1 LENGTE 10 - PATHIEN LEKHABU THIENGTHO (BSI)

Sheba Lengnu’n Solomon a Vehna

¹ Chun, Solomon in Lalpa min a dinga a thilhih chungchâng thu a a minthan dân Sheba lengnu’n a na zak chun thu haksa taktak dawng a patep dingin a kawmah a hung ta a.

² Chun, nungzui tamtak tawh, thil gimlimhaw leh sana tamtak leh suongmantam haw puo sangawngsaute pui in Jerusalem khuo ah a chieh ta a. Chun, Solomon kawm a tun chun, a lunggil a a thu dawt nawp chengcheng chu suohdawk suok in a hopih ta a.

³ Solomon chun a thu dawt chengcheng chu a dawng suok a; leng hetloh leh a hilhchet theih loh mawngmawng a um hiel puoh a.

⁴ Chun, Sheba lengnu’n Solomon pilna cheng chengte, a In sakte chu a mu a.

⁵ A dawhkhâng a nek ding te, a suokte chut dân te, a zenviel haw bawl dân te, a kivan dân teu, a khawn piete, Lalpa In a a lat hâlmang thillat te a vak muh chun lungthim nasan a gel thei ta puoh a.

⁶ Tichun leng Solomon kawmah, “Na thilhih haw leh na pilna haw keimah gama ka na zak khah thuthang diktak a na hi ngut hi uo.

⁷ Ahinla, keimah ngêi in ka mit ngêi a ka hung muh macheng chun a gen u chu ka na gingcha puoh a, ngaitie, a kimkhat le ei na hilh puou a, a gen uh ka na zak sangin na pilna leh na phatzie hi a nasa ahi hi.

⁸ Na mite, na suokte, na kawma um zing na pilna thu ngaitha zingte hih a hamphau hi.

⁹ Lalpa na Pathien, na chunga kipâk mah mah, Israel te lalchutphah a hun chut sak pa hi pahchak in um hen; Lalpa’n Israel te hi kumlekhuo’n a hehpih a, zieziekchun diktak a vaihawm dingin leng in a hun siem na hi hi,” a ti a.

¹⁰ Chun, leng chuh sana talent za leh sawmnih leh gimlim tam deuh leh suongmantam te a pie a. Sheba lengnu’n leng Solomon gimlim a piek banga tam hi a lut kha puoi.

¹¹ Chun, Hiram lawng hawn, Ophir apat a sana va puote chun le, Ophir apat in almug thingte leh suongmantamte a hun puou a.

¹² Chun, Solomon chun almug thingte chuh Lalpa In leh leng In umna’n leh lasate dingin kingkang leh pêkgitte siem na dingin a mang a. Tuni tieng hin khutibang almug thing mawng mawng chu a hung kipuolut kit tapoh a, muh le a kimu kit ta puoi.

¹³ Chun, leng Solomon in Sheba lengnu chuh a deih lam lam, bang hitaleh a nget tâk phawt chuh a pie a, a nget tihloh chule Solomon in thil a piek beh hi. Khutichun amahnu chu a umna gam lam ah a suokte tawh a vaikit tau hi.

Solomon Minthanna

¹⁴ Chun, Solomon kawma kum khat sunga sana lut haw gik dân chu, sana talent zagup sawmgup leh gup bûk ahi.

¹⁵ Zie ban achun sumkawlvei mite, gimlima sumkawlveite leh Arabia gama leng haw chengcheng leh gam vaihawm tute a nei hi.

¹⁶ Chun, Solomon in sana phaw lien sêkthawh a kisiem zanih a bawl a, phaw khat siemna chun sana sekel zagup a lut hi.

¹⁷ Chun, sana sêkthawh a kisiem phaw zathum a siem a; phaw khat ah sana mina thum a lut a: ziehaw chu leng chun Lebanon gammâng In ah a kawih hi.

¹⁸ Chun leng chun saiha lalchutphah lopi tak a siem a, zie chu sana hawihpen ti’n a luonkhum a.

¹⁹ Lalchutphah kaltohna chun kalbi gup a nei a, lalchutphah nung lam chu a kikuol ahi; a chutna siktuok a chun a kidodetna a um gêl gêl a, a kidona zul achun sakeibaknei lim nih hi a ding a.

²⁰ Chun, kalbi gup chung achun a siktuok ah sakeibaknei sawmlenih a ding a, zie tawbang chuh khawimah gam ah a siem ngei puou hi.

²¹ Leng Solomon tui dawnna khawn chengcheng chu sana ahi vek a, chun, Lebanon gammâng In a ûmlebel haw chengcheng chule sana thieng tak ahi suok kêi hi; dangkaguo mawngmawng a um puoi; Solomon hun lai a ngaih thupi ahihloh ziekin.

²² Chun, leng chun Tuisuohgiet achun Hiram lawng hawn kithuohpih dingin Tarshis kuonghaw a nei a; Tarshis kuonghaw chun kum thum hal cheng leh sana te, dangkaguo te, saiha te, zawnglien te, vahuong te a hun puo sek ui.

²³ Khutichun, leng Solomon chun khawvel a leng chengcheng haw chu hauhsakna leh pilna’n a khup suok kêi a.

²⁴ Pathien in a lunggil a pilna thu a kawihsak chu ngaitha dingin khawvel a mi chengcheng chun Solomon chu a hun zuon sausau sek ui.

²⁵ Chun a hung te chengcheng chun kipahman, kum cheng leh piek hun nei in dangkaguo umlebelte, sana umlebelte, puonte, gâlvante, gimlimte, sakawlte, sabiltungte, a hun pie sek u a.

²⁶ Chun, Solomon chun sakawl chung chu mite a samkhawm a: kangtalai sangkhat leh zali leh sakawl chung chu mite singkhat leh sangnih a nei a, ziehaw chu kangtalai kawihna khawpihaw achun, Jerusalem khuo ah lal kieng ah chun a umsak a.

²⁷ Chun, leng chun Jerusalem khuo chun dangkaguo haw chuh suong bang a ngaih theih hielin a kawih a, sidar thing haw chu phai a theipi hing bang pheta ngaih theih hielin a um sak a, a tam mah mah ngâl a.

²⁸ Chun, Solomon in sakawl haw leh patngatpuon chuh Aigupta gam apat a a châwk ahi a, lengpa sumkawlveite chun Aigupta muna hi aman a pieu a, a châwk zel sek uh ahi.

²⁹ Chun, Aigupta gama kangtalai chu dangkaguo sekel zagup zel ahi a, sakawl khat chu dangkaguo sekel zanih leh sawmnga zel man ahi: khutichun, Hit-mite lengte chengcheng kawm leh Suria lalte kawm achun a zuok sawn zel sek ui.