1 LENGTE 21 - PATHIEN LEKHABU THIENGTHO (BSI)

Naboth Grep Huon

¹ Chun, zie thil haw nung chun hiti hi ahi a, Jezreel mi Naboth chun grep huon a nei a, zie chuh Jezreel a Ahab In kawm cha a um ahi a.

² Chun, Ahab in Naboth kawmah, “Ka In naih ahih ziekin ancheh huon dingin na grep huon hi ei pie’n, a thasang in grep huon phazaw hun pie’ng ka; ahihloh leh na phasak zawk chun dangka a manbi chu hun pie’ng ka,” ti’n a hopih a.

³ Chun, Naboth chun Ahab kawmah, “Ka pilepu apat a ka goluoh ahih ziekin hun pie thei puo’ng ka, Lalpa’n ka hun piek ding chu a phal puoi,” a ti a.

⁴ Chun, Jezreel mi Naboth in zie bang thu chu a kawma a gen ziekin Ahab chu ngui tak leh lungkim lo takin a In ah a lut ta a. “ Ka pulepa te go hun pie thei puo’ng ka” a ti chak kêi ngâla. Tichun, a zâlkhun ah a kuol a, leh lam a nga a, an himhim a ne nuom ta puoh a.

⁵ Himahleh, a zi Jezebel chuh a kawmah a hung a, “Bang zieka na lunggil zie bang a chuh lungkham a, an nasan ne nuom talo na him?” a ti a.

⁶ Chun, amah chun a kawmah, “Jezreel mi Naboth ka hopih a, ‘Na grep huon hi ei châwk sak in, ahihloh leh na deih zawk lele a thasang in grep huon dang hun pie’ng ka,’ ka ti a; amah chun, ‘Ka grep huon hi hun pie thei puo’ng ka,’ ti’n ei dawng a ahi,” a ti a.

⁷ Chun, a zi Jezebel chun a kawmah, “Israel gam leng hi hilo na him? Tho inla, an ne’n la, lunggil kipâk takin um in, Jezreel mi Naboth grep huon chu ken hun pie’ng ka,” a ti a.

⁸ Khutichun, Ahab min in lehkha a zik a, a min nam nan a nam a, lehkha chu Jezreel khuo a Naboth invengte leh upahaw leh miliente kawm achun a thak a.

⁹ Chun, zie lehkha-thak achun, “An ngawlh thu phuong unla, mipi lak ah Naboth chu kawih-sang unla;

¹⁰ Belial chapate mi nih a maa umsak unla, ‘Pathien leh leng na gensiei,’ ti a hêk dingin a na siem un. Chuleh puidawk unla, suongin a na seplum un,” ti’n a zik a.

¹¹ Chun, Jezreel khawpi a mite, upate leh mi phate chun Jezebel in a kawm u a lehkha a thâk bang tak chun a na hih tau a.

¹² Anngawlh thu a phuong u a, mipi lak ah Naboth chu sang tak ah a chut sak u a.

¹³ Chun, Belial chapate mi nih chu a hung u a, a ma ah a chut sak tau a; chun mipi um haw kawm achun Belial chapate chun, “Naboth hin Pathien leh leng a gensiei,” ti’n a hêk u a. Tichun khawpi apat chun a puidawk u a, suongin a sep u a, a seplum tau a.

¹⁴ Tichun, Jezebel kawmah “Naboth suongin a sep uh a, a thi tai,” ti’n mi a sawl u a.

¹⁵ Chun, Jezebel in Naboth chuh suongin a seplum tau hi tih a het phet chun, Ahab kawmah, “Kipan inla, Jezreel mi Naboth grep huon a hun châwk sak nawp loh kha va nei tan: Naboth chu a thi tai,” a ti a.

¹⁶ Chun, hiti hi ahi a, Ahab in Naboth a thi tai tih a zak in, Ahab chu a hung tho dawk a, Jezreel mi Naboth grep huon chu nei dingin a chieh suk ta a.

¹⁷ Chun, Lalpa thu chu Tishbe mi Elijah kawmah a hung tung a:

¹⁸ “Kipan inla, Samari khuo a um Israel leng Ahab hopih dingin chieh suk in: ngaitie, Naboth grep huon ah a um a, nei dinga chieh suk ahi.

¹⁹ A kawmah, Lalpa’n hiti hin a tii, ‘Na that a, na neihsak behlap nalai maw?’ ti’n gen in la, a kawmah ‘Uicha’n Naboth thisan a liek na mun ngêi achun nang thisan le liek ding ahi,’ a tii, tin va gen ah,” a ti a.

²⁰ Chun, Ahab in Elijah kawmah, “Nei hung mudawk ta maw, ka melmapa?” a ti a. Elijah chun a dawng a, “Ka hun mu tai: Lalpa mit muh a thil phalo hih dinga na kizuok tâk ziekin.

²¹ Ngaitie, na chunga hin thil phalo hun tunsak ing ka ting, hun sumangthai ing ka ting, Ahab apat pasal taphawt chuh Israel gama suok leh suok lo le sumangthai vek ing ka ting.

²² Nang in nei suklungnat ziek leh Israel te thil na hihkhelh sak ziekin, Nebat chapa Jeroboam inkawte leh Ahijah chapa Baasha inkawte bang mai in na inkuonte hi bawl ding ka hi,” a ti a.

²³ Chun, Jezebel chungchâng thu le Lalpa’n a gen a, “Jezreel khuo kulh bâng bul ah uicha’n Jezebel hi hun ne’n au,

²⁴ Ahab inkuon laka mi khawpi a thi taphawt chuh ui in neu untin; gamlaka thi taphawt chu chung leng vachate’n ne ding ahiu,” ti’n.

²⁵ (A zi Jezebel tîlsiet a Lalpa mitmuh a thil gilo hih dinga kizuok, Ahab tawbang hi kuomah a um hiel puou.)

²⁶ Israel chate masanga Lalpa’n a nawhdawk Amor te thilhih chengcheng bang, milimte ho leh thil kihdak-um tak a hih sek hi.

Ahab Kisikna

²⁷ Chun, Ahab in zie thu chu a het phetin hiti hi ahi a, a puon a bawtthêk a, kawlladip puon a silh a, an a ngawl a, kawlladip puon chungah a kuol a, kingainiem takin a um ta a.

²⁸ Chun, Lalpa thu chu Tishbe mi Elijah kawmah a hung tung a:

²⁹ “Ka masang a Ahab kingaihniem dân hi na mu? Ka maa a kingaihniem ziek hin amah hun sung hin thil phalo tun sak puo’ng ka ting, a chapa hun sung in vang a inkawte chungah thil phalo tun sak ing ka,” a ti a.