1 LENGTE 2 - PATHIEN LEKHABU THIENGTHO (BSI)

Solomon kawma David Thupiek

¹ Chun, David thih hun chu a hung nai ta a; a chapa Solomon chu thu a pie a,

² “Leisiet dân banga chieh ding ka hi ta a, hattak in um inla, pating takin um in.

³ Na thilhih na cheng leh, na ngatna lam cheng a na lamzan theihna dingin Mosi dân a zik bangin, Lalpa na Pathien in a lampi haw hawh ding leh, a thuguot haw, a thupiek haw, a vaihawm haw leh, a thu hetsak haw pawm dinga thu a piek haw hi zawp in.

⁴ Lalpa’n ka chungchâng thu ah, ‘Na suonte’n a lunggil tak u leh, a ngaihtuohnau a ka mitmuh a thutak a um dinga a umdan u a a chittheih, u chun, Israel te lalchutphah a chu ding kitasam puo’n la,’ ti a a gen kha hihdet ding ahi.

⁵ “Zie ban achun na het ding chuh, Jeruiah chapa Joab ei bawl dân, Israel te sepaih lawiupa nih Ner chapa Abner leh Jether chapa Amasa te chunga a bawl dân leh a thah dân kha, khutia kicham lai a kidona thisan a suoh a, a tai a a kâwnggak chung leh a kengtawbek chunga kidona thisan a nât dân khah.

⁶ Zieziekchun na pilna dungzui in bawl in la, a samkâng hi Sheol ah ah lungmuong takin chieh sak ki’n.

⁷ “Gilead mi Barzillai chate chungah vang zaidawhna latsak inla, na dawhkhâng a ankuong ûm in tel sak in, na suohpihpa Absalom apat a ka taihmang lai khan ka kawmah a hung ngâl u a.

⁸ “Chun, ngaitie, Behurim khuo a, Benjamin mi, Gera chapa Shimei hi na kawmah a um a, amah chun Mahanaim a ka chieh lai khan hansie phalo tak ei buok a: amahvang chuh Jordan ah ei muok dingin a hung suk a, zie tak achun, ‘Chemzâm in hun that puo’ng ka,’ ti’n Lalpa min in a kawmah ka na kipautiem ta a.

⁹ Himahlele, gawt loh in pawtsak ki’n, mipil na hi a; a chunga bangtia hih ding tih vang he thei tei inla, a luchang a kelsam kek chu thisan tawh na liem sak ding ahi,” a ti a.

David Thihna

¹⁰ Chun, David chu a pulepate kawmah a ipmu ta a, David khawpi achun a vui tau hi.

¹¹ Chun, Israel te chunga David vaihawm sung chu kum sawmli ahi; Hebron ah kum sagih vai a hawm a, Jerusalem ah kum sawmthum leh thum vai a hawm hi.

¹² Chun, Solomon chu a pa lalchutphah achun a chu a; tichun a lalgam chu nasatak in hihdet in a um ta a.

Adonijah Thihna

¹³ Chun, Hagith chapa Adonijah chu Solomon nu Bathsheba kawmah a chieh a. Amahnu chun, “A pha lama hung na him le?” a ti a. Amah chun, “A phalam thu hi e,” a ti a.

¹⁴ “Na kawmah thu bang ahim gen ding ka nei hi,” a ti kit a. Amahnu chun, “Gen ta leh,” a ti a.

¹⁵ Amah chun, “Lalgam hi keia ahi tai tih leh, Israel te chengcheng hinle kei hi leng dingin ei thil zing ui tih na he a. Himahlele, lalgam chu ka suohpihpa dingin a hung leh um kit zaw ta a; Lalpa na guot dân in amah a hizing ana hi.

¹⁶ Tuhin thil khat hun nget ding ka nei a, ei lemsak lo in um ki’n,” a ti a. Amahnu chun a kawmah, “Gen ta leh,” a ti a.

¹⁷ Chun, amah chun, “Lungsiet takin leng Solomon ei hopih sak inla, (na thu vang niel khel puo’n tin) Shunam mi Abishag hi zi’n ei neih sak hen,” a ti a.

¹⁸ Bathsheba chun, “Awle, leng chu hun hopih sak ing ka,” a ti a.

¹⁹ Khutichun Bathsheba chuh Adonijah ding a hopih sak dingin leng Solomon kawm achun a chieh ta a. Leng chu amahnu tuok ding chun a tho a, a ma ah a kûn a, a lalchutphah achun a chu a, chun, lengpa nu a ding chun chutna khat a dawh sak a; a changlam achun a chu ta a.

²⁰ Tichun, amahnu chun, “Thil khat neucha hun ngên ding ka hi; ei lem loh sak hiel ki’n,” a ti a. Chun, leng chun a kawmah, “Hun ngên ta leh; henu, hun niel hiel puo’ng ka,” a ti a.

²¹ Chun, amahnu chun, “Shunam mi Abishag hih na suohpihpa Adonijah zi dingin neih sak in,” a ti a.

²² Chun, leng Solomon chun a dâwng a, a nu kawm achun, “Bangti dana Shunam mi Abishag hi Adonijah dinga ngên na him? Lalgam hile nget sak ngâl ngâl ta; Adonijah chu ka u ahi ngâl a; amah a ding leh thiempu Abiathar leh Zeruiah chapa Joab a ding chun le ngên ta,” a ti a.

²³ Khutichun leng Solomon chun Lalpa min lo in, “Adonijah thil nget hin amah chunga thihna ding thugen ahihloh ngêi ngêi leh, Pathien in a nawp nawp ei lawh hen, zie sanga nasa zaw chun le!

²⁴ Zieziekchun, Lalpa, a thutiem banga ei sudet a, ka pa David lalchutphah a ei chut sak a, inkuon ei hun dindawk sak pa hinna sâlin ka gen hi, Adonijah hi tuni ngêi ngêi a hi thah ding ahi,” ti’n a kipautiem a.

²⁵ Khutichun leng Solomon chun Jehoiada chapa Benaiah chu a sawl a; amah chun a chungah khut a tha a, a thi ta a.

Abiathar Thiempu apat a Haihsakna

²⁶ Chun, lengpa’n thiempu Abiathar kawm achun, “Anathoth khuo ah nangmah In leh lo ah chieh ta’n. Thi zieng tâk chu na hi a; himahlele ka pa David masang a Lalpa Pathien bawm na na zawn sek ziek leh ka pa gimtheih thawkna chengcheng haw a chuh nang le na na thuok pih sek ziekin tuhin vang hun that lo ding ka hi,” a ti a.

²⁷ Khutichun Solomon chun Abiathar chu Lalpa thiempu a hihna a haihsak ta a; Lalpa’n Shiloh khuo a Eli inkawte chungchâng thu a gen kha a guitun sak theihna dingin.

Joab Thihna

²⁸ Chun, zie thu chuh Joab in a na za a; Joab chu Absalom lama khan a pang puoh na a, Adonijah lama pang ahi ngâl a. Tichun Joab chu Lalpa umna puon-In ah a tai a, maichâm kihaw chu a tu ta a.

²⁹ Khutichun “Lalpa umna puon-In a Joab a tai a, ngaitie, maichâm bul ah a um hi,” ti’n leng Solomon chu a hilh u a. Tichun leng Solomon chun Jehoiada chapa Benaiah chuh a sawl a, “Chieh inla, va that in,” a ti a.

³⁰ Tichun Benaiah chuh Lalpa umna puon-In achun ava chieh a, a kawmah, “Leng in hung pawt hen, a tii,” a ti a. Amah chun, “Hilo e, zie tak a hin thi mai ing ka,” a ti a. Chun, Benaiah chun, “Joab in hiti bang hin a na ti a, ei na dawng hi,” ti’n leng kawm achun thu a tun kit a.

³¹ Chun, leng chun a kawmah, “A gen bang chun va hih inla, va that inla, vui in. A ziek umlo hiel a Joab in thisan a suoh a, kei leh ka pa inkawte apat a mi dik thisan a suoh chu a kikiengkawih theihna dingin.

³² Tichun, amah sanga mi kitûp zaw leh phazaw mi nih, Ner chapa Abner, Israel te sepaih lawiupa leh Jether chapa Amasa, Judate sepaih lawiupa khah ka pa David het loh in a sawisa a, chemzâm a a thah ziekin Lalpa’n a thisan chu amah lu chung ngêi ah hun chuk sak hen.

³³ Khutichun, a thisan mawh chu Joab lu chung leh, a suonte lu chung ah kumlekhuo’n um intin; David chung leh a suonte chung leh, a lalchutphah chung haw ah vang Lalpa a kipat a lungmuonna kumlekhuo’n um zing tan a,” a ti a.

³⁴ Khutichun Jehoiada chapa Benaiah chu a va chieh to a, a va sawisa a, a that ta a; gamthip a amah In achun a vui tau a.

³⁵ Chun, leng chun Jehoiada chapa Benaiah chu a sepaih lawiupate chungah Joab mun a luoh sak a, thiempu Zadok chu leng in Abiathar thasang in a um sak ta a.

Shimei Thah a a Umna

³⁶ Chun, leng in Shimei a sama, a kawmah, “Jerusalem ahin in kisak inla, zie tak achun um inla, zie apat chun khawimah dangah pawt hiel ki’n.

³⁷ Na pawtdawk ni, Kidron lui na kân ni chu na thih ni ahi ding ahi tih he’n, na thisan chu nangmah lu chung ngêi ah um in a,” a ti a.

³⁸ Chun, Shimei chun leng kawmah, “A dik a puo, lengpa ka lalpa’n na gen bang chun na suok hin hih zel in a,” a ti a.

³⁹ Tichun Shimei chu Jerusalem achun sawttak a um a. Himahleh kum thum a hung bei nung chun, Shimei suokte laka nih chu Gath khuo a leng Maakah chapa Akish kawm achun a tai u a. Chun, “Ngaitie, na suokte chu Gath khuo ah a um ui,” ti’n Shimei chu a va hilh u a.

⁴⁰ Chun, Shimei chu a kipan a, a sabiltung a guonggalh a, a suokte hawl ding chun Gath khuo a Akish kawm achun a chieh ta a. Chun, Shimei chun Gath khuo apat chun a suokte chu a va puikit ta a.

⁴¹ Chun, Shimei Jerusalem khuo apat a pawt a, Gath khuo ah a va chieh hi tih Solomon a hilh u a.

⁴² Chun, leng chun mi a sawl a, a va sap sak a, a kawmah, “Na pawt ni, gamdang a na pawt ni ni chun thi ngêi inla, ti khan Lalpa min lo in ka hun kipautiem sak a, ka hun hetsak hilo ahim? Nang inle ka kawmah khan, ‘Na thu gen ka zak hi a phai,’ na ti kha.

⁴³ Bang zieka Lalpa a na kipautiemna leh thu ka hun piek kha zawp lo na him?” a ti a.

⁴⁴ Chun, leng mah chun Shimei kawmah, “Na lunggil sung nunsiet zie, ka pa David chunga na tawih ziehaw kha na he vek a; khutichun, Lalpa’n na nunsietna hi nangmah lu chung ngêi ah hun vaihkit sak in a.

⁴⁵ Leng Solomon vang chu vangsak in um intin, David lalchutphah chu Lalpa masangah kumlekhuo’n hihdet hi’n a,” a ti a.

⁴⁶ Khutichun leng chun Jehoiada chapa Benaiah chu thu a pie a; amah chu a pawt a a va sawisa diek a, a that tai. Tichun lalgam chu Solomon khut ah sukdet in a um tai.