1 KHANGTHUBU 4 - PATHIEN LEKHABU THIENGTHO (BSI)

Juda Suonte

¹ Ziehaw hi Juda suonte chu ahiu hi: Perez te, Hezron te, Karmi te, Hur te, Shobal te.

² Shobal chapa Reai chun Jahath a hing a; Jahath in Ahumai leh Lahad a hing a, ziehaw chu Zorah khuo a chêngte hun suontute chu ahiu hi.

³ Hur chu, a pa Kaleb zi Ephrath cha upapen ahi a, a suonte chu, Bethlehem khuo hun tungdawk te chu ahiu hi.

⁴ Hur chun chapa thum a nei a: Etam, Gedor pa Penuel leh, Hushah pa Ezer ahiu hi. Etam chun cha pasal thum a nei a: Jezreel, Ishma leh Idbash ahiu a, chuleh chanu, Hazelelponi kiti chu tawh a nei hi. Penuel chun Gedor khawpi a tung dawk a, Ezer chun Hushah khawpi a tung dawk hi.

⁵ Tekoa khawpi hun tungdawkpa, Ashur chun zi nih, Helah leh Naarah a nei hi.

⁶ Naarah chu tawh chapa li a nei u a, Ahuzam te, Hepher te, Temeni te, Hahashtari te ahiu hi.

⁷ Helah chun chapa thum a nei a: Zereth te, Izhar te, Ethnan te, ahiu hi.

⁸ Koz chu Anub leh Zobebah pa ahi a, Haram chapa Aharhel apat a suon hung umte hun suonpa chu ahi.

⁹ Jabez chu a suohpihte sangin mi zahum a hi a. A nu chun, “Lungkham kawma ka hin thak a hih ziekin,” ti’n, a min dingin “Jabez” a sa ta a.

¹⁰ Jabez chun Israel Pathien chu a sama, “Aw Pathien, ei vangsak tei tei inla, ka gamgi hi ei keklet sak tei inla; ei umpih inla, na khut in ei kai zingin la, thil phalo bang hitaleh, ei suna thei dingte lak apat chun ei vengbit tei in,” ti’n a paucham a. Tichun, Pathien in, a thil nget chu a lawhtit sak ta a.

Inkuon Dangte Zikkhawmna

¹¹ Chun, Shuhah suohpihpa Kelub chun chapa Mehir a nei a, amah chu Eshton pa ahi a,

¹² Eshton chapa thum a nei a, Bethrapha, Paseah leh Tehinnah ahiu hi. Tehinnah chu Nahash khawpi tungdawkpa chu ahi. Zie pa suonte chu Rekah ah a cheng u a.

¹³ Chun, Kenaz chun chapa nih a nei a, Othniel leh Seraiah ahiu a, Othniel chate chu Hathah leh Meonothai ahiu hi.

¹⁴ Meonothai chu Ophrah pa ahi. Seraiah chu, mi khutthiemte chênna Luiphai hun mudawkpa, Joab pa ahi a, zie a chêngte chu mi khutthiemte ngen a hiu hi.

¹⁵ Jephuneh chapa Kaleb chapa thum te chu: Iru te, Elah; te, Naam te a hiu hi. Elah chapa chu Kenaz ahi.

¹⁶ Chun, Jehallelel chun chapa li a nei a: Ziphah te, Tiria te, leh, Asarel te ahiu hi.

¹⁷ Ezrah chun chapa li a nei a: Jether te, Mered te, Epher te leh Jalon te ahiu hi. Mared chun Aigupta leng chanu, Bithiah a kichênpih a, nau a vawp a, chanu Miriam leh chapa, Shammai leh Ishbah a nei ui. Ishbah chun Eshtemoa khawpi chu a phut dawk a.

¹⁸ Mared chun Juda phung a numei khat a kichênpih a, a chapate chuh: Jered, Gedor khawpi mudawkpa chuleh, Heber, Soko khuo hun tungdawkpa leh, Jekuthiel, Zanoah khawpi hun tungdawkpa chu ahi.

¹⁹ Hodiah chun Naham suohpihnu a kichênpih a. A suonte chu Garmi chite haw hi ahiu a, Keilah khawpi a chêngte leh, Maakath chite Eshtemoa khawpi a chengte hi ahiu ui.

²⁰ Shimon chapate chu: Amnon te, Rinnah te, Benhanan te, Tilon te hi a hiu hi. Ishi chapate chuh: Zoheth leh Ben-zoheth ahiu hi.

Shelah Suonte

²¹ Shelah chate chu Juda chate laka khat a hi a. Er chuh Lekah pa ahi a; Maroshah pa chu Laadah ahi a, patngatpuon-gânte nam, Beth-Ashbea khuo a chêngte chu ahiu hi.

²² Chun, Jokim leh Kozbah khawpi a chêngte leh, Joash leh Saraph, Moab numei kichênpih a, Bethlehem a a na chêngte chu ahiu hi. (Zie thuguichin te hi, a na sawt mah mah ta ahi.)

²³ Amau haw hi lenga dinga bel denga a na pang ahiu a, Netaim leh Gederah khawpi a cheng ahiu ui.

Simeon Suon leh a Khawpite

²⁴ Simeon chapa ngate chu: Nemuel te, Jamin te, Jarih tei Zerah te Shaul te ahiu ui.

²⁵ Shaul chapa chu Shallum a hi a, amah chapa chu Mibsam a hi a, amah chapa chu Mishma ahi.

²⁶ Mishma chapa chu Hamuel ahi a, amah chapa chu Zakur ahi a, amah chapa chu Shimei ahi.

²⁷ Shimei chun chapa sawm leh gup leh chanu gup a nei a: a unaute chun vang cha a hau puou a, Juda suonte bangin a suonteu le a pung puou hi.

²⁸ Amau chuh Beer-sheba, Moladah haw leh Hazar-shual-haw achun a cheng u a.

²⁹ Belhah-haw ah, Ezem-haw ah, Tolad-haw ah,

³⁰ Bethuel-haw ah, Hormah haw ah, Ziglag-haw ah,

³¹ Bethmarkaboth-haw ah, Hazar-susim-haw ah, Beth-biri-haw ah, Saraim-haw a le a cheng u a. Ziehaw chu David vaihawm tienga a khawpiteu chu a hi.

³² Chun, khuo dang nga ale a cheng u a: Etam te, Ain te, Rimmon te, Token te leh Ashan te ahi.

³³ A kimvela khuo neu chengcheng, Baalath sim thanglam tiengin a cheng u a. Ziehaw chu a chênnau mun leh a suonteu min zikna a vawp phatteu chu ahi.

³⁴ Ziehaw hi a phung upateu chu ahiu hi: Meshobab te, Jamlek te, Amaziah chapa Joshah te,

³⁵ Joel te, Joshibiah chapa Jehu te, (ziete pa chu Asiel chapa Seraiah a hi a);

³⁶ Elioenai te, Jaakobah te, Jeshohai te, Asai te, Adiel te, Jesimiel te, Benai te,

³⁷ Shiphi chapa Ziza te, (ziete pa chu Allon ahi a, zie chu Jedaia te, Shimri te, Shemaiah te suon ahi).

³⁸ A inkuon uh nasa taka a hung pun tâk ziek u chun, amin uh kigente hi Inkuon sunga luchang ahiu hi.

³⁹ Gedor lutna ah, phaizawl suohlam pang tiengin, a ganhawnteu tatna ding hawl in a kithehdalh tau a.

⁴⁰ Ganchate dinga hampa lim tak tak leh, pha tak tak a muu a, a gam chu a lien mah mah a, a thip dii diei a; gâlmuong tak ahi. A masanga a na chêngte chu Ham suonte ahiu hi.

⁴¹ Tichun, zie a min a zikteu chu Juda leng, Hezekia vaihawm lai khan a lut u a, a puon-In teu leh bûkteu chu a sumangthai vek u a, tuni tieng hin a mun u chu a luoh sak u a; a ganguol teu dinga tatna mun a um ziekin.

⁴² Chun, a lak u a mi zanga hiel chu Edom saklam achun a chieh u a. Ishi chapa chun a pui a, ziete chu: Neariah te, Rephai te, Uziel te ahiu ui.

⁴³ Tichun, Amalek nam, taimang a, a na umsunte kha a that u a, tuni tieng in zie tak achun a cheng zing tau hi.