1 KHANGTHUBU 13 - PATHIEN LEKHABU THIENGTHO (BSI)

Thugawlh Bawm Lâklutna

¹ Tichun, leng David chun lawiupa chengcheng, sang chunga lawiupate, leh za chunga lawiupate chu a dawng a.

² Israel mi, kikhawm khawm cheng chengte kawm achun, “Pha na sak lam uh a hih a, Lalpa I Pathien uh lemsak lam ahih chun, Israel gamsung cheng chenga I unau umte chu, a khawpi gancha tatna nei a cheng thiempute leh Levi te haw chu tawh, I kawm u a hung khawm dingin chiel hi tiu.

³ Tichun, chieh hiting un, Pathien Bawm, Saul leng a hih lai apat a ngaihsak loh a um chu va la kit hitiu,” a ti a.

⁴ Khutichun, mipi cheng chengte chun, zie thupun chu mipite mit muh a a dik ziekin pha a sau a.

⁵ Khutichun, David in, Aigupta lui, Shihor apat a, Hamath khuo lutna tienga, Israel mite chengcheng chu, Kiriath-Jearim khuo a Pathien Thugawlh kawihna thingkuong chu la dingin a sam khawm a.

⁶ Tichun, David leh mi chengcheng chu, Juda gama Baal Kiriath-Jearim a tihnau achun, Pathien Bawm, Cherub nih chunga, Lalchutphah a kichutsak a, Lalpa min kiputsak chu la kit dingin a va chieh tau a.

⁷ Khutichun, Thugawlh Bawm chu, Abinadab In apat chun kangtalai thak in a puou a, Uzzah leh Ahio chun kangtalai chu a tawl u a.

⁸ David leh Israel mite chengcheng chun la a sau a. Kingkangte, tumgitte, khuongchate, dakkhutbet te, leh pengkunte tawh Pathien masang a chun a lam dup dup u a.

⁹ Chun, Chidon buhphuol a tun phet u chun, bâwngchal chu a kithingsie ta a, ziephetchun, Uzzah chun Thugawlh kawihna thingkuong chu a khut in a vak tu a.

¹⁰ Tichun, Lalpa lungnat na chu Uzzah chung achun a puokzak ta a, Pathien Bawm a tuk ziek chun a sulum ta a; zie taka Pathien masang achun a thi ta a.

¹¹ Zie a kipat chun, zie mun min ding chun, “Perez Uzzah,” a sa tau a. Lalpa’n lungna a, Uzzah a gawt ziek chun, David chu a lungna mah mah ta a.

¹² Zie ni apat chun David chun Pathien chu a lau a, “Bangti’n Thugawlh Bawm chu ka la thei ta die?” a ti a.

¹³ Khutichun, David chun, Jerusalem a chu la lut talo in, Git mi, Obed-Edom In ah a kawih zaw ta a.

¹⁴ Zie tak achun tha thum a um a, tichun, Lalpa chun Obed-Edom insung mite leh, a thil neih cheng chu a vangsak ta a.