1 LENGTE 11 - PATHIEN LEKHABU THIENGTHO (BSI)

Pathien a Kiheimangsanna

¹ Himahleh, leng Solomon in Pharaoh chanu mai hilo in, nam dang numei tamtak Moab te, Amon te, Edom te, Zidon te. Hit te numei haw a lungsiet a;

² zie namte chungchâng thu chuh Lalpa’n Israel chate kawmah, “Amau haw chu kichênpih kiu unla, amauhawn le nanguh hun kichênpih kiu hen; a pathien hawu lam ah na lunggil uh hun puih kawi sak ding ahi ngâl un,” ti’n a na gen ta him a, ziehaw chu Solomon chun lungsietna’n a tuchak kêi a.

³ Chun amah chun zipi zasagih, leng chanu haw a nei a, mei zathum tawh; a zite chun a lunggil a puih kawi sak tau hi.

⁴ Chun, hiti hi a hung hi a, Solomon chu a hung upat nung chun, a zite chun pathien dangte lam ah a lunggil a puih kawi sak tau a. Tichun a pa David bangin Lalpa a Pathien lam ah a lunggil chuh a hung pha bukim ta puoh a.

⁵ Chun, Solomon chun Zidon mite pathiennu Asteroth leh Amon mite pathien kihdak-um tak Milkom chuh a hun zui ta a.

⁶ Chun, Solomon chun Lalpa mit muh in thil phalo a na bawl ta a, a pa David bangin Lalpa chu dettak in a zui ta puoh a.

⁷ Khutichun Solomon chun Jerusalem suohlam tângah Moab te pathien kihdak-um tak Kemosh a ding leh, Amon suonte pathien kihdak-um tak Molek a dingin munsang a siem ta a.

⁸ Khutibang mah chun nam dang zi a neihte a dingin, a pathien hawu kawma kithawi a gimlim hâlna ding chule a siem ta a.

Solomon Hilhgaihna

⁹ Chun, Solomon chun Lalpa chu a sulungna ta a, a kienga nihvei hiel kilak Lalpa Israel Pathien a kipata a kiheimang tâk ziekin.

¹⁰ Zie chungchâng achun thu a pie ta a: Pathien dangte a zuih lohna dingin; himahleh, Lalpa thupiek chu a vawp tapuoi.

¹¹ Zieziekchun, Lalpa’n Solomon kawmah chun, “Hitibang hin na na um ta a, ka thugawlh haw leh ka thu guot haw zawp dinga ka hun thupiek hi na na zawp ta puoh ngâl a, gam hi hun lak sak ngêi ngêi ing ka ting, na suok kawmah pie’ng ka.

¹² Amahvang chuh na pa David ziekin, na damsung in hih tadih puo’ng ka; himahlele, na chapa hun sungin hun lâksak ding ka hi.

¹³ Gam chengcheng chuh vang lâksak puo’ng ka ting; himahlele, ka suok David ziekin leh ka tel Jerusalem ziek hin nam khat chuh na chapa hun pie ding ka hi,” a ti a.

Solomon Melmate

¹⁴ Chun, Lalpa’n Edom mi, Hadad chuh Solomon melma dingin a hun tungdawk ta a: amah chu Edom gama leng suon ahi.

¹⁵ Chun, hiti hi ahi a, David Edom gama a um lai chun, a sepaih hotu Joab chu mithi vui dinga a chieh toh lai in Edom gamsung a pasal chengcheng a na that suok hiela; zie vui dinga chu va chieh to ahi.

¹⁶ (Edom mi pasal taphawt chuh a thah zawh masang un Joab leh Israel te chengcheng chu zie mun achun tha gup sung hiel a um u a.)

¹⁷ Hadad chu a pa suokte laka Edom mi khenkhat tawh Aigupta gam a chieh dingin a tai u a; Hadad chu naupang cha ahi nalai hi.

¹⁸ Chun, Midian gam apat a pawt u a, Paran ah a chieh u a; Paran apat in mite a pui u a. Aigupta lal Pharaoh kieng ah Aigupta a tung u a; amah chun Hadad chu In khat a pie a, nek leh châk a thawn in a pie a, chênna ding gam le a piei.

¹⁹ Hadad chu Pharaoh mit a tung ten a, tichun a zi suohpihnu, lengnu Tahpenes suohpihnu chuh a zi dingin a neih sak a.

²⁰ Chun, Tahpenes suohpihnu chun chapa Genubath a hinsak a, Tahpenes chun Pharaoh In ah a nawichep haihna a siem sak a, chun, Genubath chuh Pharaoh In ah Pharaoh chate laka chun a um ta a.

²¹ Chun, Hadad in Aigupta gam apat a David chuh a pulepate kawmah a ipmu tai tih leh, a sepaih lawiupa Joab le a thi tai tih a na zak chun, Hadad chun Pharaoh kawmah, “Ka gam lam u a ka chieh theihna dingin nei pawt sak ta,” a ti a.

²² Khutichun, Pharaoh chun a kawmah, “Ka kawma na um hin tâksap bang na nei a ahim, na gam lam u a chieh kit na guot mai chuh?” a ti a. Amah chun, “Bangmah tâksap a um puoi, himahlele ei chieh sak himhim in,” a ti a.

²³ Chun, Pathien in Solomon melma dingin Eliada chapa Razon, a pu Hadadezer, Zobah leng kawm apat taimang sa kha a hun tungdawk kit a.

²⁴ Chun, David in Zobah khuo a mi a thah khan amah chun a kawma mite a kaikhawm a, sepaih lawiupa’n a hung pang ta a; chun, Damaska khuo ah a chieh u a, zie tak achun a um u a, Damaska khuo achun leng in a chu ta a.

²⁵ Hadad sukgimtheihna behlap in Solomon damsung cheng, Israel te melma a na hizing him a; Israel te a mudah mah mah a, Suria gamsung ah vai a hâwm a.

Jeroboam kawma Pathien Thutiem

²⁶ Chun, Nebat chapa Jeroboam; Zereda khuo a Ephraim mi, Solomon suok, (a nu min chu Zeruah ahi a, meithai ahi a); amah chun le leng chungah a khut a tha a.

²⁷ Leng chunga a khut hun thakna ziek chuh ziehi ahi: Solomon in Millo a siem a, a pa David khawpi chu a sietna haw a siempha a.

²⁸ Jeroboam chu mihat khawkheng ahi a; tichun, Solomon in zie tangval chu mi thanuom tak hi a a het ziekin Joseph inkawte nasep chengcheng chungah lawiupa’n a siem a.

²⁹ Chun, zielai chun hiti hi ahi a, Jeroboam chu Jerusalem khuo apat a chiehdawk chu, Shiloh mi thiemgau Ahija’n lamkal ah a na mu a; Ahijah chun puon thak a silh a; amau nih mai in gamlak ah a um u a.

³⁰ Chun, Ahijah chun a puon thak silh chu a la a, phel sawmlenih a suoh a a.

³¹ Jeroboam kawm achun, “Phel sawm hi la’n la, Lalpa Israel te Pathien in hiti hin a tii: Ngaitie, gam hi Solomon lâksak ing ka ting, nam sawm chu hun pie ding ka hi.

³² Amahvang chuh ka suok David ziekin leh, Israel nam chengcheng laka ka tel khawpi, Jerusalem ziek hin nam khat chu nei in a.

³³ Amau haw chun ei taihsan u a, Zidon mite pathiennu Asteroth te, Moab mite pathien Kemosh te, Amon te pathien Milkom te a ho ziekun, ka mitmuha thilpha hih ding leh ka thuguot te leh ka vaihawm te hi a zawp dinga a pa David banga ka lampite a hawh loh ziekun.

³⁴ Gam pumpi vang lâksak puo’ng ka; amahvang chuh, ka thupiekte leh ka thuguot te zawpa, ka tel, ka suok David ziekin a damsung chun leng in um sak ing ka.

³⁵ Himahlele, gam hi a chapa lâksak ing ka ting, nangmah hi hun pie ding ka hi, nam sawmte chuh.

³⁶ Chun ka suok David in ka min um sak na dingin ka tel khawpi Jerusalem ahin ka masangah thaumei a neih zing theihna dingin nam khat chu a chapa pie’ng ka.

³⁷ Nang hih hun guot ing ka ting, na nawp dân dân in vaihawm in na tin, Israel te leng in um in la.

³⁸ Chun hiti hi hi’n tin, thu ka hun piek taphawt na zawpa, ka lampite na hawh a, ka suok David banga ka thuguot te leh ka thupiekte zawpa ka mitmuh a thilpha na hih chun na kawmah um zel ing ka ting: David ka sukdet bang khan inkuon dettak hun dinsak ing ka ting, Israel te hi hun pie’ng ka.

³⁹ David suonte chuh hih gimthei ding ka hi, amahvang chuh kumlekhuo’n vang hi puo’n a,” a tii, ti’n.

⁴⁰ Khutichun Solomon chun Jeroboam chuh thah a guo ta a: himahlele Jeroboam chuh a kipan a, Aigupta gam ah, Aigupta leng Shishak kawmah a tai a, Solomon thih macheng chun Aigupta gam ah a um ta a.

Solomon Thihna

⁴¹ Solomon chanchin dangte leh, a thilhih chengcheng leh a pilna haw chuh Solomon thilhih zikna bu ah a kizik hilo ahim?

⁴² Solomon in Israel te chengcheng chunga Jerusalem khuo a vai a hawm sung chuh kum sawmli ahi.

⁴³ Tichun Solomon chu a pulepate kawmah a ipmu ta a, a pa David khawpi achun a vui tau a; chun, a chapa Rehoboam chun a thasang in vai a hawm ta a.