a tho a; chun, “Saul chu Karmel ah ahung a, chun, ngaitie, amah dingin hetzingna suong a phut a, chun, a vaikit a, a chieh zela, Gilgal ah a chieh suk tai” ti’n Samuel chu hilh ahi a.

¹³ Chun, Samuel chu Saul kawmah a hung a; Saul chun a kawmah, “Lalpa’n vang hun pie hen, Lalpa thupiek chu ka hih tai” a ti a.

¹⁴ Chun, Samuel chun, “Aleh, belam hâm git ka bil a hunglut leh bâwngchal hâm git ka vak zak haw khu bangti dân ahi ta leh?” a ti a.

¹⁵ Chun, Saul chun, “Amalek te a a hun lak uh ahi; Lalpa na Pathien kawma kithawihna dinga mipite’n belam pha pha leh bâwngchal pha pha a hinghawih uh ahi; adang chengcheng chu ka that chimit suok kêi ui,” a ti a.

¹⁶ Ziephet chun Samuel chun Saul kawmah, “Khawngai in, thangni zan a Lalpa’n ka kawma thu a gen khah hun hilh ing ka,” a ti a. Amah chun a kawmah, “Gen ta leh,” a ti a.

¹⁷ Chun, Samuel chun, “Nang ngaih in mi neucha himahleh chin le, Israel namte luchang dinga siem hilo na hi? Chun, Lalpa chun Israel te leng dingin sathau a hun nuh a;

¹⁸ Chun Lalpa chun, ‘Chieh inla migilote Amalek te chu nuoichimit inla, a manthai suok kêi masangsieh un do zel ah’ ti’n a hun sawl a.

¹⁹ Bang zieka Lalpa thu chu zui lo a, gâllâk thil chu a bawh a na bawh thawh a, Lalpa mitmuh a thil phalo hih na him?” a ti a.

²⁰ Chun, Saul chun Samuel kawmah, “Lalpa thu chu ka zui a, Lalpa ei sawlna lam achun ka chieh.a Amalek lengpa Agag ka hun mana, Amalek te chu ka nuoichimit kha la!

²¹ Ahih ziekin mipite chun gâllâk thil sukmangthai ding laka apha pha belam leh bâwngchal haw chu Gilgal a Lalpa na Pathien kawma kithawihna dinga ahun lak uh ahi,” a ti a.

²² Chun, Samuel chun, “Lalpa thu zuih a a kipah guolin hâlmang thilpiek leh kithawihna haw hi Lalpa’n a kipahpih a ahim? Ngaitie, kithawihna sangin thu-awih a phazaw a, belamchal thau sangin a thu awihna chu a phazawi.

²³ Helna hi phunsan a gitlohna tawh a kibanga, lochalna hi milim ho leh manlohna tawh kibang ahi. Lalpa thu na deihloh ziekin ama’n le leng dingin a hun deih diek ta puoi,” a ti a.

²⁴ Chun, Saul chun Samuel kawmah. “Thil gilo hih kha ka na hita hi: Lalpa thupiek leh na thu chu ka na bawhsie ahi tai; mipite ka lau a, a thuu ka na zuih ziek ahi.

²⁵ Khutichun ka gitlohna ngaidam inla, Lalpa ka ho theihna dingin ei vaihkit pih in,” a ti a.

²⁶ Chun, Samuel chun Saul kawmah, “Hun vaihkit pih hiel puo’ng ka; Lalpa thu chu na deih puoh ngâla, chun, Lalpa’n le Israel te leng dingin ahun deih diek ta puoi,” a ti a.

²⁷ Chun, Samuel chu chiehmang dinga a vak kihei leh Saul in a puonmawng a tu a, a ek ta a.

²⁸ Chun, Samuel chun a kawmah, “Tuni apat hin Lalpa’n Israel gam hi ahun lâksak ta a, nang sanga phazaw na invengpa a pie tai.

²⁹ Israel te lopina Pathien chu a lepchieh puoh a, a lungthim le a sang diek puoi. Mihiem a hi puoh a, a lunggel le a sang lam dang diek puoi,” a ti a.

³⁰ Khutichun amah chun, “Ka hihkhiel kêi tai: himahlele ka mipite upate leh Israel te ma a ei zahbawl dingin ka hun ngên hi; chun, Lalpa na Pathien ka ho theihna dingin ei vaihkit pih hâm in,” a ti a.

³¹ Khutichun Samuel chun Saul chu a vaihkit pih ta a, chun, Saul chun Lalpa chu a ho ta a.

³² Ziephet chun Samuel chun, “Amalek te lengpa Agag chu ka kawmah hun pui un,” a ti a. Tichun Agag chu a kawmah maitai takin a va chieh a. Chun Agag chun, “Thihna chu akipel hitei ta’n a,” a ti a.

³³ Chun, Samuel chun, “Na chemzâm in numei haw cha beia a siem guolin na nu le numei laka cha bei hi’n a,” a ti a. Khutichun, Samuel chun Agag chu Gilgal a Lalpa ma ah a sat nêl dimdem ta a.

³⁴ Chun, Samuel chu Ramah khuo ah a chieh ta a; chun Saul chu a umna khuo Gibeah a a In ah a chieh to ta a.

³⁵ Chun Samuel chun a thihni tiengin Saul chu a kimuhpih kit ta puoh a, ahih ziekin Samuel chun Saul chu a lungkham pih a: Chun, Israel te leng dinga Saul a na siem chu Lalpa a kisik hi.