1 LENGTE 6 - PATHIEN LEKHABU THIENGTHO (BSI)

Solomon Temple Sakpatna

¹ Chun, Israel chate Aigupta gam apat a a hung pawtdawk nung uh, kum zali leh sawmgietna, Israel te chunga Solomon vaihawm kum lina, Ziv tha, tha nihna chun Lalpa In sak ding chu a pan ta a.

² Chun, Solomon in Lalpa a dinga In a sak chu a dunglam tawng sawmgup ahi a, a vailam chu tawng sawmnih ahi a, a sânlam chu tawng sawmthum ahi.

³ Chun, zie In a Mun Thiengtho malam a inliep chu a In vailam chan tawng sawmnih a sau ahi a, a In mai lam letdan chu tawng sawm ahi.

⁴ Chun, In suvak ding chun tukvan neucha, vathangkalh um in a siem a.

⁵ Chun, a In bang kimvelin, ho-in bang kimvel ale, hona mun bang kimvel ale, zie In bang chu hi ngâl in indan nei a sa a; chun, mun thiengtho kimvel achun indan a siem a;

⁶ a sawng nuoinung pên chu a vailam tawng nga ahi a, a laita chu a vailam tawng gup ahi a, a thumna chu a vailam tawng sagih ahi; kalvaihaw chu in bang sukha a kigawlh ngailo in pawlam achun a kimvelin In bâng kingakna ding chu a siem a.

⁷ Chun, In chu a sak lai u chun suong a laihnau muna sêksa ngawn a sak ahi a; tichun, a sak sung u chun sek git te, heicha git te, thik matchâk gi mawngmawng zie In achun zak ahi puoi.

⁸ Indan nuoinung pên a lutna ding kawtkhak chu zie In changlam pang achun a um a; a laita achun kalbi kiheikawi in a kal to a, chun, a laia pan chun a thumna ah a lut to uh ahi.

⁹ Khutichun In chu ahun sa a, a hun zo ta a; In chu Sidar thingpek leh inkamte chun a khuh a.

¹⁰ Chun, a sawng neite chu kimat vekin tawng nga chieta sangin a sa a; ziehaw chu sidar thinga zawpmat vek ahi.

¹¹ Chun, Lalpa thu chu Solomon kawmah a hung tunga,

¹² “Zie na In sak chungchâng thu ahin, ka thuguot te na pawm a, ka vaihawmnate na zawpa, ka thupiek chengcheng haw zawp dinga na pawm phawt chun, na pa David kawma ka gen tâk, ka thu kha na chunga hin sudet ing ka.

¹³ Chun, Israel chate lak ah hin cheng ing ka ting, ka mi Israel te haw hi thahtham puo’ng ka,” a ti a.

¹⁴ Tichun, Solomon chun a In sak chu a hun zo ta a.

Temple Sunglam Cheidan

¹⁵ In sunglam bang achun sidar thingpek a mang a; a tuong apat a chunglam bang tiengin a sunglam ah thingpek a mang suok kêi a; a tuong achun châk thingpek a phah thuop a.

¹⁶ Chuleh, intawm lam tawng sawmnih chu a tuong apat a a bâng haw tiengin sidar thingpek a siem ahi vek a; hona mun, Mun Thiengtho pên a ding inle a sunglam achun a mang a.

¹⁷ Chun, inmai lam mun thiengtho sungnung zaw mai lam chu a dunglam tawng sawmli ahi.

¹⁸ Chun, In sunglam achun pakcha mûm leh a pakpalh lim ki-ât hawih tak sidar thinga siem a um a, a bawn chun sidar thing ngawn ahi a, suong mawngmawng muh ahi puoi.

¹⁹ Chun, Mun thiengtho pên chu a In sungnung lama Lalpa thugawlh bawm kawihna achun a guonggalh a.

²⁰ Zie hona mun sung chu, a dunglam tawng sawmnih, a vailam tawng sawmnih, a sânlam tawng sawmnih ahi a; zie chu sana thieng tak ti’n a luonkhum a, sidar maichâm chule a luonkhum hi.

²¹ Khutichun Solomon in zie insung chu sana thieng tak ti’n a luonkhum a; hona mun malam chu sana khau kikuoituoh in a daltan a; zie chuh sanati’n a luonkhum a.

²² Chun, In chu a bawna a zawh thien masangsieh in a pum in sanati’n a luonkhum a. Mun thiengtho sung nunga Maichâm chule a pumpi’n sanati’n a luonkhum sak hi.

²³ Chun, Mun thiengtho pên achun tawng sawm chieta sang cherub nih, Sidar thing in a siem a.

²⁴ Chun, cherub tha khat chu tawng nga ahi a, a tha langkhat chu tawng nga mah ahi; a tha khat tâwp apat a a tha khat lehlam tâwp kikal chu tawng sawm ahi.

²⁵ Cherub khat chule tawng sawm ahi a; cherub te chu kitieh phet leh lim kibang gêl gêl ahiu hi.

²⁶ Cherub khat sânlam chu tawng sawm ahi a. Cherub khat chule zie chan mah chu ahi.

²⁷ Chun, cherub te chu Mun Thiengtho pên In sunggil achun a kawih a; cherub te tha chu a kizak a, khat tha chun bang langkhat a sukha a; zie In lailung tak achun a tha teu chu a kisutuoh u a.

²⁸ Chun, cherub te chu sanati’n a luonkhum a.

²⁹ Chun, a In bang chengcheng chu a kimvelin cherub te tum thing leh pakcha pak palh kigeikuok thawh hawih tak te’n sunglam leh pawlam ah chun a siem a.

³⁰ Chun, a In tuong chu sunglam leh pawlam chu sanati’n a luonkhum a.

³¹ Chun, Mun Thiengtho pên lutna dingin olive thing kawtkhak a siem a; kawtkhak chung leh kawtkhak biengte chu a bang mun nga a khen amun khat tieh ahi.

³² Tichun olive thing in kawtkhak nih a siem a; zie achun Cherub te lim, tum thing leh pakcha pak limte a ki-ât thawh hawih takin a siem a, ziehaw chu sanati’n a luonkhum a; Cherub te leh tum thing te chu sana a nuh a.

³³ Chun, Ho-In lutna apat a bang mun li a khena mun khat tawh kitieh in olive thing kawtkhak bieng le a siem a.

³⁴ Châk thing kawtkhak nih tawh; kawtkhak khat a pêk nih chu thep theih ahi a, kawtkhak khat a pêk nih chu thep theih mah ahi.

³⁵ Ziehaw achun Cherub lim tum thing leh pakcha pak lim te a ât a; zie a ât hawih chu sanati’n a luonkhum a.

³⁶ Chun, Ho-In huongsung sungnung zaw chu suong sek thawh in tien thum leh, sidar thing inkam thuoh khat in a sa a.

³⁷ A kum lina, Ziv tha chun Lalpa In suongvuih chu lem ahi a;

³⁸ Chun, a kum sawmlekhat na, Bul tha, tha gietna achun guot ahih dân bang takin, bangkim chu hih zawh ahi ta a; khutichun In sak sung chu kum sagih ahi.