1 LENGTE 5 - PATHIEN LEKHABU THIENGTHO (BSI)

Temple Sa dinga Kiguonggalhna

¹ Chun, Tura leng Hiram in Solomon kawmah a mite a sawl a; a pa thasang in leng hi dingin sathau a nuh ui tih a na za ta ngâl a; Hiram chu David ngaina sek a na hi him a.

² Chun, Solomon chun Hiram kawmah, hiti hin thu a thak a,

³ “Ka pa David khan ning tina a melmate tawh kidona haw ziek khan Lalpa a Pathien In ding a sa thei puoi; Lalpa’n a kêngpêk nuoia a kawih sak chanin, tih hi na hetsa ahi.

⁴ Tuhin vang chuh Lalpa ka Pathien in ning tin ah muonna ei pie ta a; melmate a um ta puou a, vangsietna le a um diek ta puoi.

⁵ Chun, ngaitie, Lalpa’n ka pa David kawmah, ‘Na chapa na thasanga na lalchutphah a hung chu ding pa chun ka min a dingin In chu hun san a,’ ti a a na gen tâk sa bang khan, Lalpa ka Pathien a dingin in chu sak ka guo a.

⁶ Khutichun Lebanon tâng apat Sidar thing haw ei phuk sak dingin na mite thu pie’n la; ka suokte le na suokte lak ah hung tel untin; chun, na suokte lawh chu na gen bang takin pie zel ing ka. Sidon mite banga thing phuk thiem ka laku ah kuomah a um puou tih na he ngâl a,” a ti a.

⁷ Chun, Hiram in Solomon thu gen a na zak chun a kipâk ta mah mah mai a, “Zie mi tamtak chunga vaihawm dinga chapa pil tak David piepa Lalpa chu pahchak in um hen,” a ti a.

⁸ Chun, Hiram in Solomon kawmah, “Nei hun thuthak chu ka na he a, sidar thing thu leh châk thing achun na khawkna taphawt ah hun na hih sak ing ka.

⁹ Ka suokte’n Lebanon tâng apat in tuisuohgiet tiengin hun puo suk un tin; mun na guotna chan achun tuisuohgiet a tawl dingin kanlawm sak ing ka ting, chun, zie mun achun phel sak ing ka ting, nangin a na la’n na tin; chun, nangin le ka inkawte nek ding pie’n na tin, ka khawknau cheng nei hun panpih ding hi’n a,” ti’n mi a sawl a.

¹⁰ Khutichun Hiram chun Sidar thing leh châk thing chu a mamawh bang zelin Solomon chu a pie a.

¹¹ Chun, Solomon in Hiram chu a inkawte nek ding buh dân singnih leh sathau thieng dân sawmnih a pie a; zie chuh Solomon in kum cheng a Hiram a piek sek dân chu ahi.

¹² Chun, Lalpa’n a tiem bang ngêi in, Solomon chu pilna a pie a; Hiram leh Solomon kikal achun kichamna a um a; a nih u chun thu a gawlh khawm tau hi.

¹³ Chun, leng Solomon chun Israel te chengcheng laka pawnggawih lawi a siem a; pawnggawih lawi chu mi singthum ahiu.

¹⁴ Lebanon achun tha chenga kitheng zelin singkhat a sawl sek a; tha khat Lebanon ah a va um u a, amau haw In lam ah tha nih a um zel sek uh a; chun, Adoniram chu nasem a pawnggawihte lawiupa ahi.

¹⁵ Chun, Solomon chun van puo mi singsagih leh suong sek a pang mi singgiet tânghaw achun a kawih hi.

¹⁶ Ziehaw tihloh chun Solomon chun nasemhaw chunga lawiupa chuom, nasemte veng mawngmawng sangthum leh zathum le a nei a.

¹⁷ Chun, leng thupiek in In suongvuih chu, suong sêksa a lem dingin suong lien tak tak, suong mantam taktak te a hun puou a.

¹⁸ Khutichun Solomon In sate leh Hiram In sate leh Gebal mite chun suonghaw chu a sek u a, In sakna ding chun thing leh suonghaw chu a guonggalh ui.