1 KORINTH 4 - PATHIEN LEKHABU THIENGTHO (BSI)

Krista Sawlchakte

¹ Khutichun, kei u hi, Krista zenviel leh Pathien thuguk vawp in mi’n ei ngai u hen.

² Chun, zie tawbang thil vawp chuh mi taksanum hih le a kûl hi tih le na het dinguh ahi.

³ Tu a nang haw’n nei zedapnau leh, mihing dana nei ngaihtuohna hawu hi bangma’n ka ngai puoh a; keimah le ka kizedap kha diek puoi.

⁴ Ka sie leh pha hetna chuh a thieng a, himahlele, zie chuh, thiemmawhna neilo ka hi tihna ei diek puoi. Ka chung thu tan ding chuh Lalpa ahi zaw ngâl a.

⁵ Zieziekchun, a hun tun masang in kuomah zedap kiu in. Vaihawmna tawpna chuh Lalpa hung tienga ngak ding ahi a; amah chun thima thil selgûk haw chuh vak ah hun la dawk intin, lunggil a tup haw chule hun sulang ina. Zie tieng chu leh, mitin in, Pathien apat a pahchakna a lawh ding bang chiet u chuh mu ta’n au.

⁶ Khutichun, suohpihte, a kizik dân khela kuomah ngaihtuoh loh ding tih kei u apat na zil theih na dingun leh na lak u a kuoma’n khat kisuonpih a khat a uon khum lohna dingin.

⁷ Mi dangte sanga chungnung zaw a nang hun siem kuo ahi? Na thil neih chengcheng chuh Pathien hun piek hilo ahim? Khuti a hih ziek chun, bangti dana, na neihsa chuh thilpiek hilo guola kisuonpih thei ding na him?

⁸ Na thil mamawh chenguh na nei tau maw? Na hung hausa tau maw? Ka tel lo in vai na hawm tau ahi maw? Ahi, vaihawm tak tak leu chin ka nuom hi, ti a chuh nangmau haw tawh vai ka hawm khawm theihna dingin.

⁹ Pathien in, kei uh sawlchakte hi, thi dinga guotte bang mai in, lei leh van a vânsâwlchâkte leh mi chengcheng in etnawp a a et huoi huoi ding u a, a nunung pen a ei kawih hi’n ka ngaihtuoh sek hi.

¹⁰ Kei u vang, Krista ziekin mi ngawl ka hiu a, nang haw vang, amah tawh kizawpna ziekin mi ching na hiu hi. Keihaw ka zawngkhal u a; nang haw vang chuh na hat uh ahi. Keihaw chuh muhsit in ka um u a, nang haw chuh limbawl in na um uh ahi.

¹¹ Tu tieng hin le, ka gilkiel un, ka dangchâk u a; silhlechen ka kham puou a, mi khutthak nulna ka hiu a; chênna bulbâl ka nei puou hi.

¹² Ka khut u a sem in ka gimthei u a; mi’n ei gaih tieng u leh, vangphat ka pie sek u a; mi’n ei sukgimtheih phat u leh, ka thuok hâm hâm sek u a;

¹³ Mi’n ei hêk tieng u leh, thep lungdam ka guo hâm hâm sek ui. Tu zieng hin le, khawvel mite deih loh, leisiet thil nin, paihmang mai ding guola bawl in ka um ui.

¹⁴ Nang haw hun sukzahchakna dingin, ziehi ka hun zik ahi puoh a, ka cha deihtakte banga hun hilhna dingin ka hun zik ahi zawi.

¹⁵ Krista achun sinsakpa singkhat nei mah leu chin le, Pa vang khat mai na nei ui. Chanchin Pha na kawm u a ka hung gen ziekin, Krista Isu tawh na kizawpnau achun, na pau ka hi tai.

¹⁶ Zieziekchun, ka umdan entawn dingin ka hun nget na hiu hi.

¹⁷ Zie ding chun, Timothe, Lalpa a ka cha deihtak leh, mi ginum hi, na kawm u a ka hun sawl ahi. Amah hin, Krista Isu tawh kizawpna zieka hinna thak a ka umdan te leh, mun tina sapchuomte kawma ka thu sinsakte chuh hun hetsak kit ding na hiu hi.

¹⁸ Na kawm u a hung talo dinga nei ngaihtuoh ziekun, na lak u a mi khenkhat na hung ki-uong u a.

¹⁹ Himahlele, Lalpa’n lem a sak chun, chawmkhat hal leh na kawm u ah hung ing ka ting; mi ki-uongte chuh, a thugen mai uh hilo in, a thilhhih theihnau chuh keimah ngêi in hung mu’ng ka.

²⁰ Pathien gam chuh thu mai in a um puoh a, thilhhih theihna’n a um zaw ngâl a.

²¹ Banga na deih zawk uh? Mawlh tawh ka hung dei mawh, a hihloh leh, hehpihna leh lunggil nem pu’n?