1 SAMUEL 13 - PATHIEN LEKHABU THIENGTHO (BSI)

Philistia mite tawh Kidona

¹ Chun, Saul chu leng a hung hihin kum sawmthum ahi a; chun, Israel te chungah kum sawmnih vai a hawma.

² Chun, Saul chun Israel mi sangthum a teldawk a; sangnih chu Mikmas leh Bethel tâng gam ah Saul kawmah a um u a, chun sangkhat chu Benjamin gama Gibeah ah Jonathan kawmah a um u a, chun, adang chengcheng chu a In lam chiet u ah a sawl kit veka.

³ Chun Jonathan chun Geba a Philistia sepaihte chu a do a; chun Philistia te chun a hun he tau a. Tichun Saul chun “Hebraite khan heu hen,” ti’n gamsung chengcheng achun pengkun a mût viel saka.

⁴ Chun, Israel te chengcheng chun Saul in Philistia sepaihte a do hi tih leh Israel te chu Philistia te’n a mudah ui tih thu haw chu a hun he tau a. Khutichun, mipite chu Gilgal a Saul kawmah sapkhawm ahiu a.

⁵ Chun, Philistia mite chu Israel te do dingin a kikhawm khawm tau a; kidona kangtalai singthum, sakawl chung chuthiem sang gup leh sepaih tuisuohgiet panga pîlnel zah hiela tam ahiu a: a hung kuon to u a Beth-aven suohlam a Mikmas ah panmun a khawh tau a.

⁶ Chun, Israel te chu nawhdawng in a um ui tih a kihet phet u chun, (mipite chu a lungdawng mah mah ngâl u a) mipite chu kâwlhâwm haw, hambawk lak haw, suongpi pang haw, kulh haw, kawkhuk haw poh ah a kisel u a.

⁷ Hebrai mi khenkhat vang chu Jordan kan in Gad leh Gilead gam ah a tai u a; Saul vang chu Gilgal ah a um zinga, mipite chun lau a kilîng kawmin a zui uh a.

⁸ Samuel in a na guot dungzui in ni sagih a na ngaka; himahlele Samuel chu Gilgal achun a hung ta puoh a; tichun mipite chun a taihzak san tau a.

⁹ Chun, Saul chun, “Hâlmang thilpiek leh chamna thilpiek haw chu zie hin ka kawmah hun lau in,” a ti a. Khutichun hâlmang thilpiek chu a pie tau a.

¹⁰ Chun, hiti hi ahi a, hâlmang thilpiek a piek zawh tak chun, ngaitie, Samuel chu a hung ta a; chun, Saul chu chibai bûk ding a a na lamtuoh dingin a chiehdawk a.

Pathien in Saul a Deihlohna

¹¹ Chun, Samuel chun, “Bang ana hih na hi ta?” a ti a. Chun, Saul chun, “Mipite chun ei chiehmang san tau a, nang chulah ni tep sung chun na hung ta puoh a, chun Philistia te chulah Mikmas ah a kikhawm khawm luilui zieng tau a.

¹² Zieziekchun, ‘Philistia te chun Gilgal a ei hun do zieng ding ahi ta ngâl un, Lalpa deihsakna ka na ngên nai ngâl puo’n’ ka ti a. Zieziekchun hâlmang thilpiek chu pie lo thei in ka kihe puoh a ahi,” a ti a.

¹³ Chun, Samuel chun Saul kawm achun, “Na thilhih dân hi ngawlhuoi tak ahi: Lalpa na Pathien in thu a hun piek hi na zui lo ahi: Lalpa chun Israel te chung ahin na lenggam kumkhuo a dinga sukdet guo ahi a.

¹⁴ Himahlele, na lenggam chu bei ta’n a; Lalpa’n thu ahun piek na zuih loh ziekin Lalpa chun amah lunggil bang pu mi a hawla; amah chu a mipite chunga leng dingin Lalpa’n a guot tai,” a ti a.

¹⁵ Chun. Samuel chu a kipana, Gilgal apat chun Benjamin gama Gibeah khuo ah a va chieh ta a. Chun, Saul chun a kawma mipi umte chu a sima zagup vel ahiu a.

¹⁶ Saul leh a chapa Jonathan leh a kawmuh a mipi umte chu Benjamin gama Geba khuo a chun a um u a; himahlele, Philistia mite chun Mikmas achun panmun a khawh u a.

¹⁷ Chun, Philistia te sepaih haw panmun apat in hawn thum ahung pawt uh a: hawn khat chun Shual gama Ophrah a zuon u a;

¹⁸ Chun, hawn khatte chun Beth-horon a zuon u a; chun, hawn dangte chun gamthip lama Zeboim guom vak suk et gamgi lam a zuon u a.

¹⁹ Israel gam pumpi achun thiksek himhim a um puoh a; Philistia te chun, “Hebraite’n chemzâm ahim, tiengcha ahim kisêk kha’n au,” a na ti hiel uh ahi.

²⁰ Himahlele Israel te chu a leilehna thik teu a tucha teu a heicha teu leh a kawite teu tat-hiem sak dingin Philistia te kawmah a chieh suk sek u a;

²¹ Chun, leilehna thik leh tucha tat-hiem chu sekel khat mun thuma khen a mun nih ahi a, chun, heicha tat-hiem man leh tiengkhut mawng a thikzum bulh man chu sekel khat mun thuma khena mun khat ahi.

²² Khutichun a kido niu chun Saul leh Jonathan kawma um mipite chu chemzâm ahim tiengcha ahim chawi himhim a um puou a; Saul leh a chapa Jonathan mai chun a nei u a.

²³ Chun, Philistia sepaih hawn khat chu Mikmas a guom achun a chieh u a.