1 PETER 5 - PATHIEN LEKHABU THIENGTHO (BSI)

Pathien Ganguolte

¹ Khutichun, na lak uh a sapchuom lawiupate chuh, kei, na upatpih uh, Krista thuokna hetpihpa leh, lopina hung kilang ding chanpih ding pa hin ka hun tîl na hiu hi.

² Na lak uh a Pathien belam hawn um chuh enkawl un; hih ding mawng a hih ziek hilo in, Pathien phasak lam dungzuia ut kawm zaw’n, lepna diklo deih ziek le hi diek lo in, sep utna lunggil nei kawm takin,

³ Pathien gochan haw chungah kilalsak lo in, belam hawn ettawn dingin kisiem zaw’n, lawi un.

⁴ Tichun, Belam Chingpa Lalpen chuh a hung kilak tieng leh, lopina lallukhuk, tuoi theilo chuh mu’n lau.

⁵ Khutibang mah in, nanguh tanglak deuhte haw; upate kawmah kitulut un. A hii, na bawn uh a kizen tuoh chiet dingin, nuoilutchuhna’n kivan un; Pathien in mi husiete a do a, kingainiemte vang chuh lungsietna a pie sek hi.

⁶ Zieziekchun, a phatcha a chuh nanguh a hun chawihsân theihna dingin, Pathien khut tha hattak nuoi achun nuoilutchuh un.

⁷ Ama’n a hun khawksak sek ziekin, na lungzînna cheng chenguh amah chungah nga vek un.

⁸ Pilkieu unla, khawthengai un! na kilanpih uh Diabol chun, keipi bakkai kitum sek bangin, a nek theih ding hawl in a kipei hethut sek hi.

⁹ Na suohpihteu, khawvel a um haw chungah le, khutibang thuokna chuh a tung sek hi tih he’n, dettaka taksang in, amah chuh do un.

¹⁰ Chun, lungsietna Pathien, a kumsawt lopina chang dinga Krista a nanguh hun sampa chun, chawmkhat na thuok nung uh leh, hun siempha bukim in, hun sudet in, hun suhat ina.

¹¹ Amah kawm achun kumkhuotuong in thilhih theihna chuh um hen. Amen.

Chibai bûkna

¹² Ka suohpihpa, taksanum taka ka ngaih, Silvanas kithuohpihna zalin, zie lehkhathawn chawmcha hi na kawmuh a ka hun zik ahi. Nang haw hun tîlkhoh nuom leh, ziehi Pathien hehpihna tak tak chuh a hii tih, ka hetpihna thu hun hilh ka nawp a hii. Ziehaw achun ding det un.

¹³ Babulon khuo a um, na sapchuom chanpih uh, nang haw guola Pathien ten dawkte hin a hun chibai ui; zie guol mah chun, ka chapa Mark hin le a hun chibai na hiu hi.

¹⁴ Krista lungsietna a kichawp in, khatlekhat kichibai un. Na lak uh a Krista a um ta chengte kawm achun chamna um hen.