1 LENGTE 16 - PATHIEN LEKHABU THIENGTHO (BSI)

Baasha Thihna

¹ Baasha chungchâng thu ah Hanani chapa Jehu kawmah Lalpa thu a hung tung a, hiti hin a gen a;

² “Leivui a kipatin ka hun ladawk a, ka hun chawisanga; ka mipi Israel te chungah leng dingin ka hun siem a; chun, nang in Jeroboam guol in thil na hih gilo a, ka mipi Israel te chuh na gitloh sak a, a gitlohna hawu chun ei suklungnat sak a;

³ Ngaitie, Baasha leh a inkuonte suon haw chu lamang ding ka hi; chun, Nebat chapa Jeroboam inkuon bang mai in na inkawte bawl ding ka hi.

⁴ Baasha inkuon laka mi, khawpi a thi taphawtte chu uicha’n neu untin; chun, a inkuon laka mi gamlaka thi taphawtte chuh chung leng vacha ten ne’n au, a tii,” ti’n.

⁵ Baasha chanchin dangte, a thilhihte, a thilhih theih zie te, chuh Israel lengte vaihawm lai thu zikna bu ah chuong hilo ahim?

⁶ Khutichun Baasha chu a pulepate kawm achun a ipmu ta a, Tirzah khuo ah a vui tau a: chun, a chapa Elah chun a thasang in vai a hawm ta a.

⁷ Chun, Hanani chapa thiemgau Jehu khut ale Lalpa thu chu Baasha leh a inkawte kalh in a hung tung kit a, a khut suok a Lalpa suklungnatna dinga Jeroboam inkawte guola Lalpa mitmuh a thil phalo tak a hih ziek leh amah a thah ziekin, Hanani chapa thiemgau Jehu manga a gen Lalpa thu chuh a hungtung tai.

Israel Leng Elah

⁸ Juda leng Asa vaihawm kum sawmnih leh gup na achun Baasha chapa Elah chun Tirzah khuo ah Israel te chungah vai a hawm pan a, kum nih vai a hawm hi.

⁹ Chun, a nasemte laka khat Zimri, a kangtalai kimkhat chunga lawiupa a pangpa chun amah chu a phiel gu a, khutih lai chun Tirzah khuo a a in sunglam lawiupa a pang Arza in ah chun a na dâwn kham ta a.

¹⁰ Chun, Juda leng Asa vaihawm kum sawmnih leh sagih kum chun, Zimri chu a va lut a, a that ta a, a thasang in vai a hawm ta a.

¹¹ Chun, hiti ahi a, Zimri’n vaihawm a hun pat a, a lalchutphah a a hung chut chut chun, Baasha inkawte chengcheng chuh a hun that suok kêi a. A inkawte leh a guolte leh pasal taphawt chuh khatchale a hâwi puoi.

¹² Khutichun Lalpa’n thiemgau Jehu manga Baasha chungchâng thu a na gen sa bang khan Zimri chun Baasha inkawte chengcheng chu a that ta a.

¹³ Aziek chu gitlohna chengcheng leh a chapa Elah gitlohna haw chun Israel te a gitloh saka, a milim teu haw zieka Lalpa Israel Pathien lungnatna a chawhthawh ziek in.

¹⁴ Elah chanchin dangte leh a thilhih chengcheng te chuh Israel lengte vaihawm lai thu zikna bu ah a chuong hilo ahim?

Israel Leng Zimri

¹⁵ Juda leng Asa vaihawm kum sawmnih leh sagihna achun, Zimri’n Tirzah khuo ah ni sagih vai a hawm a. Philistia te gam Gibbethon khuo chuh Israel te chun a huol u a.

¹⁶ Chun, a huolte chun Zimri’n a lungthim bawla, leng chuh a that tai tih a gen uh a hun za tau a; khutichun Israel te chengcheng chun sepaih lawiupa Omri chuh, zie ni chun a giehmun u ah Israel te chunga leng dingin a siem tau a.

¹⁷ Chun, Omri chu Israel te chengcheng chu tawh Gibbethon khuo apat chun a va chieh to u a, Tirzah khuo a vak huol tau a.

¹⁸ Chun, hiti hi ahi a, Zimri’n khawpi chuh a la tai hi tih a het phatin, leng in a kulh sung ah a tai lut a, leng In a chun mei a kihal khum a, a thi ta a.

¹⁹ Lalpa mitmuha thil phalo tak hih a, a gitlohnate ziek leh Jeroboam lampite hawh a Israel te thil hihkhelh sak a a pan ziekin khutia chuh um ahi.

²⁰ Zimri chanchin dangte leh, a mi phielgukna thute chuh Israel lengte vaihawm lai thu zikna bu ah chun a kizik hilo ahim?

Israel Leng Omri

²¹ Khutichun Israel mipite chu lawinih in a hung kikhen tau a: mipi kimkhat chun Ginath chapa Tibni chuh leng in a siem guou a, a zui u a; a kimkhat chun Omri a zui u a.

²² Himahlele Omri zuite chun Ginath chapa Tibni zuite chuh a zo tau a: tichun Tibni chu a thi a, Omri chun vai a hawm ta a.

²³ Juda leng Asa vaihawm kum sawmthum leh khatna ah Omri chun Israel te chungah vai a hawm pan a, kum sawmlenih vai a hawm a. Tirzah khuo achun kum gup vai a hawm hi.

²⁴ Chun Shemer a Samari tâng chu dangka talent nih in a chaw a, tâng achun In a sa a, a khawpi min ding chun zie tâng neipa Shemar minlo chun Samari a vawh ta a.

²⁵ Omri chun Lalpa mitmuh in thil phalo tak a hih sek a, a maa mite chengcheng sangin thil a hih gilo nasa diek a.

²⁶ Nebat chapa Jeroboam dân chengcheng kha a la a, a gitlohna zieka Lalpa Israel te Pathien suklungnatna dinga Israel te haw a gitloh sak bang khan a gilo zing ngâl a.

²⁷ Omri thilhih chanchin dangte leh a thilhih theih zie a hihlat thute chuh Israel lengte vaihawm lai thu zikna bu ah a kizik hilo ahim?

²⁸ Khutichun, Omri chu a pulepate kawmah a ipmu ta a, Samari khuo ah a vui tau a: chun, a chapa Ahab chuh a thasang in vaihawm in a pang ta a.

Israel Leng Ahab

²⁹ Juda leng Asa vaihawm kum sawmthum leh gietna ah Omri chapa Ahab chun Israel te chungah vai a hun hawm pan a: chun, Omri chapa Ahab chun Samari khuo ah kum sawmnih leh nih Israel te chungah vai a hawm hi.

³⁰ Chun, Omri chapa Ahab chun a maa mite chengcheng sangin Lalpa mitmuh in thil phalo a hih nasa pen a.

³¹ Chun, hiti hi ahi a, Nebat chapa Jeroboam gitlohna tawbang hihhaw chu bangmah lo a ngai hileh kilawm takin, Sidon te leng Eth-baal chanu Jezebel chu zi’n a nei a, chun, a chieh a Baal nate a sem in, a ho ta a.

³² Chun, Samari khuo a Baal In ding a sakna achun Baal a dingin maichâm a siem a.

³³ Chun, Ahab chun Asherim a siem a; a maa Israel lengte chengcheng sangin Ahab chun Lalpa Israel te Pathien lungnatna thil a hih tam pen hi.

³⁴ Amah hunlai chun Bethel mi Hiel in Jerikoh khuo a sa a: a cha masapen Abiram chanin a suongphum chu a lem a; a cha neupen Segub chanin a kulh kawtkhakte chu a tungdawk a Lalpa’n Nun chapa Joshua manga a na gentaksa bang khan.