1 KHANGTHUBU 16 - PATHIEN LEKHABU THIENGTHO (BSI)

David in Kithawihna a Siem

¹ Tichun, Thugawlh Bawm chu a la lut u a, a kawihna dinga David in a zak, puon-In sung achun a kawih tau a. Tichun, hâlmang kithawihnate leh, kichamna thillat te Pathien kawm achun a lân u a.

² Khutia, David in hâlmang kithawihna thillat te a lat zawh chun, Lalpa min in mipite chu a vangsak a.

³ Israel mi chengcheng te chu, a mei a pa’n, chângthâk tang khat leh sa tang khat leh grep kiphogaw, bawk khat chiet a pie a.

⁴ Chun, David chun, Thugawlh Bawm masanga zenviel ding leh, Lalpa Israel Pathien hona a mapui ding leh, amah pakcha a lasa dingin, Levi te khenkhat chu a guot a.

⁵ A lawiupa pên ding chun Asaph a guot a, a bana tumgit leh kingkang tum thiem Zekaria te, Jeiel te, Shemiramoth te, Jehiel te, Matithia te, Eliab te, Benai te, Obed-Edom te, Jeiel te tawh; Asaph chu dakkhutbet ngeihtaka tum dingin a guot a.

⁶ Thugawlh kawihna Thingkuong masanga pengkun a hun bang zela mût dingin thiempu nih Benai leh Jahaziel chu a guot a.

⁷ Tichun, zie ni chun David in, Lalpa pahchakna lasa dingin Asaph leh a insung mite chu a guot ta a.

David Pahchakna Late

⁸ Aw, Lalpa kawmah kipahthu gen unla, a min sam un! Nam tin lak achun a thilhihte chu hetsak un.

⁹ Amah limbawl in la sau inla, amah pakcha’n la sau in! A thilmak hih chengcheng thu chu sut un.

¹⁰ A min thiengtho chu suong un la, Lalpa hawlte lunggil chu kipâk hen.

¹¹ Lalpa leh a thahatna chu hawl un la; A umpihna chu hawl zing un.

¹² A thilmak hih lopitakte chu hezing unla; A thilhihte leh a kama a vaihawm na thu pawt te chuh.

¹³ Aw, a suok Israel suonte haw, a telchuom Jakob suonte haw.

¹⁴ Amah chu Lalpa I Pathien uh ahi a; A thupiek chu leichung cheng chenga ding ahi.

¹⁵ A thugawlh chu hezing inla, ama’n a thupiek, khang sang tam taka dinga a thupiek chuh.

¹⁶ Abraham kawma a thugawlh leh, Isak kawma a kipautiemna ngêi chuh.

¹⁷ Zie chuh Jakob kawma a thugawlh in a sudet a; Israel kawm achun kumlekhuo a thugawlh dingin a hihdet a.

¹⁸ “Kanaan gam hi nang hun pie’ng ka; Na chanvo leh na gochan dingin,” ti’n.

¹⁹ Pathien mite chu tawmcha chauh ahih lai u khan; het kham loh a tawm leh khuolzin bang mai ahiu ui.

²⁰ Nam khat apat nam khat kieng ah a vak chavai u a; Lalgam khat apat lalgam dang kawmah a chieh viel u a.

²¹ Himahleh, kuomah sukgimtheih a phal puoh a; ahi, amau haw ziekin lengte le a hilhgaih a.

²² “Ka thaunuh te chu sukha kiu inla, Ka thiemgaute chu suna dingin bangmah hih kiu in,” ti’n.

²³ Lei chung luoh cheng chengte haw, Lalpa pakcha’n la sau inla; A hukdamna thu chu nicheng in hetsak un.

²⁴ Nam cheng lak ah a lopi zie thu chu gen un la; Mi tin chengte lak ah a thilmak hihte chu gen un.

²⁵ Lalpa chu a lopi a, nasa taka pahchak tâk pên ahi ngâla; pathien chengcheng sanga zah ding ahi.

²⁶ Namte pathien chu milim mai ahiu a; himahleh, Lalpa chun vang, van haw khu a siem ahi.

²⁷ Limbawlna leh lopina’n a ûmkimvel a; Hatna leh kipahna chu a Mun thiengtho achun a um a.

²⁸ Mitin laka chitin chengte haw, Lalpa chu pakchau unla, Lalpa chu lopina leh hatna pieu in.

²⁹ Lalpa chu min lopina pieu un la; Thilpiek kithawihna chawiin a masang ah hung un la; Lalpa chuh thienthona leh lopina’n ho un.

³⁰ Lei chunga mite haw, a masangah kithing un! Khawvel hi a lîn lohna dingin hihdet in a um a.

³¹ Van haw khu kipâk takin um u henla, lei hile lawp takin um hen. Nam tin lak achun, “Lalpa’n vai a hawm hi,” ti’n hilh un.

³² Tuisuohgiet leh a sunga um chengcheng te hi gi hum hum u henla; gam leh guo leh a sunga um cheng chengte hi kipâk takin um hen.

³³ Zie tieng chuleh, gamnuoia thing cheng chengte hin, Lalpa masang achun lâwpin la sa’nau! Leichung a vaihawm a hung ding ahi ngâla.

³⁴ Aw, Lalpa kawmah kipahthu gen unla, amah chu a pha ngâl a; A zahngaihna chu kumlekhuo’n um ding ahi ngâl a.

³⁵ “Aw, ka hukdamnau Pathien! ei hukdam in la, Na min thiengtho pakcha ding leh, Na pahchak-umna chu suong dingin namtin lak apat chun ei puikhawm inla, ei hukdam in!” tiu in.

³⁶ Lalpa, Israel Pathien chu kumsawt apat kumsawt chanin pahchak in um hen. Tichun, mipi chengcheng chun, “Amen, Lalpa chuh pahchak in um hen,” a tiu a.

Jerusalem leh Gibeon ah

³⁷ Chun, leng David chun, Asaph leh a Levi chanpihte chu, Thugawlh Bawm umna muna Pathien hona a nasem zing ding chun a kawih den ta a.

³⁸ A nasepteu nichenga sem zel dingin a kawih a. Jeduthun chapa, Obed-Edom leh amah chipihte laka mi, sawmgup le giette chu a panpih dingin a kawih a. Hosah leh, Obed-Edom chu kawtkhak veng ahiu ui.

³⁹ Chun, thiempu Zadok leh a thiempu chanpihte chu Gibeon a munsang a Pathien hona a mawhpuo chu ahiu a.

⁴⁰ Lalpa’n Israel te dân a pieka kizik guol chun, zingkal leh nitâk a maichâm a hâlmang kithawihna chu a hâl zing dinguh ahi.

⁴¹ A zahngaihna chu kumlekhuo a um ding ahih ziekin Heman leh Jeduthun leh midang amin ngêi u a kigen te chu, Lalpa pahchakna lasa dingin a um u a.

⁴² Heman leh Jeduthun chun la thiengtho sak na a matchâk, pengkun leh khuongcha a nei u a; kawtpi veng dingin Jeduthun chate chu a guot u a.

⁴³ Tichun, mipi chengcheng chu amau haw In lam chietah a chieh u a; chun, David chule a insung mite vangsak dingin a In ah a chieh ta a.