1 KHANGTHUBU 28 - PATHIEN LEKHABU THIENGTHO (BSI)

David in Ho-In Sak ding thu a Piekna

¹ Chun, David in Israel milien chengcheng chu, Jerusalem a kikhawm dingin thu a pie a. Khutichun, nam tina puitute, lenggam a vaihawm miliente, nam khat laka mapuite, leng leh a chapa teu leh a thuomphuou leh a kawihna enkawlte, leng In a miliente, sepaih lawiupate leh mi pawimawhte chengcheng chu Jerusalem ah a kikhawm u a.

² Tichun, leng David chu amau ah a ding a, “Ka unaute leh ka mite haw, ka thu hi na ngaitha tiem u! Kei chun, Thugawlh kawihna Thingkuong kawihna ding leh, I Pathien uh keng ngakna ding In sa leng tih ka na ut mah mah a. A van ding le ka ngah diem ta a.

³ Himahlele, Pathien in ka kawmah, ‘Nang vang kido mi, thisan suoh mi na hih ziekin Ka Ho-In sa puo’n la,’ a ti a.

⁴ Himahlele, Lalpa Israel te Pathien in, ka pa inkawte chengcheng lak apat, Israel te lenga kumlekhuo a um dingin ei na tel ta a; Juda nam chu mapui dingin a na tel a; Juda namte laka ka pa inkawte; ka pa chapate lak apat Israel chengcheng leng hi dingin a na teldawk chuom ta a.

⁵ Ka chapate chengcheng lak achun Lalpa’n chapa tamtak ei pie a, Israel te leng dingin, Lalpa gam lalchutphah a chu dingin ka chapa Solomon hi a na tel ta a.

⁶ “Tichun, ka kawmah, ‘Na chapa Solomon in ka Ho-In leh huongsung chu tungdawk ina; ka chapa dingin ka tel ta a, tichun a pa hi’ng ka.

⁷ Ka thupiekte leh ka dante a zawp zing chun, tu a na hih zing bang u hin, a gam chu kumlekhuo a dingin hihdet ing ka,’ a ti a.

⁸ “Khutichun, Lalpa mipi, Israel te chengcheng mitmuh leh, I Pathien uh zak hin, Lalpa na Pathien uh thupiek chengcheng te hi zawp ding leh, ngaihsak dingin ka hun tîl na hiu hi; tichun, zie gam phatak hi luoh un na tin uh, na nung u a na suonteu le, kumlekhuo a dingin luoh sawn sak zel unlau.”

⁹ “Chun, nang ka chapa Solomon, na pa Pathien chu na Pathien hi hen la, lunggil phabukim leh lungthim lawp takin a na chu sem in. Lalpa chun lunggil a en sek a, lunggil a tupte chengcheng chu a he suok hi. Amah na hawl chun mu’n na tin, na kihei mangsan chun kumlekhuo’n hun paih tha’na.

¹⁰ Lalpa’n a Ho-In thiengtho sa dinga a hun tel ahi tih hezing in. Tuhin, pan ngâl inla, tupna dettak nei in, kisuhat inla bawl in,” a ti a.

¹¹ Khutichun, David chun a chapa Solomon chu, Ho-In hulliep lîmte, a In lîmte, sum kawihkhawmna in lîmte, a Indan chungnung limte, Mun thiengtho pên, zahngaihna chutphah dingte lim haw chu a pie a.

¹² A lunggil a a suongtuoh bang chengcheng, Ho-In huongsung mai limte, a kimvela indan chengcheng ding limte, Ho-In a matchâk kawihkhawmna In lim te, Lalpa kawma thillat kawihkhawmna In limte chu a pie a.

¹³ David chun, thiempute leh, Levi te’n, a lawi lawi a a nasepna dinguh in limte, Ho-In a nasepna lama In limte, Ho-In a nasepna dinga matchâk ûmlebel chengcheng limte le a pie a.

¹⁴ Nasepna lama dinga ûmlebel chitin, sana bel ding, sana mat zah dingte, nasepna lama dinga dangkaguo bel dinga dangkaguo mat zah dingte,

¹⁵ sana thaumei kawihna leh a thaumei dinga sana mat zah ding te, thaumei kawihna leh thaumei dinga mat zah dingte, thaumei kawihna a a khawk bang zela mat ding, dangkaguo thaumei kawihna ding leh mat zah dingte;

¹⁶ chângthâk dieh na dawhkhâng ding, khat zela sana mat zah dingte, dangkaguo dawhkhâng dinga dangkaguo mat zah dingte,

¹⁷ sana thieng kei, sathukna thikkhe te, kuongte, khawnte tawh, sana belhbu ding, belhbu khat zela mat zah dingte,

¹⁸ sana thieng a siem, gimlim hâlna maichâm dingte; Cherub te, a thau zaka, Thugawlh kawihna Thingkuong khuhte dinna ding lim kangtalai guola siemna dingte tawh a pie a.

¹⁹ Leng David chun, “Ziehaw chengcheng hi, Lalpa’n amah khut ngeia a hun zik, zie a lim cheng chengte hi, hih dawk dinga ei piek ahi,” a ti a.

²⁰ Leng David chun, a chapa Solomon kawm achun, “Hat tak leh hangsan takin um inla, na chuh sem inla, lau ki’n la, lungkie diek ki’n! Lalpa Pathien, ka Pathien, a na na sep pa hi na kawmah a um hi; Ho-In sak hi na zawh suok kêi ma’n, hun hengilh in hun thahtham puo’n a.

²¹ Tichun, thiempute leh Levi te chu, Ho-In a a nasep dinguh piek a hi tau a. Nasem mi, thiem tak takte chun a hun panpih nuom mah mah u a, lawiupa leh mipite chu na thu thu a um zel ding ahiu ui,” a ti a.