1 KHANGTHUBU 9 - PATHIEN LEKHABU THIENGTHO (BSI)

Saltâng Vaikitte

¹ Khutichun, Israel mipite cheng chu, a inkuon dungzui zel u a sim ahiu a, zie kizikna chu Israel lengte vaihawm lai zikna bu achun zik ahi. Juda mipite cheng chu, a gitloh ziek u a gawt dingin Babulon lam achun puih mang in a um tau a.

² Tichun, a khawpiu a, a neihteu luoh kit dinga vaikit masapente laka chun, Israel te laka mi vantâng, thiempute, Levi te leh Ho-In nasemte haw chu a tel u a.

Saltan nunga Jerusalem a cheng te

³ Chun, Jerusalem a cheng ding chun, Juda nam apat te, Benjamin nam apat te, Ephraim nam apat te leh Manasseh nam apat te chun a chieh u a.

⁴ Jerusalem a chêngte chu, Juda nam apat in inkuon zagup leh sawmkuo ahiu ui.

⁵ Juda chapa Perez suonte chun, Omri tupa, Amihud chapa chu a lawiupa dingun a guot u a. A pileputeu dang chu Imri leh Bani ahiu hi.

⁶ Juda chapa Shelah suonte chun, a inkuon lawiupau, Asai chu a lawiupa dingun a guot u a. Juda chapa Zerah suonte chun Jeuel chu a lawiupa dingun a guot u a.

⁷ Benjamin phung apat a Jerusalem a chiehte chu ziehaw hi ahiu: Meshullam chapa Sallu leh Hasenua chapa Hodavia chapa ahi.

⁸ Ibnei chu Jerohan chapa a hi a, Elah chu Uzzi chapa ahi a, Mikri tupa a hi. Meshullam chu Shephatia chapa a hi a, zie pa chu Reuel chapa ahi a, zie pa chu Ibija chapa ahi.

⁹ Amau haw nam a chun inkuon zakuo leh sawmnga leh gup a cheng ui. Ziehaw chu amau haw inkuon laka nam lawiupa ahiu ui.

Thiempu Jerusalem a Chengte

¹⁰ Chun, thiempu, Jerusalem a chêngte chu ziehaw hi ahiu: Jadai te, Jehoiarib te, Jakin te;

¹¹ Chuleh, Hilkiah chapa Azaria te ahiu a; a pileputeu chu, Meshullam te, Zadok te, Meraioth te, Ahitub te ahiu hi.

¹² Chun, Jehoram chapa Adai pilepute chu; Pashur leh Malkijah ahiu hi. Adiel chapa Maasai pilepute chu, Jahzera leh Meshullam, Meshillemith leh Immer te ahiu hi.

¹³ Thiempu inkuon lawiupate chu, sangkhat leh zasagih leh sawmgup ahiu a. Pathien Ho-In nasep thiem takte ahiu hi.

Jerusalem a Levi Chengte

¹⁴ Chun, Jerusalem a Levi chêngte chu: Hashub chapa Shemaiah a hi a, a pilepute chu, Azrikam, Nashabi, leh Merari behte ahiu hi.

¹⁵ Chun, Bakbakkar te, Heresh te, Galel te, Mika chapa Mattaniah ahiu a, a pileputeu chu Zikri leh Asaph ahiu hi.

¹⁶ Chun, Shemaiah chapa Obadia ahiu a, a pileputeu chu, Galal leh, Jeduthun ahiu a, Asa chapa Berekiah chu, Elkanah tupa a hi a, Netophat te gama cheng ahi.

¹⁷ Chun, kawtkhak ngakte chu, Shallum te, Akub te, Talmon te leh Ahiman te ahiu a, Shallum chu a lawiupa pên uh ahi.

¹⁸ Zie hun lai chun a inkawteu chu, Leng kulh kawtkhak, suohlam pang ngak a hi sek u a, a masang chun Levi suonte giehmun kawtkhak ngak ahiu hi.

¹⁹ Chun, Kora chapa chu Shallum a hi a, zie pa chu Ebiasaph tupa a hi a, zie pa chu Korah inkuon laka a unauteu inkawte Korah te haw tawh, Lalpa umna puon-In kawtkhak ngakte ahiu a; a puteu chu Lalpa giehbuk nasem leh, a lutna te veng a hih sek mah bang un,

²⁰ Eleazar chapa Phinehas chu lawiupa a hi a, Lalpa chuh a kawmah a um a.

²¹ Meshelemiah chapa Zekaria chu Lalpa umna puon-In kawtkhak veng ahi a.

²² Zie kawtkhak veng dinga teldawk cheng chengte chu zanih leh sawmkhat leh nih ahiu hi. Leng David leh thiemgau Samuel in, a pileputeu apat a, a sep ding u a a na guotsak uh ahi.

²³ Khutichun, amau haw leh a chateu chun, Ho-In kawtkhak etkawlna na chu a sem zawm zing tau hi.

²⁴ Tichun, a ning li, suohlam pang te, tumlam pang te, mâllam pang te, simlam pang te a chun kawtkhak ngakte a um sek u a.

²⁵ Zie kawtkhak vengte chu, khuo a a inkawteu chun a panpih sek u a; ni sagih hal cheng leh a kitheng zel sek uh ahi.

²⁶ Kawtkhak ngak lawiupa lite chu Levi namte ahiu a, Pathien ina sum kawihna leh indan enkawl ahi ngâl uh ahi.

²⁷ Chun, etkawlna na chu a nasep uh a hih ziekin leh, zingkal chenga kawtkhak hawn chu a nasep uh a hih ziekin, Ho-In naih achun a cheng u a.

Levi Chi Dangte

²⁸ Chun, Levi chi dangte chun, Pathien hona a matchâk kimangte chu a enkawl u a. A kawih lut ding u leh, a lak dawk ding cheng u leh a sim zel sek u a.

²⁹ Khenkhatte chu, thuomphuo te, Mun thiengtho a umlebelte cheng leh, changbuong nêl takte, uain te. olive thau te, begaw leh gimlim te enkawl dinga guot ahiu hi.

³⁰ Gimlim hel tuok viel chu thiempute mawhpuokna ahi.

³¹ Korah inkuonte laka Shallum chapa upapen, Levi mi, Mattithiah chu bela thillat ding chângthâk kan chu a mawhpuokna ahi.

³² Kohath suonte laka a unauteu khenkhatte chu, chângthâk thiengtho, chawlhni chenga kawih ding guonggalh a, kawihte ahiu ui.

³³ Chun, Levi inkuon khenkhatte chu, Ho-In a gihawih lama mawhpuo ahiu a. Zie inkuon lawiupate chu, Ho-In a indan khenkhat achun a cheng u a, sun le zan a sap lawn viel a hih ziekun, nasep dang chu piek ahi puou ui.

³⁴ A chunga min kigenhaw hi, a pileputeu apat a sut a, Levi inkawte, Jerusalem a chêngte laka lawiupa chiet ahiu ui.

Leng Saul Suonte

³⁵ Chun, Jeiel in Gibeon khawpi a siem a, zie chun a cheng ta a. A zi min chu Maakah ahi.

³⁶ A chapa masapen chu Abdon a hi a, a chapa dangte chu: Zur te, Kish te, Baal te, Ner te, Nadab te,

³⁷ Gedor te; Ahio te, Zekaria te, leh Mikloth,

³⁸ Shimeah pa chu ahi. Amau haw chule, Jerusalem ah, a unauteu tawh kigalchan in a cheng u a.

³⁹ Chun, Ner chun Kish a hing a, Kish chu Saul pa ahi. Saul chun chapa li a nei a: Jonathan te, Malki-shua te, Abinadab te, Esh-baal te ahiu hi.

⁴⁰ Jonathan chapa chu Meri-baal a hi a, Meri-baal chu Mika pa ahi.

⁴¹ Mika chun chapa li a nei a: Pithon te, Melek te, Tahrea te, Ahaz te a hiu hi.

⁴² Chun, Ahaz chu Jara pa a hi a, Jara chun Alemeth te, Azmaveth te, Zimri te a hing a; Zimri chun Moza a hing a;

⁴³ Moza chu Binea pa a hi a, zie pa chapa chu Rephai a hi a, a chapa chu Eleasa a hi a, zie chapa chu Azel ahi.

⁴⁴ Azel chun chapa gup a nei a, a min hawu chu: Azrikam te, Bokeru te, Ishmael te, Shearia te, Obadia te; Hanan te ahiu hi.