1 KHANGTHUBU 22 - PATHIEN LEKHABU THIENGTHO (BSI)

¹ Tichun, David in, “Ziehi, Lalpa Pathien Ho-In umna ding hi hen la. Ziehi, Israel te hâlmang thillatna maichâm hi hen,” a ti a.

Ho-In sa dinga Kisaklawkna

² Tichun, David chun, Israel gama nam dang mite chengcheng chu sap khawm ding thu a pie a, nasep ding a pie a. Khenkhat chu Ho-In sakna ding suong a sêk khawl sak a.

³ A kawt siemna ding chun, thikkilhna leh a tawnte a pie a, sumeng tamtak, bûk sen loh khawp a pie a.

⁴ Tura leh Sidon mite chu Sidar thing tamtak hun la dingin a guot a.

⁵ Chun, David chun, “Ka chapa Solomon Ho-In a sak ding chu, lopi tak leh, khawvel a kithang ding a hi a. Himahlele, amah chu naupang tak leh, bangmah he nailo a hi a, zieziekchun, ken ka na guonggalh masak ding a hi,” ti’n a ngaihtuoh a.

⁶ Tichun, a chapa Solomon a sama, Israel Pathien Ho-In sa ding chun thu a pie a.

⁷ David chun a kawmah, “Ka chapa, ka Pathien limbawlna dingin, Ho-In sak ka ut mah mah a.

⁸ Himahleh, mi tamtak ka thah leh, gâl tamtak ka do chu Lalpa’n ei hilh a. Thisan tamtak ka na suoh tâk ziek chun, Lalpa’n a Ho-In chu ei sak sak lo ding ahi.

⁹ Himahleh, ka kawmah thu a na tiem a, ‘Chapa hun nei in na tin, a melmate apat a muonna ka piek ding ziekin muong takin vaihawm ina. Ka mi Israel te chunga thamuong tak leh bit taka vai a hawm ding ziekin, a min chu Solomon hi’n a.

¹⁰ Amah chun Kei dingin Ho-In sa ding ahi. Amah chu ka chapa hi’n tin, Kei a pa hi’ng ka. Israel te chungah a gam lalchutphah chu kumlekhuo a dingin hihdet ing ka,’ ei tii,” a ti a.

¹¹ “Khutichun, Ka chapa, Lalpa chu na kawmah um hen la, lamzang zel inla, na chungchâng thu a na gen masak tâk bang khan, Lalpa na Pathien Ho-In chu hun sa’n.

¹² Lalpa na Pathien chun chitna leh hetna te hun pie hen la, Israel te chunga chu, a Dan banga vai na hawm theihna dingin.

¹³ Tichun, Israel te chungchâng thu a dante leh vaihawmnate, Lalpa’n Mosi a piek kha na zawp chun, lamzang zel inla. Hat takin um in la, hangsan takin um in; lau ki’n la, lung le lungthuoi diek ki’n.

¹⁴ Haksa takin, Ho-In dingin sana, talent nuoikhat leh dangkaguo talent maktaduoi khat ka na guonggalh ta a; sumeng leh thikte le bûk sen loh, tamtak ahi; thing leh suong le ka guonggalh khawl ta a; ziehaw sanga tamzaw chu na muh beh ding ahi.

¹⁵ Nasem ding, thing-âtte leh suongsekte haw leh khut thiemna tin cheng sem thei na hau ngâl a.

¹⁶ Simsen guolloh sanate, dangka te, sumeng te, thik te, bawl zieng ngâl in, Lalpa chu na kawmah um hen,” a ti a.

¹⁷ Chun, David chun Israel milien haw cheng chu, a chapa Solomon panpih dingin thu a pie a.

¹⁸ Lalpa na Pathien u chu na kawm u ah a um a, ning tin ah gâlmuonna a hun pie a. Zie gam mite hi ka khut ah a na pie ta a, gam chu Lalpa leh nanghaw a ahi tau hi.

¹⁹ Ho-In sak pan ngâl un la, Lalpa Thugawlh kawihna Thingkuong leh amah hona dinga thil thiengthote chu a sunga na kawih theihna ding un, a ti a.