1 KORINTH 5 - PATHIEN LEKHABU THIENGTHO (BSI)

Sapchuom sunga Thanhuoina

¹ Na laku ah, kipawlthanghuoina a um hi tih a kithang vengvung a; khutibang kipawlna chuh Jentel te laka le um khalo, na lak uh a mi khatin a pa zi a kuolpih khah.

² Zie chuh bangtia ki-uonpih thei nalai na hiu hi? Zie tawbang thil hihpa chuh, na lak uh apat nawh dawka lungkhampih tak sangin na kithang-atpih zawu a.

³ Ka taksa hi na lak u ah tel kimahleh, thagau in nang haw kawmah ka um zing hi.

⁴ Thil khuti hiela hihpa chuh, tuhin le, Lalpa Isu min in na lak uh a tel guolin, a chung thu ka ngaihtuoh zo tai. Nang haw na kikhawp khawm u a, keile thagau a na lak u a ka tel na chun; I Lalpau Isu thilhih theihna chuh I laku ah a um ziekin,

⁵ Zie tawbang mi chuh, Lalpa Ni a a thagau hukdam a hih theihna dingin, a taksa chuh Setan kawma sukmangthai dinga na piek dinguh ahi.

⁶ Na uonnau hi thil phalam ei puoi. “Chawl tawmcha’n chângthâk lawm chuh a zel suok sek hi,” tih kigen hi na he puou maw?

⁷ Na hung thientho suok kêi theihna dingun, gitlohna chawl lui chengcheng chuh ladawk vek un. Khutichun, chawl tello na hih guol mah un, chângthâk lawm thak hung hi thei un lau. I Chiehkân Kut na ding u chuh a that ta ngâl u a; Krista ngêi chuh.

⁸ Zieziekchun, Kut hitiu, gitlohna leh nunsietna chawl luia Kut lo in; thienthona leh dikna chângthâk chawl buok loh in Kut zawi tiu.

⁹ Ka lehkhathâk khan, kipawlthanghuoi nuomte chuh kivawppih lo dingin ka hun zik ta kha.

¹⁰ Zie khawvel a kideihchak nuomte ahim, huoiham leh lepgute ahim, milim hote ahim, kivawppih loh hiel ding ti ka hi puoi; khuti hileh, khawvel apat na pawt dawk uh kiphamawh ding ahi ngâl a.

¹¹ Khuti chuh hilo in, kuole, suohpih min pu ngâl a, huk leh kideihchak nuom mi ahim, mi huoiham ahim, milim ho mi ahim, mi gaih nuom mi ahim, zu kham nuom mi ahim, lepgu nuom mi ahim, te chuh kivawppih kiu in ti’n, ka hun zik zawk ahi. Khutibang mite kawm achun ne ding inle chu hiel kiu in.

¹² Abang hita leh, pawlam a mite chunga thutan ding chuh kei mawhpuok ahi puoh a, Pathien in vaihawm sak ina.

¹³ Himahlele, nangmau ngêi kipawlkhawmna laka mi chuh, a chungthu ngaihtuoh lo ding na hiu u? Lehkhabu thiengtho in, “Migilo chuh na lak uh apat in nawhdawk un,” ti a a gen guol khan.