1 KORINTH 2 - PATHIEN LEKHABU THIENGTHO (BSI)

Krista Khetdênna Thu

¹ Chun, suohpihte haw, kei vang Pathien thuguk diktak gena na kawm u a ka hung lai khan, thugen lopi leh chitna thupi tak tawh hung ka hi puoh a.

² Na kawm u a ka um sung khan, Isu Krista kross a a thihna thu tihloh, thil dang himhim het ka guo puoh kha.

³ Khutichun, na kawm u a ka hung lai khan, zawngkhal tak leh lau a kilîng in ka um a;

⁴ Ka thu sinsak leh ka thugente kha mihiem chitna leh, thugen thiemna apat a gen ahi puoh a; himahleh thagau thilhih theihna diktak a hetsak ahi zaw kha.

⁵ Zieziekchun, na taksannau chuh mihiem chitna a kinga hilo in, Pathien thilhih theihna a kinga ahi zawi.

Pathien Chitna

⁶ Himahlele, thagau lama pitingte kawm achun, chitna thu chuh ka gen sek hi. Zie khawvel in a neih, chitna hi vang ei puoh a, zie khawvel a vaihawm, mangthai dingte chitna hile ei diek puoi.

⁷ Himahleh, kei un chuh Pathien chitna thuguk, chitna kisel; I lopina ding u a Pathien in khawvel kisiem ma pek a a guotsa thu chuh ahi, ka phuon zawk sek chuh.

⁸ Zie chitna chuh, zie khawvel vaihawmte hin a na he kha himhim puou hi. A na he kha hi taleu chuh, lopina Lalpa chuh khêndên puo’n au.

⁹ Pathien Lehkha thu’n: “Mit a muh khâk loh, bil a zak khâk loh, Mihiemte lunggil ale lut khalo; Pathien in a hehpihte ding a guonggalh tâk cheng chuh,” ti’n ana gen ahi.

¹⁰ Himahleh, Pathien zie chuh a thagau in a thuguk chuh ei hetsak ta a. thagau chun bangakai a sut dawk sek a, Pathien thuguk na tiengin.

¹¹ Mihiem thu haw chuh, mihing lungthim, a sunga um mah chun a he sek a. Khutibang mah chun, Pathien thu haw chuh, Pathien Thagau mah lo chun, kuoma’n a he puou hi.

¹² Khutichun, Pathien in a thawna ei piek haw chuh I het theihna dingun, eihaw vangin chuh, zie van nuoia thagau hi hilo in, Thagau. Pathien in ei piek chuh I muh zawk uh ahi.

¹³ Zie thil haw chuh mihiemte chitna thu a gen lo in, Thagau sinsak thu a gen zawk in, thagau lam thu haw chuh thagau lam mite kawma hilhchien in I gen sek ui.

¹⁴ Khawvel mi chun, Pathien Thagau lam thil haw chuh a lawp sek puou a, amah ngaih chun thil ngawlhuoi ahi a; Thagau a hetchil a hih ziekin a het theih loh him sek ahi.

¹⁵ Thagau mi vang chun bangakai a hechil sek a, amah chuh kuoma’n a hechil thei puou hi.

¹⁶ Pathien Lehkha thu’n: “Lalpa lungthim chuh kuo a he thei? Amah chuh kuo a sinsakna pie thei ding?” ti a a gen guol khan. Eihaw vang chuh Krista lungthim pu I hiu hi.