1 SAMUEL 12 - PATHIEN LEKHABU THIENGTHO (BSI)

Samuel Kithakna Thugen

¹ Chun, Samuel chun Israel mipite chengcheng kawm achun, “Ngaitiem u, ka kawma na thugen chengcheng uh ka ngaitha a, leng ding chu ka hun siem sak ta a.

² Tuhin ngaitiem u, leng chun na mau a pui ta a: kei chu ka têk in ka sam le a kângzo ta a: chun, ngaitiem u, ka chapate chu na kawm u ah a um u a; ka tangval tûng apat tuni chan hin na mau ka na pui a.

³ Ngaiun, zie hin ka um hi: Lalpa leh sathau a nuh pa masang ahin ka phatlohna gen tiem u le; Kuo bâwngchal ka chuh kha? Kuo sabiltung ka chuh kha? Kuo ka dawha bawl kha? Kuo ka pawngbawl kha? Ka mit ei sukdûk sak dingin kuo khut apat gawlhgukna ka la kha? Hun pekit vek ing ka,” a ti a.

⁴ Chun, amau chun, “Nei dawha bawl kha puoh a, nei sugimthei kha puoh a, kuomah khut apat in bangmah na la kha puoi,” a tiu a.

⁵ Chun, amah chun a kawm u ah, “Ka khut ahin bangmah kilawmlo na mu puou hi tih tuni hin Lalpa chu na lak u ah hetpihpa ahi a, thau a nuh pa chule hetpihpa ahi,” a ti a. Chun, amau chun, “Amah chu hetpihpa ahi,” a tiu a.

⁶ Chun, Samuel chun mipite kawm achun, “Mosi leh Aron a na guota Aigupta gam apat na puteu a na puidawk chu Lalpa chu ahi apuo!

⁷ Zieziekchun tuhin thipkêi in ding unla, Lalpa masang ahin nang u leh na puteu chunga Lalpa’n thil a na hih dik sek zie thu chu hun sut pih ing ka.

⁸ Aigupta gama Jakob a lut nung khan, na puteu chun Lalpa a sam u a, tichun Lalpa’n Mosi leh Aron a sawl a; amau chun na puteu chu Aigupta gam apat in a puidawk u a, zie mun ahin a hun umsak ta a.

⁹ Himahlele Lalpa a Pathien u chu a hengilh u a; chun, amah chun Hazor sepaih lawiupa Sisera khut ah leh amau a na do Philistia te leh Moab lengpa khut ah a na zuok a.

¹⁰ Chun, Lalpa chu a sam u a, ‘Lalpa chu I kinungheisan u a, Baal haw leh Asteroth haw na ka nasep ziekun ka na gilo tau ahi: himahlele ka melmateu khut apat hi ei hukdawk inla, tichun na na sem ing kau,’ a tiu a.

¹¹ Chun, Lalpa chun Jerubaal leh Barak leh Jeptha leh Samuel a sawl a, chun kiltina na melmateu khut a pat in ahim hukdawk a, bit takin na um tau a.

¹² Chun Ammon suonte lengpa Nahash chu nanguh hun do dinga ahung na het phet un, Lalpa Pathien chu na lengpau ahi tih hezing ngâl in, ‘Ahi puoh ie, leng in ei vaihawm sak hen,’ na tiu a.

¹³ “Zieziekchun tuhin en un, na deih u leh na tel uh lengpa hi! Lalpa chun leng a hun siem sak na hi tau hi.

¹⁴ Lalpa chu na lauh u a, a na nasep uh a, a thu na awih u a, Lalpa thupiek haw na helsan loh uh a, nang haw leh na chung u a vaihawm na lengpau in Lalpa na Pathien u chu na zuih zawm zel u chun pha’ntin:

¹⁵ Himahlele, Lalpa aw chu ngaitha lo a Lalpa thupiek kalh a na hel u chun, na puteu in Lalpa khut a na thawk guol mah u khan nang un le thuok inlau.

¹⁶ Zieziekchun tuhin ding unla, Lalpa’n thil lopi tak na mit muh u a a hih ding hi a na en un.

¹⁷ Tuni hi buh-ât hun ahi paw maw? Van gitsak ding leh guoh zuk sak dingin Lalpa chu sam ing ka ting; tichun leng na nget u hi Lalpa mitmuh a nasa taka hihkhiel na hiu hi tih he’n na tin un, hun mu’n lau,” a ti a.

¹⁸ Khutichun, Samuel chun Lalpa chu a sama, Lalpa chun zie ni chun van a gitsak a, guoh a zuk sak a; tichun mipite chun Lalpa leh Samuel chu a lau mah mah tau a.

¹⁹ Chun, mipite chengcheng chun Samuel kawm achun, “Ka thih lohna dingun Lalpa na Pathien kawm achun na suokte dingin ngên in: zie thil phalo tak, leng ka na nget u hin ka gitlohna chengcheng uh behlap ka na hi tau hi,” a tiu a.

²⁰ Chun, Samuel chun mipite kawm achun, “Laukiu in, zie thil phalo tak hi na na hih ngut tau a, ahihziekin Lalpa na zuihnau apat hin petmang kiu inla, na lungthim chengcheng un Lalpa na chu sem zawu in;

²¹ bangmah a mattheihloh, hun panpih thei leh hun hukdawk thei le hilo zui in petsan kiu in, bangmahlo ahi ngâl u a.

²² Amin lopi tak ziek hin Lalpa chun a mite chu kilehheisan ding ahi puoh ngâla: A mite dinga hun siem chu Lalpa kipah lam tak ahi ngâla.

²³ Zie mai chule hilo in kei ding vangin, nang haw dinga paucham haihsan a Lalpa chunga gitlohna hih ding chu thil hithei lo hiel ahi; lampi pha leh dik chu hun kâwkmuh zel zaw’ng ka.

²⁴ Lalpa chu lau phawt mai unla, na lungthim chengcheng un tihtakzet in a na sem unla; nang u dinga thil thupi taktak a hih dân haw hi ngaihtuoh un.

²⁵ Ahih ziekin thil phalo tak na hih zel u chun, nang haw leh na lengpau le sukmangthai hin lau,” a ti a.