1 SAMUEL 14 - PATHIEN LEKHABU THIENGTHO (BSI)

Jonathan in Philistia te a Dona

¹ Chun, hiti hi ahi a, ni khat chu Saul chapa Jonathan chun a gâlvan chawipa tangval kawm achun, “Hung tie, gal lehlam a Philistia sepaihte panmun akhun va chieh dii ti,” a ti a. Himahlele a pa chu a hilh puoh a.

² Chun, Saul chu Gibeah daikieng a Migron muna vaimimthei kung nuoi ah a um a: chun a kawma mi umte chu zagup vel ahiu a;

³ Shiloh a Lalpa thiempu Eli chapa Phinehas chapa Ikabod suohpihpa, Ahitub chapa Ahijah chule thiempu puonâk âk in zie chun a um a. Chun, Jonathan chieh lam himhim chu kuoma’n a he puou hi.

⁴ Chun, Philistia sepaihte panmun zuona Jonathan chiehna guom pang tuok achun suongpi bawl lekluk a um a: khat min chu Bozez ahi a, khatzaw min chu Seneh ahi.

⁵ Suongpi khat chu Mikmas zawna mâllam panga a um ahi a, khatzaw chu Geba zawn simlam panga um ahi.

⁶ Chun, Jonathan chun a gâlvan chawipa kawm achun, “Hung tie, zektan loh haw sepaihte umna akhun va chieh dii ti; Lalpa’n ei dingin thil a hih mawh die; atam ahim atawm ahim manga hukdam dingin Lalpa chu bangmah cha’n a dal thei puoh ngâla,” a ti a.

⁷ Chun, a gâlvan chawipa chun a kawmah, “Na lungthima a um dân takin hih zieng ah: ngaitie, na lungthim tawbang mah chu kei lungthim le ahi,” a ti a.

⁸ Khutichun Jonathan chun, “Ngaitie, a kawm lam u a khun chieh kai hiting, va kimuhsak hiti.

⁹ Chun, I kawma, ‘Na kawm uh a ka hung masang sieh uh ana khawngai tadih u,’ a tih u chun I umna mun ahin ding zing mai hiting, a kawm u ah chiehto se puoi ti.

¹⁰ Ahihziekin, ‘Kei u kawm lam ahin hung to u’ a tih u chun va chiehto hiting, zie chuh Lalpa’n I khuta ei piek ahi tai tih melchikna hi’n a,” a ti a.

¹¹ Chun, a nih un Philistia sepaihte panmun a umte chu a va kimuhsak u a: chun, Philistia te chun, “Entiem u, Hebraite a kiselnau leihawm apat ahung pawt veu,” a tiu a.

¹² Chun, gâlveng sepaih panmun a umte chun Jonathan leh a gâlvan chawipa chuh, “Ka kawm u ah hung to unla, thil khat hun na etsak ing kau,” ti’n a na gal sap u a. Chun, Jonathan chun a gâlvan chawipa kawm achun, “Ei hun zui to ah; Lalpa’n amau khu Israel te khuta a piek ahi tai” a ti a.

¹³ Khutichun Jonathan chu khut leh keng pan in a kalto a, a gâlvan chawipa chun a zui a; chun amau chu Jonathan ma achun a puk zung zung u a, a gâlvan chawipa chun ahun that zel a.

¹⁴ Khutichun Jonathan leh a gâlvan chawipa’n a thah masak pên niu chun buh tin kimkhat vel tuhna ding mun ah mi sawmnih vel a that u a.

¹⁵ Chun, sepaih panmun a umte, mun zânga umte leh mipite chengcheng chu a mawk lauh tau a; chun, gâlveng sepaihte leh lamthamte nasan chule a kithing u a; lei a lîng a; khutichun mawk lauhna nasatak ahung hi ta a.

Philistia te Zawhna

¹⁶ Chun, Benjamin gama Gibeah a Saul sepaih gâlvengte chun a vak gâl et u leh, ngaitie, mipite chu kibawhpai lem lum khawp in lehlam lehlam ah a taizak gui gui mai tau a.

¹⁷ Khutichun Saul chun a kawma mipite kawm achun “Kisim tiem u, kuo I hiu em a kimlo,” a ti a Chun, a vak kisim u leh ngaitie, Jonathan leh a gâlvan chawipa chu a na um ta puou a.

¹⁸ Chun, Saul chun Ahijah kawmah “Pathien bawm chu va la tie,” a ti a. Zielai chun Pathien bawm chu Israel te kawma um ahi a.

¹⁹ Chun, hiti hi ahi a, Saul in thiempupa a hopih zing lai chun Philistia te panmun a a buoinau chu a khawk deuh deuh ta mai a; chun Saul chun thiempupa kawm achun, “Na khut ladawk ah ‘Kisalah ta ki’n’ Pathien dawt buoina ding hun a um ta puoi tihna ahi,” a ti a.

²⁰ Khutichun Saul leh a kawma mipi umte chengcheng chu a chieh khawm u a, kidona achun a chieh tau a; chun, ngaitie, amau leh amau chemzâm in a kisattuoh lak lak zieng tau a; a buoi in a pheng buoi tau a.

²¹ Tuma lam cheng Philistia te lama a na pang, a giehmun u a le a na chieh, Hebraite chu Saul leh Jonathan kawma um Israel te lam ah a pang tau a.

²² Zie tawbang mah chun Ephraim tâng gama Israel mi kiselgute chengcheng khan le Philistia te a taisieu hi tih a hun het phet un, kidona a chu hung pang in hah delh in a delhzui pih tau a.

²³ Khutichun zie ni chun Lalpa’n Israel te chu a hukdawk a, Bethaven khel lam tung hielin a kido pek tau a.

Jonathan Khuoizu Nêkna

²⁴ Chun, zie ni chun Israel te chu a chau mah mah u a; Saul in, “Ka melmate chunga phuba ka lak masangsieh leh nitâk lam ahih maa kuon le an a nek chun hansiedawl in um hen” ti a mipite chu a na kihâksiel ziekin; mipite chun an himhim tep le a tep puou a.

²⁵ Chun, mipite chengcheng chun gamlak ahun phau a; tuol achun khuoizu a na um a.

²⁶ Chun, mipite chu gamlaka a lut phet un, ngaitie, khuoizu chu a put chepchup mai a; himahlele kuoma’n a ne puou hi; mipite chun kihâksielna chu a lauh ziekun.

²⁷ Himahlele, Jonathan chun a pa’n mipite chu kihâksiel hiela a na vau lam a he puoh a; khutichun a tiengkhut mawng chun khuoiphang chu a vak suna, a ne ta a; tichun a mit-hah ahung khauh deuh ta a.

²⁸ Ziephet chun, mipi laka mi khat chun a hopih a “Na pa’n mipite hih, ‘Tuni a an ne taphawt chu hansiedawl in um hen’ ti’n a na vau a,” a ti a. Chun, mipite chu a chau mah mah mai u a.

²⁹ Khutichun Jonathan chun, “Ka pa hin mipite hi a na suklungkham maimai ahi hi uo; en tau u, khuoizu neuchakhat ka vak tep leh ka mit-hah a lamzang deuh zieng hila.

³⁰ Mipite hin melmate thil a lâksak ta phawt uh a nawp nawp un ne thei vang vang leu chu a hah phat zawk na ding e; ziezieka chu Philistia te hi I thah tam theih loh lawh uh ahi hi,” a ti a.

³¹ Khutichun zie ni chun Mikmas apat Aijalon tiengin Philistia te chu a nawh zel u a; chun, mipite chu a châwl mah mah tau a.

³² Khutichun mipite chun a gâllâk thil hawu chu a bawh in a bawh thawh zieng tau a, belam haw, bâwngchal haw, bâwngno haw a man u a, a matna mun mun u ah a that u a; mipite chun thisan pum in a ne tamai u a.

³³ Khutichun “Ngaitie, mipite chun thisan puma ne’n Lalpa chungah thil a hihkhiel tau hi,” ti’n Saul chu a hilh u a. Chun, amah chun, “Thil na hihkhiel tau hi; zie hin suong lientak ei hun lik sak un,” a ti a.

³⁴ Chun, Saul chun, “Mipite lak ah kithehdalh unla, a kawm u ah, ‘Mi chengin a bâwng u leh a belam uh ka kawmah hun kai u henla that u henla neu hen; thisan puma ne a thil hihkhiel lo in, a tii’ va tiu in,” a ti a. Chun zie zan chun mi chengcheng in a bâwngchal uh a hun kai chiet u a, zie chun a that u a.

³⁵ Chun, Saul chun Lalpa dingin maichâm a siem a; zie chu Lalpa dinga maichâm a siem masak pên ahi.

³⁶ Chun, Saul chun, “Zan in Philistia te va do hiting un, zingkal khawvak chanin chawm hitiu, khatchale sit puoi tiu,” a ti a. Chun, amau chun, “Pha na sak bang zelin hih in” a tiu a. Himahleh, Thiempu chun, “Hitih lai hin Pathien naih tadih phawt hitiu ie,” a ti a.

³⁷ Chun, Saul chun “Philistia te ka va do ding um? Israel te khut ah na pie die?” ti’n Pathien a dawng a. Himahlele, zie ni chun a dawng puoh a.

³⁸ Chun, Saul chun, “Nang haw mipite lawiupa cheng chengte, zie hin hung tiem u; tuni hin bang gitlohna ahim I bawl uh tih hetdawk guou in.

³⁹ Israel te hukdam sek pa Lalpa hinna sâm in ka gen hi, ka chapa Jonathan thilhih ziek na hi le le, a thih tei ding ahi,” a ti a. Himahlele mipite lak achun khatchale amah dawng a um puou a.

⁴⁰ Khutichun Israel te chengcheng kawm achun, “Nang u haw a chuom in umkhawm unla, chun, kei leh ka chapa Jonathan hi a chuom in um ing kau,” a ti a. Chun, mipi chun Saul kawmah, “ Pha na sak bang bangin hih in,” a tiu a.

⁴¹ Zieziekchun, Israel te Lalpa Pathien kawm achun, “A diktak hun sulang in,” a ti a. Chun, a phunsân u chu Saul leh Jonathan chungah a chu a; mipite chu vang a suokchau a.

⁴² Chun, Saul chun, “Kei leh ka chapa Jonathan khenna dingin phunsân un,” a ti a. Tichun Jonathan chung achun a chu ta a.

⁴³ Khutichun Saul chun Jonathan kawm achun, “Bang a na hih ei hilh in,” a ti a. Chun, Jonathan chun “Ka mawlh chawih mawng in khuoizu chu neukhat ka tep ngêi mai a; ngaitie, ka thih tei ding ahi,” a ti a.

⁴⁴ Chun, Saul chun, “Pathien in a lawh lawh ei lawh mai hen, zie sanga nasa zaw chun le; na thih tei tei ding ahi, Jonathan,” a ti a.

⁴⁵ Chun, mipite chun Saul kawm achun, “Israel te laka zie hukdamna lopitak siempa Jonathan hi maw a thih ding? Himaizen lo e! Lalpa hinna sâlin ka gen ui, a samzang khatchale tuol ah kie puo’n a: tuni hin Pathien a seppih ahi hi” a tiu a. Khutichun mipite chun Jonathan chu thilo dingin a hukdawk tau a.

⁴⁶ Ziephet chun Saul in Philistia te a delh chu a haihsan ta a; chun, Philistia te chu amau mun lam ah a chieh tau a.

⁴⁷ Khutichun Israel te chunga lenga a hung pan phetin Saul in kiltina a melmate, Moab te, Ammonte, Edom te, Zobah lengte, Philistia te chengcheng chu a do a; a ngatna lam taphawt chu a zo zel mai a.

⁴⁸ Hangsan takin a do a, Amalek te chu a zo a, Israel te chu amau buluh sekte khut apat in a hukdawk ta a.

⁴⁹ Saul chanute nih min chu ziehaw hi a hiu; a upa zaw min chu Merab ahi a, a naupang zaw min chu Mikal ahi:

⁵⁰ Chun, Saul zi min chu Ahinoam, Ahimaaz chanu ahi. Chun, a sepaih lawiupa min chu Abner, a paneu Ner chapa, ahi.

⁵¹ Chun, Kish, Saul pa leh Ner, Abner pa, chu Abiel chapa ahiu hi.

⁵² Khutichun, Saul damsung chengcheng chun Philistia te tawh nasatak mai in a kido sek u a; chun, Saul chun mi thahat ahim, mi hangsan ahim a muh taphawt chuh a la zel sek hi.