1 LENGTE 12 - PATHIEN LEKHABU THIENGTHO (BSI)

Rehoboam leh Mâllam namte Helna

¹ Chun, Rehoboam chu Sekem khuo ah a chieh a; Israel te chengcheng chuh Sekem ah amah chu leng a siem dingin a chieh khawm u a.

² Chun, hiti hi ahi a, Nebat chapa Jeroboam in zie thu chu a hun zak phetin (leng Solomon kawma pata a taihmang na Aigupta gama um ahi a, tichun Jeroboam chu Aigupta gam apat chun a hungkit a)

³ Jeroboam leh Israel kikhawmkhawmte chengcheng chuh a hung u a, Rehoboam kawmah chun hiti hin a gen u a,

⁴ “Na pa khan ka namkawl uh a sugik bêk sek a; zieziekchun na pa ei gawih gimna leh, a namkawl gik tak ka chung u a a ngak hi ei hih zâng sak inla, tichun na na sem ung kau,” a tiu a.

⁵ Amah chun a kawm u ah, “Ni thum sung va chiehdawk tadih unla, chun, ka kawmah hungkit un,” a ti a. Chun, mipite chuh a chiehdawk tau a.

⁶ Chun, leng Rehoboam chun a pa Solomon damlai a a ma a ding sek upahaw chuh a dawng a, a kawm u ah, “Zie mipite hi bangti’n dâwng leng pha na sau hi?” a ti a,

⁷ Chun, amau chun a kawmah, “Tuhin ziehaw suok a hi na um a, a nau na sep a, amau haw hi na dâwn a, a kawm u a thu phatak gen na guot chun, kumlekhuo’n na suok in um un au,” ti’n a gen u a.

⁸ Himahlele upate lemguotpihna chuh a zawp puoh a, amah guolpih tangval haw, a maa ding sekte chuh a dawng zaw ta a.

⁹ A kawm u ah chun, “Zie mipite hin ka kawmah, ‘Na pa khan ka chung u a namkawl a ngak hi ei hih zâng sak in,’ ti a a gen uh hi ka dâwn dân ding pha bang ahim nei guotsak thei ding um?” a ti a.

¹⁰ A guolpih tangval haw chun a kawmah, “Zie mipite, na pa khan ka namkawl uh a hih gik sek bêk a, nang in nei hih zâng sak in, na kawma tite kawm achun hitibang hin a kawm u ah gen in: ‘Ka pa kâwng sangin ka khutme hi a lien zaw a.’

¹¹ ‘Ka pa khan namkawl gik tak a hun puok sak sek a, kei chun chuh na namkawl hawu behlap ding ka hi; ka pa’n zêpna’n a hun na zêp sek a, kei chun chuh aikawm a hun gawt ding ka hi,’ tin gen in,” a tiu a.

¹² Khutichun, Jeroboam leh mipite chengcheng chuh leng in, “Ni thum zawh leh ka kawmah hungkit un,” ti a a hilh bang khan, a ni thum zawh chun Rehoboam kawmah a va chieh u a.

¹³ Ziephet chun leng chun mipite chuh khauh takin a na dâwng a, upate lemguotpihna kha a zawp puoh a;

¹⁴ Tangval haw lemguotpihna bang khan, “Ka pa’n na namkawl uh a na hih gik a, kei chun chuh na namkawl uh chuh behlap ding ka hi, ka pa’n zêpna’n a hun zêp a, kei vang in chuh aikawm in hun gawt ding ka hi,” a ti a.

¹⁵ Khutichun leng chun mipite thugen chu a ngaihsak ta puoh a; a ziek chuh Lalpa a kipata zie thil chu hung um ahi ngâl a, Lalpa’n Shiloh mi Ahijah manga Nebat chapa Jeroboam kawma thu a na gen tâk kha a hihdet theihna dingin.

Lalgam Kikhenna

¹⁶ Chun, Israel te chengcheng chun leng in a thu gen uh a zawp puoi tih a het un, mipite chun, “David ahin chanvo bang ahim I neih uh? Jessai chapa achun go luoh ding I nei diek puou hi; aw Israel te haw, na puon-In lam u ah chieh chiet un; David, na inkuon kingaihtuoh mai ta’n,” ti’n leng chu a dawng u a. Khutichun Israel te chuh a puon-In lam chiet u ah a chieh tau a.

¹⁷ Himahlele Juda khawpihaw a cheng Israel chate chung achun Rehoboam in vai a hawm tai.

¹⁸ Tichun leng Rehoboam chun nasema pawng gawihte lawiupa Adoram chu Israel te kawmah a sawl a; amah chuh Israel te chengcheng chun suongin a na sep u a, a thi ta a. Ziephet chun, leng Rehoboam chuh Jerusalem a tai dingin a kangtalai chungah kintakin a chu ta a.

¹⁹ Khutichun Israel te chu tuni tieng hin David inkawte chungah a hel tau hi.

²⁰ Chun, hiti hi ahi a, Israel te chengcheng in Jeroboam chuh a hungkit tai tih a zak phet un, kikhawp khâwmna a hung dingin a sam u a, tichun Israel te chengcheng chungah leng in a siem tau a. Juda nam tihloh ngâl David inkawte zui kuomah a um puou hi.

Shemaiah Hilhlawkna

²¹ Chun, Rehoboam chuh Jerusalem khuo a va tun chun, Juda inkuon chengcheng leh, Benjamin nam laka mi hangsan chiet kiteldawk, nuoikhat leh singgiet zet, Israel inkawte do a, Solomon chapa Rehoboam a dinga gam chu la kit dingin a sam khawm a.

²² Himahlele Pathien mi Shemaiah kawmah Pathien thu a hung tung a,

²³ Benjamin leh Juda inkawte chengcheng kawmah leh, Juda leng Solomon chapa Rehoboam kawmah thu va gen in;

²⁴ “Lalpa’n hiti hin a tii, ‘Va chieh kiu in, Israel suon, na suohpih teu chu va do diek kiu un, na In lam chiet u ah chieh kit tau in; ziehi kei hih ahi,’ ti’n,” a ti a. Khutichun Lalpa thu chuh a zawp u a, Lalpa thu bang chun a vaikit u a, a chieh kit suok tau a.

Jeroboam in Lalpa a Kiheisanna

²⁵ Chun, Jeroboam chun Ephraim tâng gam ah Shekem a siem a, zie achun a cheng ta a. Chun, zie apat chuh a pawtdawk a, Penuel a siem kit a.

²⁶ Chun, Jeroboam chun a lunggil in, “Lalgam hi David inkawte lam ah kilehkit ngêi ngêi ding ahi, ti’n a ngaihtuoh a.

²⁷ Zie mite hi Jerusalem a kithawi dinga a chieh toh zing u chun, a lunggil uh hi a lengpau Rehoboam, Juda gam leng lama hin nga kit untin; tichun kei ei that untin uh, Juda leng Rehoboam lam ah va pang kit un au,” a ti a.

²⁸ Khutichun leng chun lemguotpih ding a pui a, sana bâwngno nih lim a siem a; a kawm u ah chun, “Nanguh a dingin Jerusalem a va chieh hi a haksa taluoi; Aw Israel te haw, entiem u, na Pathien uh, Aigupta gam a kipata nanguh hun puidawk pa hih,” a ti a.

²⁹ Khat chu Bethel ah a kawih a, a khat zaw chu Dan ah a kawih a.

³⁰ Zie thil chu gitlohna a hung hi ta a; mipite chu ziete nih ho ding chun Dan tiengin a chieh sek u a.

³¹ Chun, amah chun munsangte ah chun In a sa a, Levi chite hilo, vantâng laka mi thiempu dingin a siem ta a.

Bethel a Pathien Ho demna

³² Jeroboam chun Juda gama kut a neih mah bangun, tha gietna, zie tha ni sawmlenga ni chuh kut ni dingin a guot a, maichâm achun a va chieh a, Bethel achun bâwngno lim siem kawm achun kithawihna a siem a; Bethel a munsang a siemna achun thiempute chu a kawih a.

³³ Chun, amah deih bang taka a guot tha ngêi, tha gietna, ni sawmlenga ni chun Bethel ah maichâm siem in a va kithawi a; chun, Israel chate dingin kut a guot a, maichâm a gimlim hâl dingin a va chieh a.