1 KHANGTHUBU 15 - PATHIEN LEKHABU THIENGTHO (BSI)

Thugawlh Bawm Kawihna ding

¹ Khutichun, David chun, amah chênna dingin David khawpi achun inte a sa a; Thugawlh kawihna Thingkuong umna mun ding a guonggalh a, puon-In a zak a.

² Tichun, David chun, “Levi chite chauh chun, Thugawlh Bawm chu a zawn dinguh a hi a, Lalpa’n, a zawn ding leh, kumlekhuo a a nasem dinga a telte a hih ziek un,” a ti a.

³ Chun, Thugawlh Bawm a umna ding mun a guonggalhna a zawn to dingin, Israel te chengcheng chu David in Jerusalem ah a sam khawm a.

⁴ Tichun, David chun Aron suonte leh, Levi te chu a sam khawm a.

⁵ Kohath suonte laka lawiupa pên Uriel, a inkawte za leh sawmnih laka lawiupa a hung a;

⁶ Merari suonte lak apat Asai, zanih leh sawmnih laka lawiupa a hung a;

⁷ Gershom suonte lak ah Joel, a unaute za leh sawmthum chunga lawiupa a hung a.

⁸ Elizaphan suonte lak apat chun Shemaiah, a unaute zanih chunga lawiupa a hung a.

⁹ Hebron suonte lak apat chun, Eliel, a unaute sawmgiet chunga lawiupa chu a hung a;

¹⁰ Uziel suonte lak achun Aminadab, a unaute za leh sawmkhat leh nih te chunga lawiupa a hung a.

¹¹ Chun, David chun thiempute Zadok leh Abiathar leh Levi te, Uriel te, Asai te, Joel te, Shemaiah te, Eliel te, Aminadab te chu a sama,

¹² Levi te kawm achun, “Nang haw hi, Levi inkuon sunga lawiupa pente na hiu a. Israel te Pathien, Lalpa Thugawlh kawihna thingkuong chu, a mun ka guonggalhna a na chawn toh theihna dingun nang haw hi na unauteu tawh kihihthiengtho un.

¹³ A masa tum khan le, nang haw’n na zawn loh ziek u leh a thupiek banga I hih loh ziek u a Lalpa I Pathien uh lungnatna chu I chung u a puokzak ahi kha!” a ti a.

¹⁴ Khutichun, Israel Pathien, Lalpa Thugawlh Bawm chu zawn to dingin, thiempute leh Levi te haw chu a kihihthiengtho u a.

¹⁵ Chun, Lalpa’n Mosi manga thu a piek bang khan Levi suonte chun a zawnna mawlh chun a liengko u ah a pu tau a.

¹⁶ Tichun, David in, Levi te lawiupa haw chu, Levi te laka lasa thiemte, thil gihawih tumte, kingkang te, dâk khutbette tawh, ngeihtak a lasa dingte guot dingin thu a pie a.

¹⁷ Khutichun, lasa thiem inkawte lak achun, dakkhutbet tum dingin ziehaw hi a tel u a: Joel chapa Heman te, a unaute Berekiah chapa, Asaph te leh, Merari suonte laka Kushai chapa, Ethan te ahiu hi.

¹⁸ Thil gihawih ngeihtaka tuma panpih dingin Levi te a teldawk a:

¹⁹ Zekaria te, Jaaziel te, Shemiramoth te, Jehiel te, Unni te, Eliab te, Maasei leh Beriah te ahiu.

²⁰ Thil gihawih niem deuh a tum dinga, Levi te lak ah ziehaw hi a teldawk kit a:

²¹ Mattthia te, Eliphelehu te, Mikanei te, Azazia te leh Ho-In venga pang, Obed-Edom leh Jeiel te ahiu hi.

²² Chun, Kenania chu lasak thiem a hih ziekin, Levi chi gihawih tum thiem pawl a lawiupa ding chun a pang a.

²³ Bekeria leh Elkanah chu, Obed-Edom te tawh Thugawlh Bawm kawihna thingkuong veng dinga guot ahiu ui.

²⁴ Thiempute, Shebahia te, Joshaphat te, Nethanel te, Amasai te, Zekaria te; Benai te, Eliezer te chu, Pathien Thugawlh kawihna thingkuong masanga pengkun mût dinga guot ahiu ui. Obed-edom leh Jehiah chuh Thugawlh Bawm kawihna kawtkhak veng ahiu hi.

Thugawlh Bawm Jerusalem a Lâklutna

²⁵ Khutichun, David leh Israel lawiupate leh, sepaih lien lawiupate chu, Obed-Edom In ah, Thugawlh kawihna Thingkuong la ding chun kipâk takin a chieh tau a.

²⁶ Thugawlh kawihna Thingkuong zawn, Levi te haw chu, Pathien in a panpih ngêi tih hetna’n bâwngchal sagih leh belamchal sagih in a kithawi u a.

²⁷ David leh Thugawlh Bawm zawn Levi te chengcheng leh, gihawih tum chêngte leh lasa lawiupa Kenania te chu, patngat puon silh in a kivan u a. David chun patngat puon, thiempu puonâk a âk a.

²⁸ Khutichun, Israel mi chengcheng te chun, kiko zuoh zuoh kawm leh, pengkun binei leh, belam kite mût hâm chuoi chuoi kawmin, dakkhutbet te, tumgit te, kingkangte tawh gi vengvung in, Thugawlh Bawm chu Jerusalem ah a zawn lut tau a.

²⁹ Chun, hiti hi ahi a, Lalpa Thugawlh Bawm chu David khawpi a lâklut a hihlai chun, Saul chanu Mikal chun tukvan apat chun a vak en a, tichun, leng David kipaka lam leh chawm chu a mu a, a lungthim chun a musit gu ten ta a.