1 SAMUEL 11 - PATHIEN LEKHABU THIENGTHO (BSI)

Saul in Ammonte a Zawhna

¹ Khutichun Ammon mi Nahash chu a hung kuon a, Jabesh-gilead chu sim guon a huol ta a; chun, Jabesh mi chengcheng chun Nahash kawm achun, “Ka kawm u ah thu thun inla, tichun na na sem ing kau,” a tiu a.

² Chun, Ammon mi Nahash chun a kawm u ah, “Hiti hin ahi na kawm u a thu ka thun ding chu: na mit changlam chengcheng uh kheuhdawk vek ding hi’n tin; zie chuh Israel mi chengcheng a dinga minsietna hi’n a,” a ti a.

³ Chun, Jabesh khuo a upa haw chun a kawmah, “Israel gam pumpi a thupuo viel mi ka sawl theihna dingun ni sagih ei hungaih in; ti a chu ei hukdam ding kuomah a um loh chun na kawmah kipelut mai ing kau,” a tiu a.

⁴ Khutichun a misawlteu chun Saul umna khuo Gibeah chu a hungtung u a, mipite zak achun zie thu chu a gen u a; chun, mipite chun a awu a suoh u a, a kap u a.

⁵ Chun, ngaitie, lo apat in Saul chu bâwng hun hawi in ahung a; chun, Saul chun, “Bang a tiu a ahim mipi haw chu a kah uh?” a ti a. Chun, Jabesh khuo a mite thu gen chu a hilh u a.

⁶ Chun zie thu chu a hêt phet chun Saul chungah Pathien Thagau a hung tung a, nasatak in a lungna ta a.

⁷ Khutichun bâwng tuok khat a that a, a sa chu a sat nêl dimdem a, Israel gamsung pumpi achun a hawpzak saka, “Kuole Saul leh Samuel zui nuom lo taphawt chu a bâwng hiti a hi hih hi’n a,” ti’n. Khutichun mipite chun Lalpa chu a lau tau a, kithuguol takin a hung kuon dawk tau a.

⁸ Chun, Bezek mun achun a sima; Israel mite chu nuoi thum ahiu a, Juda mite chu singthum ahiu a.

⁹ Chun, a mi hun sawlteu kawm achun, “Jabesh-gilead mite kawm a chun, ‘Zing leh nisat huoisiet ma’n hukdawk hi’n lau’ va tiu in,” a tiu a. Chun, a mi sawlteu chu ava chieh uh a, Jabesh mite chu a hilh uh a, tichun a kipâk mah mah tau a.

¹⁰ Khutichun Jabesh mite chun, “Zing leh na kawm u ah hung kipielut ing ka ting un, ka chung u ah na nawp dân dân un hih mai un,” a tiu a.

¹¹ Chun, hiti hi ahung hi a, a zing chun Sawl chun mipite chu hawn thum in a siem a; chun, a zing phalvak hun lai tak in a giehmun u achun a lut u a, Ammon mite chu sun nisat lai tak chanin a that u a; chun, hiti hi ahi a, a thah mâwk teu chu a taizak vek u a, mi nih umkhawm himhim le a um puou hi;

¹² Chun, mipite chun Samuel kawmah, “Kuo ahiu em, Saul in ka chung u ah vaihawm ven ti uo ti khah? Ziete chu hun pui inla a na that ing kau,” a tiu a.

¹³ Chun, Saul chun, “Tuni khelkhel hin vang kuomah suklup ding ahi puoh ie; tuni hin Lalpa chun Israel te lak ah hukdamna a hun siem dawk ta ngâla,” a ti a.

¹⁴ Khutichun Samuel in mipite kawm achun, “Hung tiem u, Gilgal ah chieh hiting un, zie chun leng hihna hi namdet thak hitiu,” a ti a.

¹⁵ Khutichun mipi chengcheng chu Gilgal achun a chieh tau a; Saul chu Gilgal achun Lalpa ma ah leng in a siem: tau a; zie tak achun Lalpa ma ah chamna kithawihnate a pieu a; tichun zie chun Saul leh Israel mite chengcheng chu a kipâk mah mah mai tau hi.