1 KHANGTHUBU 20 - PATHIEN LEKHABU THIENGTHO (BSI)

David in Rabbah Khuo a Lâkna

¹ Chun, tihi a hung hi a, kum a hung kihei a, lengte kido dinga a pawt lai hun u chun, Joab in sepaih hât takte a puidawk a, Ammon suonte gam chu a va do u a, David vang chuh Jerusalem ah a um a. Joab chun Rabbah khuo chu a do a, a hihsie ta a.

² Ammonte milim pathien, Malkom chun sana lallukhuk a nei a, a gik dân chu talent khat tawh kibang ahi. Zie lak achun suongmantam a um a, zie chu David in a la a, amah lallukhuk achun a kawih ta a. khawpi apat chun gâllâk thil tamtak le a lau a.

³ Khawpi a mipite chu a puidawk a, thing-âtna te, lei lehna thikzumte, heicha te, mang in na a sep sak a. Khutibang chun, Ammon suon khawpi chengcheng chu David in a hih a. Tichun, amau leh a mite chengcheng chu, Jerusalem ah a vaikit tau a.

Philistia Miliente tawh Kidona

⁴ Chun, zie nung chun, Philistia mite tawh Gezer ah kidona a um a, zietum chun Hushat-mi, Sihbekai in milien suonte laka Sippai kiti chu a that a; tichun, Philistia te chu zawhin a um tau hi.

⁵ Chun, Philistia mite tawh kidona a um kit a; chun, Jair chapa Elhanan, Git-mi Goliath suohpihpa Lahmi kiti chu a that a, a tiengcha lung chu kawlka banga khauh ahi.

⁶ Chun, Gath khuo ah kidona a um kit a, zie tak achun milien tak mai, a khut langtuok a khutzung gup, a keng langtuok a kengzung gup, a bawna sawmnih le li nei hi a um a. Amah chule, malaia milien suon apat pieng a hi a.

⁷ Amah chun Israel mite chu a va cho a, David suohpih, Shammah chapa Jonathan chun a na that a.

⁸ Zie mi thum te, David leh a mite’n a thah teu hi, Gath khuo a milien suonte ngen ahiu ui.