1 PETER 3 - PATHIEN LEKHABU THIENGTHO (BSI)

Zi leh Pasal

¹ Khutibang mah in nanguh zite haw, nang mau pasalte kawmah kitulut chiet un; khutichun, a lak uh a kuole, Pathien thu taksang lo um mahleu, gen thawh hilo in, ginggek a na tawihzieu pha en in,

² Pathien taksang dinga zawhin um thei un au.

³ Na kicheinau chuh pawlam kicheina samphek leh, sana khi awhte, silhlechen a kivante hilo in,

⁴ Sunggil lama dikna, lunggil a kingaihniemna leh nunnem silhlechen sie thei lo a kivan chuh hi zaw hen, zie chuh Pathien mitmuh in lul mah mah a hi zaw ngâl a.

⁵ Khutibang mah in, malaia numei thiengtho, Pathien a kinemte kha le, a pasalteu thu thu a nung in, a kichei sek ui;

⁶ Sarah khan le Abraham chuh, “Lalpa,” ti a, a thu a a nun sek bang khan. Tichun, thilpha hih a, lauhna him nei lo a na um u chun Sarah chate hi’n lau.

⁷ Nanguh pasalte, khutibang mah in, numei hi bel kek vak zaw ahih ziek u leh Pathien thilthawnpiek hinna chuh I chan khawmpih uh ahih ziekin, hethiem tak kawmin na ziteu chuh pakchau in. Ziehaw chuh na pauchamnau dala a um lohna dingin hih un.

Kristien Kihehpihna

⁸ A chaihna kêi in, na bawn un lungthim munkhat in um unla, kilainat tuoh unla, suohpih bangin kihehpih unla, kilungsiet tuoh unla, nuoilut chuh in um un.

⁹ Gitloh chuh gitloh in din kiu inla, vang pie zawu un. Zie zieka hi sap na hiu hi, vangpiekna chang dingin.

¹⁰ Hinna hehpih nuom leh Ni phate mu nuom chun, Gitlohna lak ah a lei vengpha hen la, A mûk le dawha a kilemna thu gen lo dingin vengpha hen.

¹¹ Gitloh nungngat in Thil pha bawl hen; Chamna hawl in, delh zui zel hen.

¹² Lalpa mit chuh mi diktatte chungah a chu a, A bil le a pauchamna lam u ah a dawh sek a, Amahvang chuh. Lalpa mel chuh thil sukhielte chungah a um sek hi, a ti ngâl a.

¹³ Thilpha hih lama na gunchuh u chun, kuo a nanguh hun suna ding?

¹⁴ Himahlele, diktatna zieka na thuoksa bang na hih tak uh chun, kipâk unlau! Kuomah lau kiu inla, lung le lungkham diek kiu un.

¹⁵ Himahlele, na lunggil u ah Krista chuh zah tak leh Lalpa banga limbawl zingin um un. Nangmau a um, na kinepnau thu hun dawp ta chuh dâwng dingin kisazosa’n um zingun,

¹⁶ Zie chuh nunnem tak leh zah tak kawmin hih un. Na sielepha hetnau chuh thieng takin vawp zing un, tichun, Krista nungzuite na hihna ziekuh a, na umdan phateu a hun gensietnau a chuh, a hun gensiete chuh sukmuolpho a a um theihna dingun.

¹⁷ Thil gilo hih zieka thuok sang chun, Pathien phasak lam a hih chun, thilhih phat zieka thuok chuh a phazaw ngâl a.

¹⁸ Pathien kawma ei uh ei puih theihna dingin, Krista chun gilote ziekin khatvei a thuok ta ngâl a, mi diktat chun mi diktatlo sik in a thuok a; a taksa ngêi chuh thaha um in, thagau vang achun sukhin in a um a;

¹⁹ Zie chun thagau saltângte kawm achun thu a vak tângsap pih a,

²⁰ Ziehaw chuh Noah kuong tuk laia, Pathien in thuokhat taka a ngak laia le, a thu zawp nuom lote thagau haw khah ahiu ui. Kuong achun mi tawmcha, a bawn u a giet chauh chuh, tui apat hukdawk in a um u a;

²¹ Zie chuh, baptistma, tu a nanguh hukdama na umnau etsakna chuh ahi. Zie chuh taksapum nin sawp thienna hilo in, sielepha hetna thieng taka, Pathien kawma thutiem neihna chuh ahi. Isu Krista thawhkitna vangin tuhin a hun hukdam na hiu hi;

²² Amah chuh van a kalto in, vânsâwlchâkte chunga leh, van thuneihnate leh, thilhih theihnate chunga vaihawm in, Pathien changlam akhun a chu ta a.