1 LENGTE 9 - PATHIEN LEKHABU THIENGTHO (BSI)

Solomon kawma Lalpa Kilak kitna

¹ Chun, hiti hi ahi a, Solomon in Lalpa In leh leng In a sak zawh leh, a sak nuom dang chengcheng a sak zawh suok kêi phat chun,

² Gibeon khuo a a kawma a kilak bang khan Lalpa chu Solomon kawmah a nih veina dingin a hung kilak kit a.

³ Chun, Lalpa chun a kawmah, “Na pauchamna leh na ngetna ka maa na hun tut haw kha ka na ngaitha a. Zie In na sak hi kumlekhuo a ka min umna ding in ka hih thiengtho tai. Ka mit leh ka lunggil chu zie tak achun um zing ta’n a.

⁴ Chun, nang inle thu ka hun piek taphawtte guol a hih ding a na pa David um banga lunggil phatak pu leh lungthim diktak pua ka mitmuha na um a, ka thupiekte leh ka vaihawmte na zawp zing chun,

⁵ Israel te chung ahin na lalgam lalchutphah chu kumlekhuo’n hihdet ing ka; na pa David kawma, ‘Israel te lalchutphah a chu ding mi kitasam puo’n la,’ ti a ka na tiemsa bang khan.

⁶ Amahvang chuh nang na him, na suonte ahim nei zuih uh chu na kiheimang u a, ka thupiekte leh ka thuguot te ka hun hetsak hi na pawm loh u a, pathien dangte na sema, na va ho u chun,

⁷ Israel te haw hi gam ka piek apat chun hih mangthai ing ka ting; zie ka min a dinga ka hih thiengtho sa hi ka mitmuh ngêi in paih ing ka. Tichun Israel te hi namtin chengte lak ah muhsit leh thupil a gensiet mai hung hi’n a.

⁸ Chun, zie In hi sang ten mahlele, a chieh pel taphawtte chun maksa’n a lunggil uh thawngguih un tin, ‘Bangati a Lalpa’n zie gam leh zie In hi zie bang a hi a bawl ahim?’ hun ti’n au.

⁹ Chun, mite’n, ‘Lalpa a Pathien uh, a pulepateu gam apat puidawkpa kha a kiheisan u a, pathien dangte a tuk u a, a ho u a, a nateu a sep tâk ziekun ahi; zieziekchun ahi Lalpa’n zie sietna chengcheng haw hih a chung u a a hun tun sak,’ ti’n dâwng un au,” a ti a.

Solomon leh Hiram Thil kipiek tuohna

¹⁰ Chun, hiti hi ahi a, Solomon in In nih, Lalpa In leh leng In a sak sung, kum sawmnih a beih nung in,

¹¹ (Tura leng Hiram in Solomon chu Sidar thing haw, châk thing haw, sana haw, a khawkna taphawt ah a tuok sak suok kêi a,) chuleh leng Solomon chun Hiram chu Galili gama khuo sawmlenih a pie a.

¹² Chun, Hiram chuh Tura khuo apat in Solomon in khuo a piek haw chu en dingin a pawt a; a khuo mite chun a na lawp ta puou a.

¹³ Chun, amah chun, “Ka suohpihpa, zie khawpi nei piek haw hi bang khuo ahiu em?” a ti a.Khutichun tuni tieng hin Kabul gam a ti tau hi.

¹⁴ Himahleh, Hiram chun leng Solomon chuh sana talent za leh sawmnih a thak a.

Solomon Thilhih Dangte

¹⁵ Leng Solomon in nasema pawnggawih lawi a siem ziek chuh ziehi ahi: Lalpa In leh amah In sa ding leh Millo in dingte, Jerusalem kulhte, Hazor khawpite, Megiddo khuote, Gezer khawpite, siem dingin ahi.

¹⁶ Aigupta leng Pharaoh chu a va chieh to a, Gezer khuo a va la a, a hâltum a, zie khawpi a um Kanaan te chu a that a, a chanu Solomon zi chu, kithakna thilpiek dingin a na pie ta a.

¹⁷ Chun, Solomon in Gezer khuote, Beth-horon nuoinung zaw khuote,

¹⁸ Balath khuote, Israel gama gamthip a Tadmor khuote,

¹⁹ Chun, Solomon in a thil kawihkhawmna khawpi a neihte leh a kangtalai haw a dinga khawpi a neihte leh, a sakawl mite a dinga khawpite, Solomon in Jerusalem ah leh, Lebanon ah leh, a vaihawmna gamsung chengcheng haw achun a sak nuom dân dân in a sa a.

²⁰ Chun, Israel suonte hilo. Amor mite, Hit mite, Periz mite, Hiv mite leh Jebus mite a na um sun chengcheng haw kha chuh,

²¹ a gamsung a um nutsieh a um a suonteu, Israel chate’n le a sukmang theih loh uh haw chu Solomon in a pawnggawih lawi lak ah chun a pan sak a, tuni tieng hin a na um den tau hi.

²² Israel suonte vang chuh Solomon in suok in a siem puoh a; kido mite, a na semte, a miliente, a sepaih lawiupate, a kangtalai leh a sakawl chung chuong mi lawiupate ahi zawu hi.

²³ Ziehaw chu Solomon nasemte chunga lawiupate chu ahiu hi, nasem mite chunga vaihawmte chu zanga leh sawmnga ahiu hi.

²⁴ Pharaoh chanu vang chuh David khawpi apat chun amah In, Solomon in a sak sak achun a chieh to ta a; tichun, Millo chu a siem ta a.

²⁵ Chun, Solomon in Lalpa dinga maichâm a siem achun kum chengin hâlmang thillat leh chamna thillat thumvei a lân sek a. Lalpa masanga maichâm achun gimlimte a hâl tel sek hi. Khutichun In chu a sa zo ta a.

²⁶ Chun, leng Solomon chun Edom gama Tuisuohgiet San pang Eloth kawma um Ezion-geber mun ah kuong sepaih a kawih a.

²⁷ Chun, Hiram in a suokte kuong tawl mite, tuisuohgiet chanchin he sa, kuong a Solomon suokte kitawnpih dingin a sawl a.

²⁸ Amau haw chuh Ophir ah a va chieh u a, zie apat chun sana talent zali leh sawmnih a hun puou a, leng Solomon kawm a hun tun u a.