1 KHANGTHUBU 21 - PATHIEN LEKHABU THIENGTHO (BSI)

David Mi simna

¹ Chun, Setan chun, Israel chate chunga buoina siem a nuom a, tichun, David chu mi sim nawpna lungthim a neih sak ta a.

² Tichun, David chun, Joab leh a miliente kawmah, “Chieh unla, Beer-sheba apat a Dan tiengin Israel mite sim un la, a zah uh ka hettheih na dingin ei hun hilh kit un,” a ti a.

³ Chun, Joab in leng kawm achun, “Lalpa’n a mite hi, a leh zakhat in hihpung lele, hepu, na mite a hi vek uh hilo ahim? Bangati a he nuom na hi? Bang zieka Israel te thiemmawh channa ding hih ding?” a ti a.

⁴ Himahlele, leng chun Joab chu a thuzawh ta a. Khutichun, Joab chu a pawt a, Israel gam chengcheng achun a chieh a, Jerusalem ah a chieh kit a.

⁵ Joab chun mihing um zah chu David a hilh kit a, Israel gama galdo thei mi chengcheng chu maktaduoi khat leh nuoikhat ahiu a; Juda gama gâl do thei mi chu, nuoili leh singsagih ahiu hi.

⁶ Chun, leng thu chu Joab in a phasak loh lam a hih ziekin, Levi chite leh Benjamin mite chu a sim tello ahi.

⁷ Zie thilhih achun Pathien a kipâk ta puoh a; tichun, Israel chate chu a gawt ta a.

David Deihtelna

⁸ David in Pathien kawmah, “Zie ka thil na hih a hin nasa takin ka na gilo tai; himahlele na suok manlohna hi lungsiet takin ngaidam in. Ngawlhuoi takin ka na hih ahi tai,” a ti a.

⁹ Tichun, David thiemgau Gad kawma chun,

¹⁰ “Chieh inla, David kawmah, ‘Lalpa’n hiti hin a tii, thil chi thum na tel ding hun guotsak ing ka ting; na chunga ka hih dingin khat pên chu tel in, a tii’ va ti’n,” ti’n a gen a.

¹¹ Chun, Gad chu David kawmah a chieh a, Lalpa thugen chu a hilh a, a kawmah, “A khawipen chu tel ding na him?

¹² Kum thum kiel kiek ahim? Na melmate apat a tha thum delhmang a um a him? Ahihloh leh, ni thum sung Lalpa’n a chemzâma hun do a, gam chung pumpi a hipi lên saka, a vânsâwlchâkte manga gam pumpi chunga thihna a hun tun sak na tel ding? Lalpa chuh bangtia na dâwn ding ahim?” a ti a.

¹³ Chun, David in Gad chu a dâwng a, “Ka lung a kham mah mah hi, himahlele, mihing gawt a um ding chuh ka nuom puoi: Lalpa chu ei gawt in pang zaw he’n, a zaidawh thei ngâl a,” a ti a.

¹⁴ Khutichun, Lalpa’n Israel te lak achun hipi a lên sak ta a, Israel te haw chu singsagih a thiu a.

¹⁵ Chun, Pathien in Jerusalem khuo hihsie dingin vânsâwlchâkte a sawl a, a vak hihsiet ding kuon tak u chun, Lalpa chun a vak en a, thil phalo hih a guot chu a lung a hei a, tichun, mipite hih mangthai vânsâwlchâk kawm achun, “Hih ta ki’n, zie kha a hun tai!” a ti a. Lalpa vânsâwlchâk chu, Jebus-mi, Ornan buhphuol a chu ding a hi a.

¹⁶ Chun, David chun, Lalpa vânsâwlchâk, chemzâm zuk dawksa a Jerusalem chung zawna, lei leh van kikala ding chu a mu a. Khutichun, David leh upate chun saidippuon silh in, lei tuol ah a bawkkhup tau a.

¹⁷ Tichun, David in Pathien kawmah, “Keimah hilo ka him, mipite sim dinga thupiepa khah? Keimah hi ka hi, thil na hihkhiel a, gitloh huoi taka thil na hihpa chuh: zie belam te hin banga him a hih uh? Aw Lalpa ka Pathien, keimah leh ka inkawte hi ei gawt zaw’n la, na belamte hinna hi hawi in,” ti’n a paucham ta a.

¹⁸ Tichun, Lalpa vânsâwlchâk in Gad kawmah, David chu va chieh to a, Jebus-mi, Oman buhphuol a Lalpa dinga maichâm va siem dinga David hilh dingin thu a pie a.

¹⁹ Chun, Gad in Lalpa min a a gen bang chun David chu a chieh to ta a.

²⁰ Tichun, buhphuol achun, Araunah leh a chapa lite chun buh a na chil u a, vânsâwlchâk a muh phet u chun a chate chu a tai u a, a kisel tau a.

²¹ Araunah chun, leng David a kawm lama hung chu a muh muhin, a buh chilna mun chu a nusieh a, a maia lei si’n, a masangah a va khupbawk ta a.

²² Ziephet chun, David in a kawmah, “Zie buhphuol hi, Lalpa dinga maichâm ka siemna dingin, a man bukim in ei châwk sak in, mipite lak apat a hipi hi a kithiel dawk theihna dingin,” a ti a.

²³ Chun, Araunah chun David kawm achun, “Chang mai in, lengpa, pha na sak bang bangin hih in, zie hin hâlmanga kithawihna thillat dingin bâwngchal te, thing dingin phuol matchâkte. an thillat dingin buhte a um hi. Hun tuok sak vek ka,” a ti a.

²⁴ Himahleh, leng chun a dâwng a, “Hilo e, a man bukim takin chaw zawng ka, man beiin nanga chu Lalpa dingin la puo’ng ka ting, hâlmang kithawihna le lân puo’ng ka,” a ti a.

²⁵ Khutichun, Araunah chu, zie mun chawkna chun sana sekel zagup a pie ta a.

²⁶ Zie tak achun Lalpa dingin maichâm a siem ta a, hâlmang kithawihna leh chamna thillat te a pie a. A paucham a, tichun, Lalpa’n a dâwng a, van apat in mei a hun sawl a, maichâm chunga thilpiekte chu a hun kâng ta a.

²⁷ Tichun, Lalpa vânsâwlchâk chu thu a pie a, a chemzâm chu a pai ah a thun kit ta a.

²⁸ David in, zie tak achun Lalpa’n a pauchamna a dâwng hi tih a mu a, Araunah phuol a maichâm achun a kithawi ta a.

²⁹ Khutih lai chun, Mosi’n thaleka Lalpa umna puon-In a siem leh, hâlmang thillat hâlna dinga maichâm a siemte chu, Gibeon a munsang achun a um zing nalai a.

³⁰ Himahlele, David chu Lalpa vânsâwlchâk chemzâm a lauh ziekin, Pathien dawng dingin zie taka chun a chieh ngam puoi.