1 KHANGTHUBU 18 - PATHIEN LEKHABU THIENGTHO (BSI)

David Guolzawhna

¹ Chun, zie hun lai chun, David chun Philistia mite chu a do kit a, a zo a, Gath khuo leh a khawpelte chu, Philistia te khut apat chun a la kit ta a.

² Chun, Moab te le a do kit a, Moab mite chu David mite a hung hi tau a, siehte a pie tau a.

³ Zie zawh chun David in Hamath gambung khen lama Zobah gamsung a Suria leng Hadarezer chu a do kit a, a ziek chu, Hedarezer chun Euphrates lui chunga gamte chu a lak guot ziekin.

⁴ Tichun David chun kangtalai sangkhat leh, sakawl chung chuong mi sang sagih leh, keng sepaih singnih a lâksak a. Kangtalai kai sakawl chengcheng chu, a zapi gui uh a bân sak a, kangtalai kai dingin zakhat a hinghawih a.

⁵ Chun, Damaska khuo a Suria mite chun, Zobah leng Hadarezer panpih dingin sepaih a sawl u a, David chun a na do a, Suria mite chu singnih leh sangnih a na that ta a.

⁶ Khutichun, David chun Damaska khuo a Suria mite lak achun sepaih a kawih a; tichun, Suria mite chu David mite a hung hi tau a, siehte a pie sek u a. Tichun, Lalpa chun David chu a chiehna lam taphawt ah a zawh sak zel ta a.

⁷ David chun, Hadarezer miliente sana phaw haw chu a lâksak a, Jerusalem ah a puo ta a.

⁸ Khutibang mah chun, Hadarezer khuo, Tibhat leh Kun apat David chun sumeng thik tamtak a la a, (Solomon in ziehaw chu mang in, Ho-In a sa ta a, tui luihna te, khawnte, sumeng matchâkte siemna chun a mang ta a.)

⁹ Chun, Hamath leng Tou chun, Zobah leng Hadarezer sepaih cheng chu David in a zo tai tih a na za ta a.

¹⁰ Hadarezer chu a do a, a thah zieka chibai bûk dingin leh, kipahpih dingin a chapa Joram chuh David kawmah a sawl a; Hadarezer leh Tou chu a na kido sek a hi ngâl u a. Joram chun sana leh dangkaguo leh sumeng umlebelte chu thilpiek dingin a ken sak a.

¹¹ Ziehaw chu tawh gam chuom chuom Edom te, Moab te, Ammon te, Philistia te leh Amalek te leh namtin apat a lâkte chu leng David chun Lalpa kawmah a lân khawm ta a.

¹² Zielo chun le, Zeruiah chapa Abishai chun, Edom te singkhat leh sanggiet chu Chi Guom ah a that a.

¹³ Tichun, Edom gam achun sepaihte a kawih a, tichun, Edom mite chengcheng chu David mite a hung hi tau a. Lalpa’n David chu, a chiehna chengah a zawh sak zel a,

¹⁴ Khutichun, David chun Israel mi chengcheng chungah vai a hawma; chun, a mipite chung achun diktak leh kitûp takin vai a hawm ta a.

¹⁵ Zeruiah chapa Joab chu sepaih lawiupa ahi a; Ahilud chapa Jehoshaphat chu lehkhazik in a pang a.

¹⁶ Chun, Ahitub chapa Zadok leh Abiathar chapa Abimelek chu thiempu ahiu a, Shavsha chu lehkhazik ahi.

¹⁷ Jehoiada chapa Benaiah chu Kereth leh Peleth te chunga lawiupa ahi a, chun, David chapate chule leng nasepna achun dinmun sang takte a chang chiet ui.