1 KHANGTHUBU 23 - PATHIEN LEKHABU THIENGTHO (BSI)

¹ Chun, David a hung têk mah mah phet chun, a chapa Solomon chu, Israel te leng dingin a siem a.

² Israel te milien haw chengcheng, thiempute leh Levi te haw tawh a sam khawm a.

³ Levi te chu kum sawmthum apat chunglam chu a sim a. A tam lam u chu pating chiet singthum leh sanggiet ahiu hi.

⁴ Ziehaw laka singnih leh sangli te chu Ho-In sate lawiupa dingin a guot a; sanggup te chu lawiupate leh vaihawm dingin a guot a,

⁵ Sanglite chu kawtkhak veng ding ahiu a, sangli te mah chu, pahchakna dinga thil gihawih, David in a siem chu manga Lalpa pakcha dingte ahiu a.

⁶ Tichun, Levi chate, Gershon te, Kohath te, Merari te chu lawi thum in David in a khên zak a.

⁷ Gershon in cha nih a nei a, Ladan leh Shimei ahiu hi.

⁸ Ladan chapate chu, lawiupa pên Jehiel te, Zetham te, Joel te, thum ahiu hi.

⁹ Shimei chate chu, Shelomoth te, Haziel te, Haran te, thum ahiu hi. Ziehaw hi Ladan suon inkuon lawiupate chu ahiu hi.

¹⁰ Shimei chun chapa li a nei a: Jehath, Zina, Jeush, leh Beriah ahiu hi.

¹¹ Jahath chu a upapen a hi a, Zina chu a bana a hi a, Jeush leh Beriah chun vang cha a hau puou a; zieziekchun, inkuon khat banga sim ahiu hi.

¹² Kohath in chapa li a nei a: Izhar te, Hebron te, Uziel te, ahiu hi.

¹³ A chapa upapen Amram chu Aron leh Mosi pa ahi. (Aron leh a suonte chu kumlekhuo a thil thiengtho takte hih thiengtho a, kumlekhuo a Lalpa masanga gimlim hâla nasem a, a min a mipite vangsakna pie dinga kawihchuom ahiu hi.

¹⁴ Pathien mi Mosi vang chu, a chapate chu Levi-nam laka sim ahiu hi.)

¹⁵ Mosi’n chapa nih a nei a: Gershom leh Eliezer ahiu hi.

¹⁶ Gershom chate laka lawiupa chu Shebuel ahi.

¹⁷ Eliezer chun chapa khat chauh a nei a, Rehabia ahi. Eliezer chun chapa dang mawng mawng a nei puoh a; Rehabia chun vang chapa tamtak a nei hi.

¹⁸ Kohath chapa nihna Izhar chun chapa Shelomith a nei a, a behte laka luchangpen ahi.

¹⁹ Kohath chapa thumna Hebron chun chapa li a nei a: Jeriah, Amaria, Jehaziel leh Jekameam ahiu.

²⁰ Kohath chapa lina Uzziel chun chapa nih a nei a: Mika leh Isshiah ahiu hi.

²¹ Merari chun chapa nih a nei a: Mahli leh Mushi ahiu. Mahli chun le chapa nih a nei a: Eliezer leh Kish ahiu hi,

²² himahleh, Eliezer chu chapa nei lo in a thi a, chanu khat chauh a nei a, a chanu chun a inkawte Kish chapa chu a kichênpih a.

²³ Chun, Merari chapa nihna Mushi chun chapa thum a nei a: Mahli, Eder leh Jeremoth ahiu hi.

²⁴ Ziehaw hi Levi suon, a inkuon uh bang zela min zika, a simteu inkuon lawiupa, Lalpa In sakna a sem, kum sawmnih apat chunglam mi, a sim chengcheng teu chu ahiu hi.

²⁵ David in, “Lalpa Israel Pathien in a mite chu: gâlmuong takin a umsak a, Amah ngêi chu Jerusalem a chun a um zing ta a.

²⁶ Levi te haw hin le, Lalpa umna puon-In leh, amah hona a kimang ûmlebel chengcheng te hi puok viel a ngai ta puoi,” a ti a.

²⁷ David thupiek nunung guolin, Levi te haw chu kum sawmnih apat chunglam tiengin sim a hi ngâl u a.

²⁸ A mawhpuoknau chu Pathien Ho-In a nasep, Aron chapate panpih a, huongsung leh indan sunga.thil thiengtho chengcheng hih thiengtho a, Lalpa Ho-In a nasep chu ahi.

²⁹ Chângthâk Pathien ma a latte, an thillat dinga changbuong nêl tak, chawl sawhloh chângthâk pan ahim, bela upmin ahim, a bûk leh a letdan chengcheng ding siem tuok vielte tawh;

³⁰ zing leh nitâk chenga Lalpa kawma kipah thugen leh,

³¹ Chawlhni te, tha thak te, kut hunbi haw a, a hih ding u a guot bang zela, Lalpa kawma hâlmang thillat te chengcheng Lalpa kawma lat zingte tawh;

³² Lalpa umna puon-In etkawlte, Ho-In etkawlte, leh a unauteu Aron suonte hih dinga a guot takphawt uh hih dingte tawh ahi.