1 LENGTE 19 - PATHIEN LEKHABU THIENGTHO (BSI)

Jezebel apat a Elijah Taihmang na

¹ Chun, Ahab in Elijah thilhih chengcheng, chemzâm a thiemgau chengcheng a thah thu haw tawh Jezebel a hilh a.

² Chun, Jezebel chun Elijah kawmah thupawtu a sawl a, “Zing leh tuhun mah mah ahih na mi thahte laka khat guola nang hinna le ka bawl loh chun, pathien te’n a nawp nawp ei lawh mai hen, zie sanga nasa zaw chun le,” a ti a.

³ Tichun, a lau a, a kipan a, a hinna hukdawkna dingin a taisie ta a, Juda gama Beerseba khuo a va tung a, zie tak achun a suokpa chuh a nusieh a.

⁴ Himahleh, amah chu gamthip lam ah ni khat lam hiela gamla achun a chieh a, Juniper thing nuoi ahin a chu a; thih a ngên ta a, “Aw Lalpa, a hun tai; tuhin ka hinna hi la mai ta’n, ka pulepate sangin ka phazaw diek puoh ngâl a,” a ti a.

⁵ Tichun, Juniper thing nuoi achun a kuol a, a ipmu ta a. Chun, ngaitie, vânsâwlchâk khatin a hun khawih a, a kawmah, “Tho inla, an ne uo,” a ti a.

⁶ Chun, a vak en a, ngaitie, a luthun achun chângthâk suong sa chunga kan minsa leh tui-um khat hi a um a. Chun, a ne a, tui chu a dâwn a, a kuol kit ta a.

⁷ Chun, Lalpa vânsâwlchâk chuh a nih veina ah a hungkit a, a hun khawih a “Tho inla, ne tie, na chiehna ding hi tung zo puoh kha’n la,” a ti a.

⁸ Chun, a tho a, a ne a, a dâwn a, tichun zie an ziek chun Pathien tâng Horeb tiengin ni sawmli leh zan sawmli a chieh a.

⁹ Chun, zie taka kawlpûk khat chu a va tung a, zie tak achun a um ta a; chun, ngaitie, Lalpa thu chu a kawmah a hung tunga, a kawmah, “Elijah, zie taka hih bang hih na hi?” a ti a.

¹⁰ Amah chun, “Lalpa sepaihte Pathien a ding hin phachuom ka ngai mah mah sek a. Israel chate chun lah na thugawlh a nusieh ta ngâl u a, na maichâmte a suchim u a, na thiemgaute chemzâm in a satlum u a; Kei, keimah mai hi a um sun ka hi, kei hinna le sukmangthai ding guo’n a hawl nalai ui,” a ti a.

¹¹ Chun, Lalpa chun, “Va pawt inla, tânga khun Lalpa masangah va dingin,” a ti a. Ngaitie, Lalpa a hung a, huihpi nasa takin a tângte chu a hun mût khi a, Lalpa masang achun suongpite chu a phel lem lum a; himahlele huih achun Lalpa chu a um puoi: chun, huih nun zawh chun lei a hung lîng a; himahlele leilîng achun Lalpa a um diek puoi:

¹² Chun, leiling zawh chun mei a hung pawt a; himahlele mei achun le Lalpa chu a um diek puoi: mei zawh chun aw ngatcha hih a hung pawt a.

¹³ Chun, hiti hi ahi a, Elijah chun zie chuh a het phatin, a puon-In a mai a khuh a, a va pawt a, kawlpûk kawtkhak achun a va dinga. Ngaitie, aw chun a kawmah, “Elijah, zie tak ahih bang hih na hi?” a hun ti a.

¹⁴ Amah chun, “Lalpa sepaihte Pathien a dingin phachuom ka ngai mah mah sek a. Israel chate hin lah na thugawlh a nusieh u a, na maichâmte a suchim u a, na thiemgaute chemzâm in a that u a; kei, keimah mai hi a um sun ka hi, kei hinna le sukmangthai ding guo’n a hawl nalai ui,” a ti a.

¹⁵ Chun, Lalpa’n a kawmah, “Chieh inla Damaska gamthip lampi lam ah chieh kit tan: chun, na va tun tieng leh Hazael chu Suria chunga leng dingin thau va nuh in:

¹⁶ Chun, Israel te chunga leng hi dingin Nimshi chapa Jehu thau nuh inla: chun, na thasanga thiemgau hi dingin Abelmeholah khuo a um Saphat chapa Elisha thau na nuh ding ahi.

¹⁷ Chun, hiti hi hi’n tin, Hazael chemzâm a suokcha taphawt chu Jehu’n that intin, Jehu chemzâma suokcha taphawt Elisha’n that in a.

¹⁸ Himahlele Israel gam ahin Baal maa khupdin ngeilo leh, a lim uh châwp ngeilo mi sangsagih kei a dingin ka kawih nalai hi,” a ti a.

Elisha Sapna

¹⁹ Khutichun, Elijah chu zie apat chu a pawt a, Shaphat chapa Elisha chuh a va mudawk a, amah chun lo a na kai a, a ma achun bâwngchal tuok sawmlenih a um a, a sawm leh nihna chuh amân a na hâwi a; chun, Elijah chun a va zuona, a puon chuh a va silh sak a.

²⁰ Chun, Elisha chun a bâwngchalte chuh a taihsan a, Elijah chu a delh a, a kawmah, “Ka nu leh ka pa va châwp phawt tadih ing ka ting, tichun hun zui ing ka,” a ti a. Elijah chuh a kawmah, “Bang ka hun lawh a ahim? va chieh kin tan,” a ti a.

²¹ Chun, a va zuih chu a hung vaikit a, bâwngchal tuok khat chu a that a, a sa chu bâwngchal lo kaihna van haw chun a huon a, mipite chu a pie a, a ne tau a. Tichun a kipan a, Elijah chu a zui a, a na a sep sak ta a.