1 LENGTE 4 - PATHIEN LEKHABU THIENGTHO (BSI)

Solomon Miliente

¹ Khutichun leng Solomon chu Israel te chengcheng chung a leng in a um ta a.

² Ziehaw hi a milien neih haw chu ahiu hi: Zadok chapa Azariah chu thiempu ahi a;

³ Shisha chapa Elihoreph leh Ahijah chu lehkhazik ahiu a; Ahilud chapa Jehoshaphat chu chanchin zik ahiu a;

⁴ Jehoiada chapa Benaiah chu sepaih lawiupa a hi a; Zadok leh Abiathar chu thiempu ahiu hi;

⁵ Chun, Nathan chapa Azariah chu lawiupate chung hotu ahi a; Nathan chapa Zabud chu thiempu ahi a, leng guolpa le ahi;

⁶ Ahishar chu insung lam lawiupa ahi a; Abda chapa Adoniram chu na sem a pawnggawihte lawiupa ahi.

Lawiupa Sawmlenihte

⁷ Chun, Solomon chun Israel te chengcheng chung achun lawiupa sawmlenih a nei a, ziehaw chun leng a dingin leh a inkawte dingin nek ding a ngaihtuoh u a; mi khat in kum khat a tha khat zel nek ding a ngaihtuoh sek uh ahi.

⁸ Ziehaw hi amin hawu chu ahi: Ephraim tâng gam ah Ben-hur;

⁹ Makaz ah Ben-deker, Sha-albim, Beth-shemesh leh Elon-beth-hanan;

¹⁰ Arub-both ah Ben-hesed ahi a, amah chun Sokoh leh Hepher gam chengcheng chu a chang khawm a;

¹¹ Dor gam chengcheng achu Ben-abinadab ahi a, amah chun Solomon chanu Taphath chu zi’n a nei hi;

¹² Tanak khuo leh Megiddo khuo haw ah Jezreel khuo nuoi, Zerathan khuo kawm a um Beth-shean biel chengcheng leh Beth-shean apat a Abelmeholah leh Jokmeam gam vak dawh tiengin Alihud chapa Baana a chang a;

¹³ Ramoth-gilead khuo chu Ben-geber a chang a, amah chun Manasseh chapa Jair khuo leh Gilead gama umte chu a chang khawm a; Bashan gama Argob biel khuo lopi taktak khuo sawmgup, kulh leh a kawt kamna sumeng thik tawn a kibawlte khuo haw chule a chang khawm hi;

¹⁴ Mahanaim khuo ah Iddo chapa Ahinadab ahi a;

¹⁵ Naphtali gam ah Ahimaaz; amah chun Solomon chanu Basemet chu zi’n a nei a;

¹⁶ Aser leh Bealoth khuo haw achun Hushai chapa Baana;

¹⁷ Issakar gam ah Paruah chapa Jehoshaphat:

¹⁸ Benjamin gam ah Elah chapa Shimei;

¹⁹ Amor te leng Sihon leh Bashan leng Og gam, Gilead gama Uria chapa Geber chu zie gam lawiupa um chuh ahi.

Solomon Lalgam Khantohna

²⁰ Chun, Juda leh Israel te chu tuisuohgiet panga pîlnel zah zet in a tam u a, a neu in a dâwn u a, kipâk takin a um sek u a.

²¹ Tichun Solomon in lui apat in Philistia te haw gam leh Aigupta gamgi tiengin, gam chengcheng chungah vai a hawm a; kipahman te a hun chawi sek u a, Solomon damsung chengcheng chun a na a sem sek ui.

²² Solomon ni khat nek chu chângthâk nêl tak tehna sawmthum leh changbuong tehna sawmgup ahi a;

²³ bâwngchal kivâk thau tak sawm, gancha tatna muna bâwngchal sawmnih, belam zakhat, ziehaw tihloh chun sakhi haw, sangai haw, sakhichal haw, âk kivak thau haw le ahi.

²⁴ Luigal langkhat lam gam chengcheng Tiphsah apat a Gaza tiengin. Luigal langkhat lama lengte chengcheng chung achun vai a hawm a; a kiengvêl a mi chengcheng haw chu tawh gâlmuong in a um tau hi.

²⁵ Tichun Solomon damsung cheng chun Judate leh Israel te chu Dan apat Beer-sheba tiengin mitin amau grep gui bul leh amau theipi bul achun lungmuong takin a um chiet u a.

²⁶ Chun, Solomon chun a kangtalai kai sakawl singli leh sakawl chung chuong mi singkhat leh sangnih a nei a.

²⁷ Zie lawiupate chun amau panna tha chietah Solomon leh a dawhkhâng a an umte chengcheng haw nek ding chu a piedawk zel sek u a; piek kimloh a nei kha puou.

²⁸ Chun, sakawlte leh gancha taih hat te dingin buhmanpawl leh buhpawl haw chu a mamawh dungzui in, amau umna mun chietah a hun lau a, mitin in a hih ding u a guot bang zelin.

²⁹ Chun, Pathien in Solomon chu pilna leh hetna nasatak leh lungthim letna tuisuohgiet panga pîlnel bang mai a pie a.

³⁰ Solomon pilna chun suohlam chate chengcheng pilna leh Aigupta mite pilna chengcheng chu a khup vek hi.

³¹ Mi chengcheng sangin a pil zaw a; Mahol chate Ezra mi Ethan, Heman, Kalkol, Darda te haw sangin le a pil zaw a; tichun a kimvela nam chengcheng lak achun a min a hung thang ta a.

³² Chun, amah chun thuching sangthum a gen a; chun, a la haw chu sangkhat leh nga ahi.

³³ Chuleh, thing chanchin te Lebanon tânga sidar thing apat a kulh banga hung seldawk husop te na tiengin a gen sek a; ganhing chanchin te le a gen sek a, bawkvaka vak thawh te chanchin leh, nga chanchin te a gen sek a.

³⁴ Tichun, Solomon pilna thu he taphawt chu, a pilna thu ngaitha ding chun khawvel a lalgam chuom chuom apat in a hung sek ui.