1 KHANGTHUBU 19 - PATHIEN LEKHABU THIENGTHO (BSI)

Ammonte tawh Kidona

¹ Chun, zie zawh chawmkhat nung chun, Ammon leng Nahash chu a thi a, a chapa Hanun chun a go a luoh ta a.

² David chun, “A pa khan ei na lungsiet sek ziekin, ken le Nahash chapa Hanun chu lungsiet ing ka,” a ti a. Khutichun, David chun a pa thihna chung thu a lungmuon dingin mite a sawl a. David mite chu Ammon gama Hanun kawm a va tun phet u chun,

³ Ammon suon lawiupate chun Hanun kawmah, “David hin na pa a zah zieka a lungmuon dinga na kawma a hun sawl hi dingin na gingcha? A mite hi gam susie ding leh entha dinga na kawma hung ahi puoh ding um?” a tiu a.

⁴ Khutichun, Hanun chun David mite chu a man a, a khabemul uh a met muih sak a, a silhlechenteu chu a tawbak kimkhat uh khuh pha hâm in a tan sak a, a sawl kit ta a, tichun, a kipandawk tau a.

⁵ Tichun, in lama vaihkit chu a zakcha mah mah tau a. A chanchin u chu David in a het phetin, “Jerikoh khuo achun hung um tadih unla, na khabemul teu chu a sauh kit nung leh In lama hung na’n lau.” ti a gen dingin mi a sawl a.

⁶ Ammon suonte chun, David zakdah lam tak a hih ui tih a hung kihet phet u chun, Mesopotamia gama mite, Aram-maakah a mite, Zobah-a mite, kangtalai leh sakawl chung chuong mite gawihna dingin, dangkaguo talent sangkhat a thak u a.

⁷ Khutichun, kangtalai singthum leh sangnih, chun, Maakah leng leh a mite a guoi u a, Medaba kieng ah panmun a guonggalh u a. Ammon suonte chule, a khawpiteu apat chun a pawt u a, a kikhawm u a, kido ding chun a pawt tau hi.

⁸ Chun, David in zie chu a zak phetin, Joab leh a sepaih hangsan te cheng chu a sawl dawk a.

⁹ Ammon suonte chu a hung kipan u a, Rabbah khawpi lutna kawtkhak bul ah a kitieng u a, leng, a lak u a hung tel haw chun, a chuom in phul ah panmun a khawh u a.

¹⁰ Khutichun, a malam leh a nung lam ah hun do ding ahiu ui tih Joab in a het phet chun, Israel mite laka suonum deuh deuh a teldawk a, Suria te do ding chun a kitieng tau a.

¹¹ Chun, a sepaih dang cheng chu a suohpihpa Abishai khut ah a kawih a, Ammon suonte do ding chun a na pang tau a.

¹² Chun, Joab chun, “Suria mite hi ka zawh loh ding chun, nangin nei panpih in na tin, Ammon suonte na zawh loh ding chun, ken hun panpih ing ka.

¹³ Hangsan takin pang inla, hât takin um in, I mite leh Pathien khawpi humbitna dingin theihtawp in pang hitiu; Lalpa’n pha a sak bang bangin a chung achun hih hen,” a ti a.

¹⁴ Khutichun, Joab leh a mite chun, kidona mun lama Suria te chu a va do tau a; tichun, a masang a chun a taisie tau a.

¹⁵ Suria mite chu a taisie tau hi tih Amon suonte chun a het u chun, amau haw chule a suohpihpa Abishai masang apat chun a taisieu a, khawpi ah a tailut tau a. Tichun, Joab chu Jerusalem ah a chieh kit ta a.

¹⁶ Himahleh, Suria te chu a guollah tau hi tih a hung kihet u chun, mi a sawl u a, Euphrates lui suohlam a Suria sepaihte chu a sam dawk u a, Zobah leng Hadarezer sepaih lawiupa, Shobak makaihna nuoi achun a kawih tau a.

¹⁷ Zie chu David in a het phet chun, Israel sepaihte cheng chu a sam khawm a, Jordan lui a galkai u a, Suria te do dingin a kitieng u a. Khutia David lawi haw chu a kitien zawh phet u chun, Suria te haw chu a do tau a.

¹⁸ Tichun, Suria mite chu Israel te masang achun a taisie tau a; David leh a sepaihte chun Suria mite, kangtalai sangsagih chunga chuleh, sepaih singli a that u a, Suria te sepaih lawiupa Shabak le a that u a.

¹⁹ Tichun, Hadarezer mite chun Israel te zawhin a um ui tih a hung kihet phet un, David tawh kichamna a siem u a, a mite dingin a um tau a. Tichun, Suria te chun, Ammon mite chu a panpih kit nuom ta puou hi.