1 KHANGTHUBU 17 - PATHIEN LEKHABU THIENGTHO (BSI)

David kawma Pathien Thuchah

¹ Chun, leng David chu, a leng In achun a cheng ta a. Ni khat chu thiemgau Nathan a sama, a kawmah, “Kei, sidar thing In ah ka cheng a, Lalpa Thugawlh kawihna Thingkuong chuh, puon-In ah a um zaw a,” a ti a.

² Ziephet chun, Nathan chun David kawmah, “Na lunggil a na vei bang tak chun hih ta; Pathien na kawmah a um ngâl a,” a ti a.

³ Zie zan mah chun Pathien in Nathan kawmah,

⁴ “Ka suok David chu va hilh in, Lalpa chun hiti hin a tii, ‘Ka umna In ding, nangin nei sak sak ding ahi puoi

⁵ Israel chate Aigupta apat a ka puih dawk apat tuni tieng hin, Ho-In ah ka um kha puoh a, puon-In leh bâwkchate ah ka um zaw sek hi.

⁶ Israel te chengcheng tawh ka chiehnau chenga le, ka mite vak dinga thu ka piek, Israel te vaihawm haw kawmah, Bangati a Sidar thinga In nei sak sak loh uh ahim?’ le ka ti kha puoi.

⁷ “Zieziekchun, ka suok David kawmah hiti hin gen ah, Bangakai hihthei Lalpa chun hiti hin a tii, ‘Belam tatna muna belam na chin lai in ka mi Israel te chunga vaihawm dingin ka hun la a;

⁸ Na chiehna tak ah na kawmah ka um zel a, na melmate ka hun zawh sak a; leia mi lopi takte bangin min lopitak hun siem sak ding ka hi.

⁹ Ka mi Israel te dingin mun guot ing ka ting, kichawn ta lo a, amau haw chan muna a um theih na dingin, amau haw chu phut ing ka ting. Tuma a ka mi, Israel te chunga vaihawmte ka guot laia, mi nunsie te’n a hih bang u khan hih gimthei diek ta puo’n au.

¹⁰ Tichun, ka mipi Israel te chunga vaihawm ding ka kawih a kipatin, na melmate cheng chu hun zawh sak ding ka hi. Zie mai chule hilo in, Lalpa’n inkuon hun dinsak ina tih ka hun hilh na hi.

¹¹ Chun, na ni a bukim a, na pilepute kawma na chieh tieng leh, na nunga na suon, na chate laka khat chu tung ding ing ka ting; a lalgam chu phut det ing ka.

¹² Amah chun In ei sak sak in tin; lenggam chu hât takin umsak ing ka.

¹³ Tichun, a pa hi’ng ka ting, amah chu ka chapa hi’n a, panpihna Saul apat a lâkmang a hih bang khan, amah chu vang lâkmang sak puo’ng ka;

¹⁴ ka mite leh lenggam chunga thunei in siem ing ka ting, a vaihawmna chun tâwp ni nei puo’n a,’ ” ti’n.

¹⁵ Tichun, Nathan in, a kawma phuon a um chengcheng chu, David a hilh ta a.

David Pauchamna

¹⁶ Khutichun, leng David chu a luta, Lalpa masang achun a chu a, a paucham a, “Aw Lalpa Pathien, kuo ka hi a! ka insung mite hile kuo ahi a, hiti chan chan hi nei puih ahim?”

¹⁷ Himahleh, thil na hihsak nasa zaw sem a! Hun hungtung dinga ka suonte umdan ding natieng in thu na tiem ta a; Nang Lalpa Pathien, milien bangin nei na siem ta a.

¹⁸ Na suok na limbawl chungchâng ahin David in bang a gen beh ta die! Na suok hi na hechien a,

¹⁹ Aw Lalpa, na suok ziek hin, nangmah lunggil a pawt bang zelin, zie thil lopi tak hi hetsak dingin thil lopi tak tak na hih ta a.

²⁰ Aw, Lalpa, ka bil u a ka hêtkhâk lak uh achun, nang tawbang hi Pathien dang a um puou a, nang lo chuh pathien danga um diek puoi.

²¹ Na mite hi dinga suok apat a na puih dawk, Israel te bang hi lei chungah nam dang himhim a um puou. Amau a dinga thil lopi leh mak takte hih sak in, khawvel ah na min a thang ta a. Aigupta apat na mite na hukdawk a, a masang uh apat in namte na nawhdawk sak a.

²² Na mi Israel te chu, kumlekhuo a na mite dingin na siem ta ngâl a; tichun, Nang Lalpa chu a Pathien uh na hung hi ta a.

²³ “Zieziekchun, aw Lalpa, na suok chungchâng thu leh, ka insung thu na gen chu, kumlekhuo a dingin subukim inla, na gensa bang khan hih in.

²⁴ Na min chu nasa takin kithang hen la, mipite, chun, ‘Lalpa Bangakai hihthei chu Israel te chunga Pathien ahi,’ kumkhuo’n tiu hen. Hun hungtung zel dinga le, ka vaihawmna chu humbit in.

²⁵ Aw nang ka Pathien, na suok kawma, ‘na suonte chu lenga hung pang ding ahiu,’ tih na phuon ziekin, na kawmah ka paucham thei ta a.

²⁶ Aw Lalpa, nang chu Pathien na hi a, zie thutiem maktak hi, na suok kawmah na tiem ta a.

²⁷ Na suok inkawte hi, na deihsakna kumlekhuo a a chan theihna ding u a vangsak dingin ka hun ngên hi. Aw Lalpa, nangin vangsak inla, na vangsakna chu kumlekhuo’n a chungu ah um hen,” a ti a.