1 LENGTE 14 - PATHIEN LEKHABU THIENGTHO (BSI)

Jeroboam Chapa Thihna

¹ Chun, zielai chun, Jeroboam chapa Abijah chu a dam puoh a.

² Chun, Jeroboam chun a zi kawmah, “Jeroboam zi ahi tih a het chuom lohna dingun kisiem lamdang inla, kipan in la Shiloh ah va chieh tie; ngaitie, zie tak achun thiemgau Ahijah zie mipite haw chunga leng a ka hung um ding chungchâng thu ei hilh pa kha a um hi.

³ Chun, chângthâk chun sawm leh, chângthâk kanthawh chi leh khuoizu um khat chawi inla, a kawmah va chieh tie: naupang hi bangti ding ahim hun na hilh in a,” a ti a.

⁴ Chun, Jeroboam zi chun a hilh bang chun a hih a, a kipan a, Shiloh achun a chieh ta a, Ahijah In chu a va tung ta a. Ahijah chun khuo a mu thei ta puoh a; a upat tâk ziekin a mit a thim ta ngâl a.

⁵ Chun, Lalpa’n Ahijah kawmah, “Ngaitie, Jeroboam zi a chapa chungchâng hun dawng dingin a hung hi; a damlo ahi a: hitibang hin na gen ding ahi: hiti hi hi’n tin, a hung lut tieng leh numei dang hileh kilawm takin hung ding ahi,” a ti a.

⁶ Chun, khutibang ngêi chun a hung um ta a, Ahijah chun kawtkhak a a hung lut laia a tuol tawh git a vak zak phet chun, “Nang Jeroboam zi, hung lut uo; bangti dana midang banga kisiem na hi? Chanchin phalo tak hun hilh dinga sawl ka hi a puo:

⁷ Chieh kit inla, Jeroboam kawmah, Lalpa Israel te Pathien in hiti hin a tii, ‘Mipite apat hin hiti tieng hin ka hung chawisanga, ka mi Israel te chung ahin leng in ka hun siem a,

⁸ David inkuon a kipatin lalgam ka lâksak a, zie chuh ka hun pie a: himahlele nang vang ka suok David bangin na um puoh a, amah chun chuh ka thupiek haw a vawp a, ka mitmuh ah thilpha mai hih guon a lunggil chengcheng in ei zui sek a.

⁹ Nang hin vang na masanga mite chengcheng sangin thil na hihkhiel nasa chuom a. Nei suklungnatna dingin pathien dangte leh milim kisung te na siem a, nei kiheisan ta a.

¹⁰ Zieziekchun ngaitie, Jeroboam inkuonte lak ahin thil phalo hun tunsak ing ka ting, Jeroboam apat hin cha pasal taphawt chuh Israel gama mi suok leh suok lo le hih mangthai ding ka hi, mi’n êk a phietngim kei bang mai in Jeroboam inkuon hih a man suok kêi macheng in phiet ding ka hi.

¹¹ Jeroboam inkuon a mi, khawpi a thi taphawtte chu ui in neu untin; chun, gam laka thi taphawtte chu chung leng vachate’n ne’n au: Lalpa chun a gen ta ngâl a.’”

¹² “Zieziekchun kipan inla, na In lam ah chieh kit mai ta’n; na keng in khawpi sung na tawh tieng leh naupang chu thi ding ahi.

¹³ Chun, Israel te chengcheng in kah untin, vui un au: Jeroboam inkuon lak ah amah mai chuh thân a vuih hi ding ahi ngâl a. Amah achun Lalpa Israel te Pathien lam ah thilpha Jeroboam inkuon laka muh ahih ziekin.

¹⁴ Chun, Lalpa’n tu zieng hinle, Jeroboam inkuon hun hih mangthai ding Israel te chunga leng hun siem in a; bangati a tu a hi hih zieng lo ahim?

¹⁵ Tui in phailuong kung a suklîng lîng bangin, Lalpa’n Israel te gawt intin; a pulepateu kawma a piek zie gam phataka kipat hin Israel bawt dawk intin, lui gâl lam ah chun theh dalh suok in a, Lalpa lungnat sak dinga Asher te chu a siem ziekun.

¹⁶ Chun, Israel te thil sukkhelh sakpa Jeroboam gitlohna ziekin Israel te chu kiheisan in a,” a ti a.

¹⁷ Chun, Jeroboam zi chuh a kipan a, a pawt ta a, Tirzah khuo chuh a va tunga: chun, In kawtkhak bul a vak tuntak chun naupang chu a thi ta a.

¹⁸ Chun, Lalpa’n a suok thiemgau Ahijah manga a na gen tâk sa mah bang khan Israel te chengcheng chun a vui u a, a sun tau a.

Jeroboam Thihna

¹⁹ Jeroboam chanchin dang haw, a galdo thu haw, a vaihawm thu haw, chuh ngaitie, Israel lengte vaihawm lai chanchin kizikna bu ah a chuong a.

²⁰ Jeroboam vaihawm sung chuh kum sawmnih leh nih ahi a; chun, a pulepate kawmah a ipmu ta a, a chapa Nadab chun a thasang in vai a hawm ta a.

Juda Leng Rehoboam

²¹ Chun, Solomon chapa Rehoboam chun Juda gam ah vai a hawm a. A vaihawm tûng lai chun kum sawmli leh kum khat mi ahi a, Lalpa’n a min umna dinga Israel nam chengcheng laka a teldawk khawpi Jerusalem achun kum sawm leh sagih vai a hawm a. A nu min chu Naamah ahi a, Amon mi ahi.

²² Judate chun Lalpa mitmuh in thil gilo a hih u a; a pulepateu thilhih chengcheng khela a gitlohnau chun a lungnatna chu a chawktho zaw sem a.

²³ Amau haw chun le tângsang cheng leh thing hing nuoi tin achun thing milim te, mihing lim te leh, munsang haw leh Asher te lim a siem u a.

²⁴ Chun, zie gam achun pasal kizuok te le a um u a: Israel chate masanga Lalpa’n a delhdawk tâk nam te thilhih kihdak-um tin cheng chu a hih u a.

²⁵ Chun, leng Rehoboam vaihawm a kum ngana kum chun, Aigupta leng Shishak in Jerusalem chuh a hun do a.

²⁶ Chun, Lalpa In a go haw leh leng In a go haw chu a la a, a bawn chun a pawmang vek ta a: Solomon in sana phaw a siem chengcheng chule a la vek ta a.

²⁷ Chun, leng Rehoboam chun ziehaw thasang chun sumeng phawte a siem a, leng in kawtkhak ngak lawiupate a vawp sak a.

²⁸ Chun, leng chu Lalpa In a a lut cheng leh mivengte chun a phaw chu a puou a, chun, mivengte indan ah a kawih kit zel sek u a.

²⁹ Rehoboam chanchin dangte leh a thilhih chengcheng te chuh Juda lengte vaihawm lai thu zikna bu achun a chuong hilo ahim?

³⁰ Rehoboam leh Jeroboam chuh kido zing zingin a damsung uh chu a mang tum kei ui.

³¹ Chun, Rehoboam chuh a pulepate kawmah a ipmu ta a, David khawpi ah a pulepate kawm achun a vui tau a; a nu min chu Naamah, Amon numei ahi. Chun, a chapa Abijah chuh a thasang in vaihawm in a um tai.