1 PETER 1 - PATHIEN LEKHABU THIENGTHO (BSI)

¹ Peter, Isu Krista sawlchak chun, Pathien mi telte, gâltai banga, Pontas gamte, Galati gamte, Kappadokia gamte, Asia gam leh, Bithunia gamte a kithehzakte;

² Isu Krista thisan theh khum zâla thu zawp ding leh Thagau Thiengtho a sukthientho, Pa Pathien hetlawk dungzuia teldawkte kawmah, Hehpihna leh thamuonna na kawm u ah sukpun in um hen.

Kinepna Hing

³ I Lalpau Isu Krista Pathien leh Pa chuh pahchak in um hen. Amah chun a zahngaihna nasatak dungzui zelin, mithi lak apat Isu Krista thawhkitna vangin, kinepna hing mu dingin hinna thak ei pie a.

⁴ Go sie theilo, buok beklo, tuoi theilo van a nanguh dinga kawih a um chuh luoh dingin,

⁵ Hun nunung a lang ding ginna a hukdamna chuh mu dingin; taksanna ziekin, Pathien thilhih theihna a ven chuh na hiu hi.

⁶ Zie thu ahin, tuhin hun chawmcha sung chuh, patepna tin cheng leh, thuokna tin cheng ziek hin, lungkham taka na um uh kiphamawh mahleh, nasa takin lawp un;

⁷ Na taksannau patepna, sana, meia etchien a hih nunga mangthai sek sanga le lul zaw chun, Isu Krista hung kilak tieng leh, pahchakna leh, limbawlna leh, lopina ding a hung hih theihna dingin.

⁸ Amah chuh, mu khalo mah leu chin le na hehpih uh a, amah chuh tuhin mulo mahleu chin le, na taksang uh a, khutichun, kipahna nasatak leh lopi tak, thu maia gen theih loh chun na lawp uh a;

⁹ Amah na taksan lawh uh, na thagau uh hukdamna chuh na muh sek ziekun.

¹⁰ Zie hukdamna thu hi ahi, thiemgaute’n chingthei taka a hawl uh a, gunchuh taka sut a, Pathien in, thilpiek, nanguh a hun piek ding thu a genlawk sek uh khah.

¹¹ Zie hun chuh bangtik a hi dem, tih leh bangti’n a a hungtun ding, ti’n hah takin a na sut sek uh ahi. Zie chuh, Krista Thagau amau a um chun, Krista thuokna ding haw leh, zie nunga lopina hung um ding haw kawka a genlawk lai u khah ahi.

¹² Zie thu haw chuh, amau haw phatchuomna ding hilo in, nangmau haw mawng phatchuomna ding ahi zawi tih, Pathien in thiemgaute kawm achun a hetsak tai; zie thu haw chuh, van apat a sawl dawk, Thagau Thiengtho thilhih theihna’n, nanguh Chanchin Pha hun hilhpa khan a hun hilh na hi tau hi. Zie thil haw chuh ahi, vânsâwlchâkte nasan inle hêtchet a nawp sek uh khah.

Hinkhuo Thiengtho

¹³ Zieziekchun, na lungthim uh puontum chengin, pilkieu unla, Isu Krista a hung kilak tieng leh, vangsakna a hun piek ding chuh lungthuoi lo in kinem zingun.

¹⁴ Cha thunuomte bangin, na khawhet theih mau a na malai utnau banga um lo in,

¹⁵ A hun sampa chuh a thientho bangin, nanguh le, na nunlekhan u ah na thiengtho zaw tau un;

¹⁶ “Nanguh na thientho dinguh ahi, Kei ka thiengtho ngâl a,” tih zik a hi kha.

¹⁷ Chun, zah chuom nei lo a, mitin, a nasep bang chiet uh a ngaihtuoh sek pa chuh Pa na sak uh chun, zie leisiet a na châm sung chenguh hin le, zah zing zieng un.

¹⁸ Na pulepateu hun pieksawn, na nunlekhan uh hawmngawn lak apat chuh, thil sie thei, dangka leh sana te haw a tat na hi puou a,

¹⁹ belamno melhemlo leh buok beklo thisan guola, Krista thisan lul a tat na hi zawu hi tih, na he ngâl uh a.

²⁰ Amah chuh, leisiet kisiem masang pek a, Pathien in a na guotsa a hi ta a, himahlele, tuhun nu nunglamhaw ahin, nang haw ziekin a hung kiphuong dawk a hi tai.

²¹ Amah vanga, thihna apat kaithopa leh, lopina a puilutpa Pathien taksangte na hiu a; khutichun, na taksannau leh kinepnau chuh Pathien ah, sukdet a um ahi tai.

²² Suohpihte, kihehpih tak tak dinga, thutak zawpa, na thagau uh na sukthien tâk ziekun, lunggil a lunglut takin kihehpih tuoh un.

²³ Chi siethei lak ah hilo in, Pathien thu hing leh, um zing achun, chi siethei lo laka piengthak na hi zaw ngâl u a,

²⁴ “Mi chengcheng hampa guol ahiu a, A lopina chengcheng u le, Hampa pak bang ahi. Hampa chuh a vuoi a, A pak chuh a pulh a,

²⁵ Lalpa thu vang chuh kumkhuo a um zing ahi,” tih ahi ngâl a. Zie chuh ahi, Chanchin pha thu a hun hilh uh khah.