1 KHANGTHUBU 14 - PATHIEN LEKHABU THIENGTHO (BSI)

David Jerusalem ah

¹ Chun, Tura leng Hiram chun David kawmah mi a sawl a, Sidar thingte a puok saka, suong sekte leh khutthiemte chu David In sa dingin a sawl sak a.

² Tichun, Lalpa’n Israel mite chunga leng dingin a hihdet a, a mi Israel te ziekin a gam chu dawpsân in a um hi tih David chun a he ta a.

³ David chun, Jerusalem khuo ah zi a neih beh kit a, chanu leh chapate a neih beh a.

⁴ Jerusalem a a cha neihte chu ziehaw hi ahiu hi: Shammua te, Shobab te, Nathan te, Solomon te,

⁵ Ibhar te, Elishua te, Elpelet te,

⁶ Nogah te, Nepheg te, Japhia te,

⁷ Elishma te, Beelieda te, Eliphelet te ahiu ui.

Philistia te Zawhna

⁸ Philistia mite chun David chu, Israel mi cheng chengte leng dingin sathau a nuh ui tih a het un, a miteu chengcheng chu David man dingin a chieh to tau a. David chu amau haw tuok ding chun a chieh ta a.

⁹ Philistia mite chu, Rephaim luiphai a tun un, a do pan tau a.

¹⁰ David chun, “Philistia mite do dingin ka va chieh to dem? Ka khuta hin amau haw chu na pie na dem?” ti’n Lalpa chu a dawng a. Lalpa chun David kawmah, “Va chieh to ah, amau haw chu na khuta pie ding ka hi,” a ti a.

¹¹ Tichun, Baal-perazim ah a do tau a, zie tak a chun David in, amau haw chu a zo a, “Lalpa’n ka melmate chu, tui khuotzak bang mai in ei hihzak sak tai,” a ti a. Khutichun, zie mun min ding chun, “Baal-perezim” a sa ta a.

¹² Philistia te a taihsiet phet u chun, a milimteu a taihsan u a, tichun, David in thu a pie a, a hâltum tau a.

¹³ Chun, Philistia te chu, luiphai achun a hungkit pai u a, a do kit u a.

¹⁴ Tichun, David in Pathien a dawng kit a; chun, Pathien in a kawmah, “Delh lo in, kiheimangsan inla, thingtheimi kung zawn lama khun vak do zaw ta’n.

¹⁵ Thingtheimi lêk a kal thawm tawbang gi na zak chun, kipan zieng in, Philistia te do dingin, na masang ah ka chieh tai tihna hi’n a,” a ti a.

¹⁶ Tichun, Pathien in thu a piek bang chun David chun a hih a; Philistia sepaihte chu Gibeon apat Gezer tiengin a nawh kit vek ta a.

¹⁷ Khutichun, David min chu gamtin ah a hung kithang ta a; Lalpa’n namtin, amah chu a kihchak sak ta a.