1 LENGTE 7 - PATHIEN LEKHABU THIENGTHO (BSI)

Solomon In sak haw

¹ Chun, Solomon chun amah In ding kum sawmlethum a sa a, a In chu a zo suok ta a.

² Lebanon gammâng ale In a sa a; zie In saulam chu tawng zakhat ahi a, a vailam tawng sawmnga, a sânlam tawng sawmthum ahi; a khuom haw chungah sidar thing inkamte tawh, khuom guol li chunga lem ahi.

³ Chun, guol khat achun sawmlenga zel ahi a, khuom sawmli leh nga chunga kinga inkamte chung achun sidar thing a khuh ahi.

⁴ Chun, guol thum in tukvan a um a, vak leh vak chu tien thum in a kisalhtuoh a.

⁵ Chun, kawtkhak leh khuom chengcheng te chu thing ning li a siem ahi a; vak leh vak chu tien thum in a kisalhtuoh chiet hi.

⁶ Chun, hulliep chu khuom nei in a siem a; a dunglam chu tawng sawmnga ahi a, a vailam chu tawng sawmthum ahi a; zie mai achun hulliep a siem a, khuom dang haw leh inkam lien haw chu a ma achun a um hi.

⁷ Chun, a vaihawmna ding lalchutphah umna ding hulliep, vaihawmna hulliep a sa a; zie chuh tuong mawng lehlam apat a lehlam tienga chu sidar thing a khuh ahi.

⁸ Chun, a umna ding in, hulliep sung achun huongcha dang khat a nei kit a; zie chu mi khutthiem takte bawl tawbang ahi. Zie hulliep tawbang mah chun Solomon in Pharaoh chanu, (Solomon in zi ding a a neih) a ding chule a sak sak hi.

⁹ Ziehaw chengcheng chu suong mantam tak tak, suong a hun phet zela sêksa, a âtna a ki-âtte manga sak ahi, sunglam le, pawlam le, a suongvuih apat a a sip tiengin, khutibang mah chun pawlama huongsung lien tak haw chule sak ahi.

¹⁰ Chun, suongvuih chu suong mantam tak tak, suong lien taktak, suong tawng sawm te, tawng giet te a lem ahi.

¹¹ Zie chunglam chu suong mantam taktak, suong a hun phet zela sek, leh sidar thing ahi.

¹² Chun, a kimvelin huongsung lien tak chu, suong sek thawh, tien thum leh sidar thingtum thuoh khat a um ahi a; Lalpa In huongsung sungnung zaw leh hulliep tawbang mah khan sak ahi.

Huram Nasep

¹³ Chun, leng Solomon in mi a sawl a, Tura khuo apat Huram a sama.

¹⁴ Zie pa chu Naphtali nam a meithai cha ahi a, a pa chu Tura khuo a sumeng sek ahi a; amah chu sumeng sêkna lam achun pilna leh hetthiemna’n a dim a; a themthiem mah mah a. Leng Solomon kawm achun a chieh a, a na chengcheng chu a sep sak ta a.

Sumeng Khuom Nih

¹⁵ Chun, tawng sawmlegiet a sangin sumeng bân nih a siem a; a leh lam chu tawng sawmlenih ahi gel a.

¹⁶ Khuom sipzum a kawih dingin sumeng kisunglum nih a siem a, a lûm khat chu tawng nga a sang ahi a, khat chule tawng nga a sang mah ahi.

¹⁷ Khuom sipzum chu thikkhau pawl bîlbiel a kizêm a siem ahi a; lûm khat chunga ding chun sagih ahi a, khat chunga ding chun le sagih mah ahi.

¹⁸ Tichun, khuom haw chu a siem a, zie khuom sipzum a lûm haw tuomna ding chun pawl chilchel a kisiem khat chungah a kimvelin tien nih a um a; chun khutibang mah chun lûm khat chung achun le a um sak a.

¹⁹ Chun, hulliep khuom sipzum a a lûm achun lili pak lim hi a chuong a, tawng li a sang ahi.

²⁰ Chun, a khuom sipzum a a lûm haw achun a gei ah, pawl chilchel chincha achun vaimimthei lim le a um a; chun, vaimimthei lim chu zie lim haw achun zanih gêl gêl a tien in a um a.

²¹ Chun, Ho-In hulliep achun khuom haw chu a phut a; changlam khuom chu a phut a, a min dingin Jakin a sa a, chun, veilam khuom chu a phut kit a, chun, a min dingin Boaz a sa a.

²² Chun, khuom sipzum achun lili pak lim a chuong a; tichun khuom lemtuok chu zawh ahi ta a.

Sumeng Bel lien chuh

²³ Chun, sumeng bel lientak, a gei lang khat apat a gei langkhat tieng chu tawng sawm ahi a; a sânlam tawng nga; a kim vel pumpi chu tawng sawmthum vel ahi.

²⁴ A gei nuoi achun pak mûm lim hin a vel suok a, tawng sawm ahi a, bel kimvel achun a um a; zie pak mûm haw chu tien nih in a um a, sunkhawm ngâl ahi.

²⁵ Zie chu bâwngchal sawmlenih chungah a dinga, thum in mâllam a ngau a, thum in tumlam a ngau a, thum in simlam a ngau a, thum in suohlam a ngau a. Bel chu a chunghawu achun a kinga a, a mei hawu chun sunglam a nga a,

²⁶ Zie chu khutpêk bawk a sah ahi a; a gei chu lili pak tawbang, khawn gei tawbanga siem ahi, hai khawn sangnih dawl ahi.

Sumeng kangtalai Lim

²⁷ Chun, khawn tunna sawm, sumeng in a siem a; khat sauh dan chu tawng li ahi a, a vailam chu tawng li mah ahi a, a san lam chu tawng thum ahi.

²⁸ Chun, khawn tunna siem dân chu zie tawbang hi ahi; a geikuok u a, a geikuok hawu chu zawl nih kikala um ahi.

²⁹ Chun, a geikuok hawu kikal achun sakeibaknei te, bâwngchal te, cherub te a chuong a; a gei chunghawu achun kuong tunna a um a; chun, sakeibaknei haw leh bâwngchal haw nuoi lam achun a kizêm hawihna neucha cha a um chilchel a.

³⁰ Chun, kuong tunna achun, sumeng kangtalai li leh sumeng thikzawl a um chiet a, a ning li achun a kingakna li a um chiet a, kisilna bel nuoi lam achun a kisung a um a, a sik chiet achun a kizêm hawihna a um chiet a.

³¹ Chun, belvalhkuol sung gei chu tawng khat a lien ahi a; a ngâwnggêng gei chuh belvalhkuol banga bêm ahi a, tawng khat leh a lang a lien ahi; a kuok haw chu ning li ahi a, a bêm puoi.

³² Chun, a kuok nuoi lam achun kangtalai keng lite a um a; chun, kangtalai keng te chunga inte chuh khuom dona tawh a kizawp a; chun, kangtalai sân dân chu tawng khat leh a lang ahi.

³³ Chun, zie kangtalaite siem dân chu sakawlkangtalai keng siem dân bang ahi a; a zawl te, a belvalhkuol te, a do kalh te, a lai lum haw chu a kisun thawh vek ahi.

³⁴ Chun, kuong tunna ning li chiet achun kingakna li a um a: zie kingakna chu a tunna tawh tikhat vek ahi.

³⁵ Chun, a tunna chung achun belvalhkuol, tawng kimkhat a sang hi a um a: tunna chunga a kawihna keng te leh a kuok haw chuh tikhat vek ahi.

³⁶ Chun, a tunna pêk haw leh a kuok haw achun a letdan bang zelin cherub te, sakeibaknei te, tum thing te a chuon sak a, a kimvel achun a kizêm hawihna hi a um chilchel a.

³⁷ Khutibang mah chun a tunna sawm te chuh siem ahi a; a bawn chun tikhat a sun ahi chiet a, a kitieh chiet, siem dân kibang chiet ahi.

³⁸ Chun, kisilna kuong sawm sumeng in a siem a; kisilna bel khat chun dân sawmli a dawl a; kisilna bel chu tawng li chieta sang ahi; kuong tunna sawm chung achun kisilna bel khat chiet a kilui a.

³⁹ Chun, kuong tunna haw chu in changlam pang achun nga a lui a, in veilam pang ah nga; bel lien chu in changlam panga suohlam panga simlam dawh in a lui a.

Temple a Matchâk haw

⁴⁰ Chun, Huram chun kisilna bel haw, vutluoh haw, keng silna kuong haw a siem a. Khutichun Huram chun Lalpa in dinga Solomon in a siem sak chengcheng chuh a zo vek ta a.

⁴¹ Khuom nih te, khuom sip a bel tawbanga lûm nih te, khuom sip a bel tawbanga lûm nih tuomna pawl chilchel nih te;

⁴² Zie tuomna pawl chilchel nih te a dinga vaimimthei lim zali, khuom sip a bel banga lûm nih te tuomna dinga pawl chilchel gel a dinga, vaimimthei lim tien nih te;

⁴³ Chun, kuong tunna sawm leh a tunna chunga kisilna bel sawm te;

⁴⁴ tuidawl khat leh a nuoia bâwngchal sawmlenih te;

⁴⁵ Bel te leh, vutluoknate leh maiphietna kuong te tawh; zie matchâk chengcheng Lalpa in dinga leng Solomon in Hiram a siem sak chuh sumeng nawtval a siem vek ahi.

⁴⁶ Jordan phaizawl ah Sukkoth leh Zarthan kikala bellei mun a lengpa’n a hih ahi.

⁴⁷ Chun, Solomon chun zie matchâk chengcheng chu a tam bêk ziekin tehdawk loh in a kawih a; sumeng bûk zah chu le hetdawk guol ahi puoi.

⁴⁸ Chun, Solomon chun Temple a matchâk um chengcheng chu a siem a, sana maichâm leh Etsakna chângthâk umna dawhkân chuh sana’n a siem a.

⁴⁹ Mun Thiengtho masang zawna thaumei kawihna changlam pang ah nga leh veilam pang ah nga chu sana thieng in a siem a, pakcha te, thaumei te leh chaicheh te chu sana’n a siem a;

⁵⁰ Khawnte, thaumei phita chehna te, keng silna kuong te, thikkhe te, mei-âm chehna te chu sana thieng takin a siem a, in sungnung zaw Mun Thiengtho pên kawtkhak haw leh temple kawtkhak vawhna te chuh sana a siem vek ahi.

⁵¹ Khutichun, leng Solomon in temple dinga a siem chengcheng chu a hun zo suok vek ta a. Tichun Solomon chun a pa David na latsa dangkaguote, sana te leh matchâk haw chu a la lut a, temple a go haw lak ah a kawih ta a.