1 KORINTH 6 - PATHIEN LEKHABU THIENGTHO (BSI)

Gingtute Laka Kihêkna

¹ Na lak uh a kuo’nle, midang chungah buoina nei leu chin, Pathien mite ma a tun lo in, ginglote ma a tun ngam ding na hiu hi?

² Mi thiengthote chun, khawvel vaihawm sak ding ahiu ui tih helo na hiu hi? Khawvel vaihawm sak ding na hih ngâl u chun, thil neucha chuh ngaihtuoh theilo ding na hiu hi?

³ Tu damsung khawsak thu haw hi gen tâk loh in, vânsâwlchâkte nasan le vaihawm sak ding I hiu ui tih helo na hiu hi?

⁴ Khutichun, zie tawbang thubuoi chuh a hung um phat leh, sapchuomte laka mi muhsit-um te chuh na ngaihtuoh sak sek uh a ahim?

⁵ Na zahchâkna ding u a ka gen ahi. Suohpih kal a thubuoi khen thei ding, na laku ah mi ching khat bêk um lo na hiu a mawh?

⁶ Suohpih khatin a suohpih, vaihawmna ina tut in, ginglote masangah ahi nalai set a.

⁷ Nangmau haw laka dana kinielna na hun neih sek u hin, na bukim zet nai puou hi tih suklatna ahi. Nang u adi’n, a diklo a um chuh phazaw lo maw? Bang dinga mawh kichan zaw mai lo na hiu hi?

⁸ Khutihnak sang in, nangmau leh nangmau, diklo takin na kibawl tuoh u a, na kilaksak u a, na suohpihteu ngêi ngêi le tawbang chun na bawl u a.

⁹ Ahih leh, mi diktatlo te chun Pathien gam luoh puo’n au tih helo na hiu hi? Nangmau kithem kiu inla, kideihchak nuomte ahim, milim hote ahim, zawlsaite ahim, mi hûkte ahim, tawkuohûk te ahim;

¹⁰ guchate ahim, mi huoihamte ahim, zukham nuomte ahim, mi gensiet hatte ahim, lepguk chîngte ahim chun Pathien gam luoh puo’n au.

¹¹ Na laku a khenkhat chuh khutibang mi na hi sek u kha. Himahlele, gitlohna apat a sukthien na hi tau a; Pathien kawma lat na hiu a; Lalpa Isu Krista leh, Pathien Thagau zâla chuh, Pathien tawh kichama siem na hi tau hi.

Taksa hi Pathien Lopina ding ahi

¹² Thil chengcheng hih kei dingin a thieng a, himahlele, thil chengcheng hih a pha khel puoi. Thil chengcheng hih kei dingin thieng mah leh, bangmah suok a um dingin ka kiphal puoi.

¹³ Nek ding haw chuh gilpi a ding ahi a, gilpi chuh nek ding haw a ahi kit hi; himahlele, Pathien in sumang gêl gêl ding ahi. Sapum hi kipawl thanghuoina a mat ding ahi puoh a, Lalpa nasepna dinga mat ding ahi zawi; taksa a ding chule Lalpa piek ahi ngâl a.

¹⁴ Pathien in, thihna apat Lalpa chuh a kaitho ta a, chun, ei u le a thilhih theihna’n ei kaitho ina.

¹⁵ Na sapum u chuh Krista kahaw ahi tih helo na hiu hi? Krista sapum kahaw chuh lâksak in, nawhchizuok in ka siem dinga ahim? Naisai lo e.

¹⁶ Ahih loh leh, mi, a sapum a nawhchizuok zawp chuh, amah tawh kipumkhat ahi tih helo na hiu hi? Lehkhabu thiengtho in, “A nih un sapum khat hung hi’nau,” ti’n chientakin a gen ngâl a.

¹⁷ Lalpa zawp vang chuh, amah tawh thagau pumkhat ahiu hi.

¹⁸ Hûk a kideihchaknate hi haihsan un. Mihiem in gitlohna dang a hihte chuh a taksa pawlam ahi; himahleh, mi deihchakna nuomte vang chun amah sapum chungah thil gilo a hih ahi.

¹⁹ Ahih leh, na sapum u chuh, na sung u a um, Pathien kawm apat na muh uh, Thagau thiengtho In ahi tih helo na hiu hi leh?

²⁰ Nangmau a le na hi ta puou a, mana châwk na hi tau a puo; zieziekchun, na sapum leh na thagau chun Pathien limbawl un.