1 KORINTH 3 - PATHIEN LEKHABU THIENGTHO (BSI)

Pathien Suokte

¹ Chun, suohpihte haw, thagau mite kawma gen guolin na kawm u ah thu ka gen thei puoh a; phehlevo a um, mite kawm leh, Krista a chasente kawma gen guol in ka gen zaw sek ahi kha.

² An gum hilo in, nawitui a ka hun vak na hiu hi; an gum na nek theih nailoh ziekun. Tuhin le na na ne theilo zing uh ahi,

³ zie khawvel a mite guola hi na na hin zing ziekun. Na laku a, kimitthipna leh, kinakna um sekte hin phehlevo a um na hiu a, zie khawvel dân guol hin na um ui tih a sulang sek hilo maw?

⁴ Na lak u a khatin, “Kei Paul lawi ka hi,” mi dangin, “Kei vang Apollos lawi ka hi,” na tih lai chenguh, zie khawvel a mite guol hin na um zing uh hilo maw?

⁵ Apollos chuh kuo ahi leh? Paul chule kuo a hi? Nang haw, ginna lama hun pui dinga Pathien suokte ka hi chauh uh a puo! Zie chule, Lalpa’n keimau kawm chieta ei piek guol zelin ka sep uh ahi nalai hi.

⁶ Ken ka phut a, Apollos chun tui in a vak a, himahlele, a khansak chuh Pathien ahi.

⁷ Zieziekchun, a khansakpa Pathien ngâllo chuh a phutpa chuh bangmah ahi puoh a, tuia chawm pa chule bangmah ahi diek puoi.

⁸ Himahlele, a phutpa leh tuia chawm pa chuh pumkhat ahiu hi; Pathien in a nasep guol zel un kipahman pie gêl gêl ding ahi ngâl a.

⁹ Kei u chuh, Pathien naseppihte ka hiu a, nang haw Pathien lo ma chuh na hiu ui. Chun, Pathien insakte le na hiu hi.

¹⁰ Pathien in thil ei piek chuh mang in, In sa lawiupa ching tak guolin, ken suong ka phut a, mi dangin a chunga in a sak uh ahi. Himahlele, mi tin, a chunga a sak dân dingu achun chingthei chiet u he’n.

¹¹ Pathien in Isu Krista chauh chuh, suongphuh dingin a na lem ta a, suongphuh dang kuoma’n a phut thei kit ta ngâl puou a.Zie suongphuh chuh Isu Krista ahi.

¹² Chun, mi khenkhat in zie suongphuh chunga In sakna ding chun sana ahim, dangkaguo ahim, suongmantam ahim te mang intin; khenkhat in, thing ahim, hampa ahim, buhpawl ahim te mang un au.

¹³ Mitin nasep chuh, Lalpa Ni a suklat ahih phat chuleh muhin um ina. Zie ni chu leh mitin nasep chuh mei in hun sulang ding ahi a; meia patep in um intin, a hihna tak chuh muhin um ta’n a.

¹⁴ Kuo In sak le, suongphum chunga sak chuh a um zing chun, a sapa chun kipahman mu’n tin.

¹⁵ Kuo nasep le a kâk mang chun, chan intin; amah tak chu vang hukdam in um ina; amahvang chuh, meia chiehpai guol mai hi’n a.

¹⁶ Pathien In na hih u leh, Pathien Thagau nangmau ah a um hi tih helo na hiu hi?

¹⁷ Kuo’n le, Pathien In chuh a sukbuok chun, zie pa chuh Pathien in susie’n a. Pathien in chuh a thiengtho ngâl a, zie In chuh nangmau na hiu hi.

¹⁸ Kuomah, amah leh amah kithem kihen. Na lak uh a kuole, zie vannuoi dân guola hi ching a kisak chun, a hung chit theihna dingin, hung ngawl phawt hen.

¹⁹ Zie khawvel a chitna hi, Pathien ngaih in ngawlna ahi ngâl a. Pathien Lehkha thu’n: “Pathien in miching te chuh, amau haw chit gukhahna achun a awksak sek hi,” tih a gen guol khan;

²⁰ Pathien Lehkha thu dang ale, “Lalpa chun miching te ngaihtuohna haw chuh a thâwn ahi, tih a he ngâl a,” tih le zik ahi.

²¹ Zieziekchun, kuoma’n mihiemte thilhih haw chuh suong kihen. Bangakai hi nang haw a ahi vek ngâl a:

²² Paul ahim, Apollos ahim, Kiphas ahim; khawvel ahim, hinna ahim, thihna ahim, thil umsa ahim leh a hung um ding ahim, hile, a bawnin nanguh a vek ahi.

²³ Nang u le Krista a na hiu a, Krista chuh Pathien a ahi.