1 LENGTE 13 - PATHIEN LEKHABU THIENGTHO (BSI)

Thiemgau in Jeroboam a Gaihna:

¹ Chun, ngaitie, Juda gam apat in Pathien mi khat Lalpa thu’n Bethel ah a hung a. Chun, Jeroboam chu maichâm bul ah gimlim hâl dingin a na ding a.

² Chun, Lalpa thu’n zie Pathien mi chun maichâm chu do in a kiko khum a, “Aw maichâm, maichâm, Lalpa’n hiti hin a tii: ‘Ngaitie, David inkawte lak ah nausen, a min Josia kiti hung pieng intin, na chunga gimlim hâl sek thiempute hi na chung ahin kithawihna’n hun lân untin, na chung ahin mihing guhte hun hâl un au,’ ti’n,” a ti a.

³ Zie ni mah chun melchikna a pie a, zie hih Lalpa’n melchikna ding a tih chuh ahi: “Ngaitie maichâm hi hung khikek intin; a chunga meivamhaw hi hung kibuo vek in a, tih hi,” a ti a.

Jeroboam khut Hihdamkitna

⁴ Chun, hiti hi ahi a, Bethel a maichâm dem a kiko khum Pathien thu gen chu leng Jeroboam in a het phatin, maichâm apat chun a khut in a vak bân a, “Amah chu man un,” a ti a. Chun a vak batna khut chuh a hung zeng ta mai a, khutichun a khut chu a leh zuk kit thei ta puoh a.

⁵ Pathien mi’n Lalpa thu a melchikna a gen bang khan maichâm chule a khi a, maichâm a meivamhaw chu a kibuo vek ta a.

⁶ Chun, leng chun a dâwng a Pathien mi kawm achun, “Ka khut hi a hung dam kit theihna dingin Lalpa na Pathien kawmah ngên inla, nei paucham sak in,” a ti a. Pathien mi chun Lalpa kawmah a ngên a, tichun leng khut chu a hung dam ta a, a ma bang khan a hung um kit ta a.

⁷ Chun, leng chun Pathien mi kawm achun, “Ka In lam ah ka kawmah hung inla, hung kichawldam tadih in; chun kipahman hun pie’ng ka,” a ti a.

⁸ Chun, Pathien mi chun leng kawmah, “Na lalgam kimkhat ei pie ding hileh chinle hung diek puo’ng ka, zie mun ahin ne’n tui dâwn diek puo’ng ka;

⁹ Lalpa thu chun, chângthâk va ne’n tui mawngmawng le va dâwn ki’n, ti’n ei sawl ngâl a,” a ti a.

¹⁰ Khutichun, lampi dangah a chieh ta a. Bethel a a hungna lampi achun a kilehkit ta puoi.

Thiemgau Teksepu

¹¹ Chun, Bethel khuo achun thiemgau teksepu khat a um a; a chapate a hung u a, zie ni a Bethel a Pathien mi thilbawl chengcheng chu a gen u a; leng kawma a thugen haw chule a pa a hilh u a.

¹² A pau chun a kawm u ah, “Khawitak lampi a hawh hi leh?” a ti a. A chapate chun Juda gama pata Pathien mi chieh kitna lampi chuh a hilh u a.

¹³ Chun, amah chun a chapate kawmah, “Sabiltung ei hun guon sak tiem u,” a ti a. Khutichun sabiltung chuh a guonsak u a: zie achun a chu ta a.

¹⁴ Chun, Pathien mi chuh a delh ta a, gangpi thing nuoia a chut lai chu a va mu a, a kawmah, “Nang hi na him Juda gama pata hung Pathien mi chuh?” a ti a. Amah chun, “Hi, ka hi,” a ti a.

¹⁵ Chun amah chun, a kawmah, “Ka In lam ah ka kawmah hung inla, chângthâk hung ne’n,” a ti a.

¹⁶ Chun, amah chun, “Nang tawh vaikit thei ding ka hi puoh a, na kawma hung thei le ka hi diek puoi: zie mun ahin na kawmah chângthâk ne’n tui mawngmawng le dâwn diek puo’ng ka.

¹⁷ Lalpa thu chun ‘Chângthâk va ne’n, tui mawngmawng le va dâwn ki’n la, na va chiehna lampi ale hung kilehkit ta ki’n,’ ei ti ngâl a,” a ti a.

¹⁸ Chun, amah chun a kawmah, “Kei le nangmah banga thiemgau ka hi; chun, Lalpa thu’n vânsâwlchâk in, ‘Chângthâk a-nek a, tui a dâwn theihna dingin va sam kit in,’ ei tih ahi,” a ti a. Tichun a kawmah lepchieh thu chu a gen ta a.

¹⁹ Khutichun a kawmah a chieh kit ta a, a In ah chun chângthâk chu a ne a, tui chule a va dâwn ta a.

²⁰ Chun, hiti hi ahi a, dawhkhâng a a umlai u chun, a puikitpa thiemgau kawm achun Lalpa thu chuh a hung tung a:

²¹ Juda gam apat a hung Pathien mi kawm achun hiti hin gen in, “Lalpa’n hiti hin a tii, ‘Lalpa thugen na zuih loh ziek leh, Lalpa na Pathien thupiek na zawp loh ziek in,

²² Lalpa’n na kawmah, Chângthâk va ne ki’n la, tui le va dâwn ki’n,’ a ti a. Himahlele, zie mun ngêi achun chângthâk na ne ta a, tui na dâwn tâk ziekin; na luong chu na pulepate thana vuih hi puo’n a,” ti’n a gendawk ta a.

Pathien mi Thah a a Umna

²³ Chun, hiti hi ahi a, chângthâk a nek zawh a, tui a dâwn zawh chun, thiemgau a puikitpa chun, a sabiltung a hun guon saka.

²⁴ Chun, a chieh lai in, lampi ah sakeibaknei tawh a kituok u a, a na that ta a; a luong chuh lampi ah a paih a, sabiltung chu a kawmah a ding a, sakeibaknei chule a luong kawm achun a ding zing a.

²⁵ Chun, ngaitie, mi chieh vielte chun, lampi a luong um leh luong kawma sakeibaknei ding zing chuh a va muu a; thiemgau teksepu umna khuo achun a va gen u a.

²⁶ Chun, thiemgau lampi a va puikitpa chun zie chu a zak phet chun, “Pathien mi, Lalpa thu gen zui nuom lo pa kha ahi chu! Lalpa chun sakeibaknei kawmah a pie a, a pet a, a pehlup ahi ta chu, Lalpa’n a kawma a gen bang ngêi in,” a ti a.

²⁷ Chun, a chapate kawm achun, “Sabiltung ei guonsak tiem u,” ti’n a gen a. Tichun a guonsak tau a.

²⁸ Chun, a chieh ta a, lampi a luong paih thak a um leh, sabiltung leh sakeibaknei a luong kawma ding zing chuh a va mu a. Sakeibaknei chun mithi luong chu a ne puoh a, sabiltung chule a that diek puoi.

²⁹ Chun, thiemgaupa chun zie Pathien mi luong chuh a phawng a, sabiltung chung achun a sep kai a, a puo kit ta a: thiemgau teksepu umna khawpi achun amah sun ding leh vui dingin a hung ta a.

³⁰ Chun, a luong chu amah thân ah a siel a: “Ka suohpihpa, a khawkna e!” tin a kah a.

³¹ Chun, hiti hi ahi a, a vuih zawh nung chun, thiemgau teksepu chun a chapate kawmah, “Ka thih tieng leh Pathien mi kivuihna thân a hin keile ei hun vui un: a guh kawmah ka guhhaw hi hun kawih un.

³² Pathien thu a Bethel a maichâm leh, Samari gam khawpihaw a munsang in chengcheng kalh a a kiko khumna thu khah hung tung ngêi ngêi ding ahi ngâl a,” ti’n a gen a.

Jeroboam Sukkhelhna

³³ Zie thil haw nung chun le Jeroboam chun a umdan diklote chu a haihsan nuom diek puoh a, vantâng laka mi, thiempu dingin a siem zel a, kuole a nuom phawt a kawihchuom a, amah le munsang thiempute lak ah a va pang a.

³⁴ Chun, zie thil chuh Jeroboam inkuonte gitlohna, amau haw satthak a hihna ding leh khawvel apat a hih mangthai na dingin a hung pang tai.